Matiu 7
7
Leeb buut bunu labaar
(Luk 6.37-38, 41-42)
1“I daa bu nirɔ buuti, ki Yennu mun kan bu i buuti, 2kimaan ya bu leeb buut biaŋinba na, nnee ki Yennu mun tan sa bu i buut; ki biaŋinba ki i bikii ki teen i leeb na, nnee ki Yennu mun sa bikin ki turi. 3Bee ki a gorii laat mɔɔnu nba be a lɔɔ ninbinn ni, ŋaan ki la jaantarik nba be a mɔŋ mɔŋ ninbinn ni na? 4Nlee ki a sa bet a lɔɔ a ‘Ŋaant ki n nyinn mɔɔnu nba be a ninbinn ni na,’ ŋaan ki jaantarike be a mɔŋ ninbinn ni. 5Fin kpinkpannii daanɔ na, nyint jaantarik nba be a ninbinn ni na sinsinn, ki ji fit la fanu ki nyinn mɔɔnu nba be a lɔɔ ninbinn ni na.
6“I daa jikit linba tee Yennu yar ki teen bɔi, kimaan bi sa ŋmat junta; i daa jikit linba mɔk nyɔɔt ki teen doorii, kimaan bi sa ŋmat ŋmat nan tante.
Yenmiaru po
(Luk 11.9-13)
7“Miat Yennu man, ki u sa turi; lomin man, ki i sa lawa; kpaan gann man, ki u sa loot ki turi, 8kimaan wunba kur mei Yennu gaane; ki wunba mun loon, u laate; ki wunba kpaan gann, ki bi lootir teenɔ. 9Ki yimm baanba, i ŋmee ki u bik sa miarɔ jeet ki wun jii tann ki turɔ? 10Amii ŋmee ki u bik sa miarɔ jaŋ ki wun jii waauk ki turɔ? 11Ki li-i tee ki yimm nba tee biitdamm na mi biaŋinba ki i sa tur i waas bonŋana, ki i Baa Yennu nba be sanpaapo na mantik sa tur binba meiɔ na bonŋana.
12“Biaŋinba ki a loon sɔɔ-ii tuun kii teena na, i mun-ii tuun nna kii teen a leeb; kimaan Yennu sennu nan u sɔkiniinba wannu na ni want nnee.
Tammɔyebik ni kɔɔnu labaar
(Luk 13.24)
13“Kɔɔn man tammɔyebik na ni; kimaan tammɔb nba kɔɔ muu nba kan mi kpeen na ni na yarin hei, ki li sɔnu bia man nan sommir; ki niib bonchianne kɔɔ tammɔb maŋ ni. 14Ki manfoor tammɔb na ŋanin tee bonyebike, ki li sɔnu bia paar nan sommir; ki niib waaminne kɔɔ tammɔb maŋ ni.
Tiik nan u lɔɔna
(Luk 6.43-44)
15“I mi man faak sɔkiniinba na po, binba baat i boor ni ki naan nan pei na, ŋaan tee kinkata nan barmɔnii na. 16Bi toona nie ki i sa bann ba tee binba; bi ki laat gaa kunkoŋ paak ki pɔɔ; ki bia ki laat kinkana pɔɔna paak ki pɔɔ. 17Ki tiŋaŋ kur mun loon lɔɔnŋanae; ki tibiiuk kur mun loon lɔɔnbiite. 18Tiŋaŋ kan lon lɔɔnbiiti; tibiiuk mun bia kan lon lɔɔnŋana. 19Tiik kur nba ki loon lɔɔnŋana, bi sa chɔɔre ki lur muu ni. 20Li paak, faak sɔkiniinba toona nie ki i sa bannib.
Yennu naan ni kɔɔnu labaar
(Luk 13.25-27)
21“Li ki tee binba yin ‘N Yomdaanɔ, n Yomdaanɔ’ na kur kaa tan sa kɔɔ Yennu naan ni, see binba sak n Baa Yennu nba be sanpaapo na mɔb. 22Daar maŋ daar-i taŋŋi baari, niib bonchianne tan sii yin ki yeen a ‘Ti Yomdaanɔ, ti Yomdaanɔ, ti din ki sɔkint Yennu maan a sann ni-ii? A sann nie ki ti din nyint narinbiit niib ni, a sann nie ki ti bia tuun bakitnauŋ toonjaana.’ 23Li yoo ki n mun tan sa jiin ki yetib a ‘N ki miini, yimm toonbiit damm na, seetir nna man!’
Tanmaara bannlee labaar
(Luk 6.47-49)
24“Li paak, wunba kur gbia n maan na ki waa-r fanu, n sa nannɔ nan yandaansɔɔ nba din maa u ŋaak tanpiiuk paak nee; 25ki saak tan baa, ki nyun gbee ki yat nan doo, ki wouŋ da, ki nyunpana koon ki liat ŋaak maŋ dikpina, ŋaan ki li lek see ken ken ki ki baa, kimaan u din maar tanpiiuk paake.
26“Wunba kur gbia n maan na, ŋaan yêt li weiu, n sa nannɔ nan jajatsɔɔ nba din maa u ŋaak tanbiinii nie; 27ki saak tan baa, ki nyun gbee ki yat nan doo, ki wouŋ da, ki nyunpana koon ki liat ŋaak maŋ dikpina, ki li bet baa wamm, ho, baa biiuk jiakii!”
Yisa Masia yikoo wannu po
28Yisa nba din pak mɔbona na ki gbenn yoonba, ki u wannu maŋ din bakit nibur na bonchiann, 29kimaan u wannib kaman nan daanɔ nba yen yikoo nee, ki ki wannib kaman nan sennu wannteeb nba wantib biaŋinba na.
Actualmente seleccionado:
Matiu 7: BIM
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión