LUKA 24
24
Jesu Thohnawnna
(Mat 28.1-10; Mar 16.1-8; Joh 20.1-10)
1Huan nipikal a ani masapen, phalvak in, gimnamtui abawlte uh tawi in, han ah ava hoh uhi. 2Han a kipan suangtum khuksuan a om amu uhi. 3Huan alut ua, Toupa Jesu luang amu kei uhi. 4Huan hichi ahong hi a, huaiziak a amangbat lai un, ngai in, mi nih puan milengthei silh akiang uah ahong dingh uhi. 5Alau ziak ua, lei si a bokkhup a a-om lai un, akiang uah, “Bangziak a misi lak a mihing zong? 6Hiai ah a-om nawnta kei, athounawnta; Galili gam a a-om lai a na kiang ua athugen theigige un, 7Mihing Tapa mikhialte khut ah matsak in a-om ding a, akilhden ding ua, ani thum ni in athounawn ding ahi, achih,” achi uhi.
8Huan athugente ahon thei thak nawn uhi. 9Hanmun a kipan apai nawn un, sawm-le-khatte leh midang tengtengte kiang ah huai thil tengteng ahilh uhi. 10Sawltakte kiang a huai thuhilhte bel Mari Magdalin, Mari, Joanna, Jakob nu Mari leh akiang ua numei dangte ahi uhi. 11Himahleh huaite thugen thu maimai in angai ua, amau ataksang kei uhi. 12Himahleh Peter athou a, han ah ataita a; huan akun a, a-en a, puanmalngat omte kia amu a, huchi in thil omdan lamdang satak in inn lam ah apaita hi.
Emmau Lampi A Jesu Kilakna
(Mar 16.12-13)
13Huan ngai in, huai ni mah in alak ua mi nih khua khat Emmaus achih uah ahoh dek ua, huai khua Jerusalem a pan ching sawmguk ahi. 14Huan thil hong tung tengteng agenkhawm zel uhi. 15Gen a akisel lai un, Jesu ngei in ahon zuan a, akiang uah apai samta hi. 16Himahleh amah a theihlouhna ding un, amit uh hihvaih in a-om hi. 17Huan akiang uah, “Pai kawm a na genkhawm uh bang thu ahia?” achi hi. Huan dahmeltak in adingh dinden uhi. 18Huan amin Kleopas pen in akiang ah, “Tulai a thil omdan na theih louh, Jerusalem ah nangmah kia in hia na ten?” chi in adong hi.
19Ama'n akiang uah, “Bang thil eita?” achi hi. Amau akiang ah, “Nazaret Jesu, Pathian leh mi tengteng mitmuh a athu leh athilhih a zawlnei minthangtak tanchin thu; 20siampu liante leh ka heutute un thah ding a thu apiak ua, akilhden thute uh. 21Kou amah zaw Israelte tanpa hi ding a lamen lua hi ung a, himahleh, huai thiltun nungsiah tuni ani thum ni ahita hi. 22Huai lou leng ka pawlte uh numei kuate hiam zingsang in, han ah ava hoh ua, hon hihmangbang uhi. 23Aluang muloupi in, Pathian angelte kilak ka mu uh, huai mite'n athounawnta chih agen uh, ahong chi uhi. 24Ka ompihte lak ua kuate hiam han ah ahoh ua, numeite gen bang ngei in amu ua; himahleh amah amu kei uh,” achi uhi.
25Ama'n akiang uah, “Mihaite aw, zawlneite thugen tengteng gintak thu a ze-olte aw; 26Khrist in huai thilte thuak a thupina a lut ding him ahi kei a hia?” achi hi. 27Mosi leh zawlneite tengteng a pan in, Laisiangthou tengteng a ama tanchin toh kisai peuhmah amau ahilhchian zel hi.
28Huan ahohna ding khua uh atung dekta ua; amah gamla deuh a hoh tum bang in a-om hi. 29Kam in akhou ua, “Ka kiang uah taam in; nitaklam hi ding ahita a, ni leng tum dekta ahi,” chi in. Huchi in akiang ua taam ding in alutta hi. 30Huan hichi ahong hi a, akiang ua an um a atut in tanghou ala a, avualzawl a, abalkham a, akiang uah apia hi. 31Huan amit uh ahong vakta a, amel atheichianta uhi. Himahleh amah amangta mai hi. 32Amau, “Lampi a hon houpih lai a Laisiangthou thute hon hilhchet lai in i lungtang avakhuai him hilou hia?” akichi uhi.
33Huai laitak in, athou ua, Jerusalem ah akik nawn ua, sawm-le-khatte leh alawm omkhawmte amu ua, amau, 34“Toupa ana thounawn taktak ahi, Simon kiang ah leng akilakta,” ana chi uhi.
35Amau lampi a bang thil om hiam chih leh tanghou abalkhap a, amel atheihdante uh ahilh sam uhi.
Nungzuite Kiang Ah Jesu Akilak
(Mat 28.16-20; Mar 16.14-18; Joh 20.19-23; Nas 1.6-8)
36Huai thu agen lai un, Jesu mahmah alak uah ahong dingh a, akiang uah, “Na tung uah khamuanna om hen,” achi hi.
37Himahleh kiguih hial in, lauhuai asa mahmah ua, sikha mu hi in akingaihtuah uhi. 38Ama'n akiang uah, “Bang achia mangbang na hi ua? Bangziak a na lungsim ua ginlahna hong om ahia? 39Ka khutte ka khepekte en un, kei mahmah ka hi. Hon khoih unla, thei un; sa leh guh nei a na hon muh bang un, kha in zaw sa leh guh anei ngal kei hi,” achi hi.
40Huai agen khit in akhutte akhepekte amau alak hi. 41Kipah luat ziak a agin ngam louh ua lamdang asak lai un, akiang uah, “Hiai ah banghiam nek ding na nei uhia?” achi hi. 42Ngahou, bak khat leh khuaizu khak apia uhi. 43Ala a, ama uah aneta hi.
44Huan akiang uah, “Na kiang ua ka om lai a ka tanchin gelh peuhmah thute ahong tung ding chi a ka hon hilhhilhte Mosi Dan, zawlneite leh phatna late a thu kigen, hiaite mah ka thu ahi,” achi hi.
45Huchi in Laisiangthou thu theihna ding in alungtang uh avaksakta hi. 46Huan akiang uah, “Hichibang a gelh ahi, Khrist in gim athuak ding a, ani thum ni in misi lak a kipan athounawn ding,” achi hi. 47“Ama min in kisikna leh khelh ngaihdamna thu Jerusalem khua a pan in nam chih kiang ah hilh ahi ding,” chi in. 48“Huai thil tengteng atheihpihte na hi uhi. 49Huan ngai un, na tung uah ka Pa thuchiam ka hon sawl ding hi. Himahleh, tunglam a kipan thilhihtheihna silhsak a na om masiah uh khopi ah om kinken un,” achi hi.
Jesu Thu Nanung Leh Vankahna
(Mar 16.19-20; Nas 1.9-11)
50Huan Bethani pha in amau apikhia a; huan aban azak a, avualzawl hi. 51Huan hichi ahong hi a, avualzawl laitak in amau apaisan a, van ah pitouh in a-omta hi. 52Huan amah abia ua, kipak kawm in Jerusalem ah akik nawn ua; 53tempul ah Pathian phat in a-om nilouh uhi. Amen.
Actualmente seleccionado:
LUKA 24: PAITBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.