GENESIS 7
7
Tuichim
1Huan Toupa'n Noah kiang ah, “Nang leh na inkuanpih tengteng long ah lutta un. Nang zaw hiai khang a ka ma ah midiktat na hih ka hon mu hi. 2Sa siang chiteng lak ah anu leh apa, kop sagih zel; sa siang lou lak ah anu leh apa chiat toh kop nih zel, na kiang ah na pi ding ahi. 3Tung a leng vasa lak ah leng, anu leh apa chiat, kop sagih zel in; leitung a chi khah ding a hinsak ding in. 4Ni sagih in asam lai a, huai khit chiang in leitung ah ni sawmli leh zan sawmli sung vuah ka zusak ding a; ka bawl thil hing chiteng leitung a kipan ka hihmang ding,” achi hi. 5Noah in Toupa'n akiang a thu apiak tengteng ahi bangbang in ahihta hi.
6Leitung a tuichim ahong tun lai in, Noah kum zaguk a upa ahita hi. 7Tuichim atun ding ziak in long ah Noah alut a, atapate leh azi leh atapate' zite leng akiang ah alut chiat uhi. 8Sa siang lak ah leng, sa siang lou lak ah leng, vasa lak ah leng, leitung a bokvak a pai chiteng lak ah leng, 9Pathian in Noah kiang a thu apiak bang in, anu leh apa chiat, akopkop in, Noah kiang ah long ah alut uhi. 10Huan ni sagih nung in leitung ah tuichim atungta hi.
11Noah kum zaguk ahih kum, akha nihna, ani sawm-le-sagih ni in, huai ni mah in tui thuk zapi nak tengteng ahong puakzak a, van tohlette leng hong kihongta uhi. 12Ni sawmli leh zan sawmli sung teng leitung ah vuahpi azuta hi. 13Huai ni mah in long ah Noah leh Noah tapate Shem, Ham, Japheth leh Noah zi alut ua, atapate zi thumte leng akiang ah alut uhi. 14Amaute alut ua, sa chiteng amau chi omdan dungzui zel in, ganhing leitung a bokvak a pai chiteng amau chi omdan dungzui zel in, vasa chiteng, amau chi omdan dungzui zel in, vasa chiteng, kha nei chiteng leng alut uhi. 15Sa tengteng hinna hatna pai himhimte, akopkop in Noah kiang ah long ah alut uhi. 16Alutte Pathian in akiang a thu apiak bang in, sa tengteng lak a anu leh apa zel in alut uhi. Huchi in Toupa'n amah akhakkhumta hi.
17Leitung ah ni sawmli sung teng tuichim atung a; tui ahong khang a, long alam a, leitung ah adomkangta hi. 18Tui ahong om zuazua a, leitung ah akhan in ahong khang a, tui tung ah long akilam hi. 19Leitung ah tui nakpi in ahong om zuazua a; van nuai a tang sang tengtengte atum khin vekta hi. 20Tong sawm-le-nga hial a sang in tui ahong om a; tangte tupmang in a-omta uhi. 21Lei a tang thei sa chiteng, vasate, gante, gamsate, ganhing lei a bokvak a pai chitengte, michih tengte toh asi khin vek uhi. 22Anak ua hinna kha hatna omna tengteng, gam a om tengteng asi khin vek uhi. 23Leitung a thil hing chiteng omte, mite, gante, ganhingte, tung a leng vasate toh hihmang in a-om ua; lei a kipan hihman in a-omta ua, long sung a om Noah leh akiang a omte kia hawi in a-om uhi. 24Ni za-le-sawmnga sung teng leitung ah tui avung hi.
Actualmente seleccionado:
GENESIS 7: PAITBSI
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.