San Lucas 23
23
^Ndataxi na Jesús ndaꞌa ra Pilato
1Ra saa ndakiꞌin takundiꞌi ndia chiñu kan Jesús ra kuaꞌan ra xiꞌin ndia nuu ra Pilato. 2Ra ta ndixaa ndia xiꞌin ra nuu ra chiñu chee Pilato kan, ra saa xaꞌa ndia taxi ndia kuachi siki xaꞌa ra, kachi ndia saa:
―Nduꞌu kuvi ndi ndaniꞌi tiaa yoꞌo ña xika ra sakanitaꞌan ra na ñuu ndi, ra kaꞌan ra, ña chäꞌvi ka ndi xuꞌun ña chaꞌvi ndi ndaꞌa ra tata chiñu César ñuu Roma. Ra kaꞌan tu ra ña kuu ra Cristo, ra kúu tu ra rey va, kachi ra ―kachi ndia.
3Ra saa ndindakatuꞌun ra Pilato Jesús, kachi ra saa:
―¿A ndixa rey na judío kuvi yoꞌo? ―kachi ra.
Saa ndakuiin Jesús, kachi ra saa xiꞌin ra:
―Ta iyoo ña ndikaꞌan kun, saa iyoo va ña ―kachi ra.
4Ra saa ndikaꞌan ra Pilato xiꞌin ndia sutu kunaꞌnu nuu ndia sutu, xiꞌin takundiꞌi ka yuvi kan, kachi ra saa:
―Köo ndia nii kuachi tiaa yoꞌo ndaniꞌi yu ―kachi ra.
5Ndi su ndia kan ra iin tuun tuun va kaꞌan ndia, kachi ndia saa:
―Ra ñaa, ra xa iinii saa va ñuu ke xika ra sakanitaꞌan yuvi. Ra ndia Galilea ke kee ra xika ra sañaꞌa ra yuvi, ra iin saa xaa ra ndia Judea yoꞌo va ―kachi ndia.
Ndiaka na Jesús kuaꞌan ra nuu ra Herodes
6Ra te xini soꞌo ra Pilato ña kachi ndia saa xaꞌa Jesús, ra saa ndindakatuꞌun ra ndia, kachi ra saa:
―¿A ra Galilea kuvi ra? ―kachi ra.
7Ra ta ndikaꞌan ndia xiꞌin ra ña suvi ra, ndia saa ra ndatiꞌvi ra Jesús kuaꞌan ra ndaꞌa ra Herodes, chi ra kan kuvi ra kuu rey xaꞌndia chiñu chi Galilea. Ra ndixiin tu ra ñuu Jerusalén va kii kuu saa kan. 8Ra ta xini ra Herodes ña ndixaa na xiꞌin Jesús nuu ra, ra kusii ni ini ra; saa chi xa yachi ni vi ke kuni ra ña kuni ra Jesús, saa chi xa ndatuꞌun va na xaꞌa Jesús, ña xa ra kuaꞌa ni ña ndichi, ra xaꞌa ña kan ke kuni ra Herodes ña na sa Jesús iin ña xituꞌun, kuni ra. 9Ña kan ke tiaa ni kuaꞌa nuu ña nindakatuꞌun ra Herodes Jesús. Ndi su ndia nii tuꞌun nindäkuiin Jesús yuꞌu ra. 10Ra ndia kunaꞌnu nuu ndia sutu, xiꞌin ndia maestro sañaꞌa ndiayu Ndioxi, ra iin tutuun va ndita ndia ña chikaa ndia kuachi siki sata Jesús. 11Saa xaꞌa ra Herodes, xiꞌin ndia soldado ra ña kañaꞌa ni ndia xiꞌin Jesús, ra xa siki ni ndia ra, ra sandakundixi ndia ra iin tikoto vaꞌa ña ndixi mii na rey, ra sandiko tuku ra Herodes kan Jesús kuaꞌan ra nuu ra Pilato. 12Ra mii kii kan ndakutaꞌan mani ra Herodes xiꞌin ra Pilato, saa chi yachi ra kuachi va ndixiyo ndia.
Nditiaꞌndia chiñu ña kuvi Jesús
13Saa sandakitaꞌan ra Pilato kan, ndia sutu kunaꞌnu nuu ndia sutu, xiꞌin ndia chiñu kunaꞌnu, xiꞌin takundiꞌi na ñuu. 14Ra ndikaꞌan ra xiꞌin na, kachi ra saa:
―Ndoꞌo kuvi na ndiaka tiaa yoꞌo xaa ra xiꞌin ndo nuu yu, ña taxi ndo kuachi xaꞌa ra, ña xika ra sakanitaꞌan ra na ñuu, kachi ndo, ra nuu ndo saa sanaꞌma yu ra, ndi su ndia nii kuachi ña taxi ndo xaꞌa ra köo nindaniꞌi yu. 15Ra nii ra Herodes nindanïꞌi kuachi ra, ña kan ke sandiko tuku ra ra xaa ra nuu yu vichin. Ra nii yuꞌu kuvi ra ndanïꞌi kuachi ra, ña kuvi ra xaꞌa ña. 16Ña kan ke na taxi yu ndiayu, ña kani ndia soldado ra xiꞌin ñii ña kuu kuarta, ña sandoꞌo ndia ra. Ra te ndiꞌi, saa na saña ndika ra kuꞌun va ra ―kachi ra.
17Chi xa saa yunaꞌa va ra chiñu chee Pilato kan ña saña ndika ra iin na ndikaa veꞌe kàà viko pascua ta kuiya ta kuiya. 18Ndi su ndia nii yuvi kan, ndixïin ña saña Jesús kuꞌun ra, chi na ndiee ka xaꞌa ndikaꞌan va kuvi na, kachi na saa:
―¡Tava ra ñaa chi keꞌe ña kuꞌun ra kuvi ra, ra na saña ndika kun ra Barrabás va! ―kachi na.
19Ra ra Barrabás kan, ra xaꞌa ña xaꞌni ra ndii, xiꞌin xaꞌa ña kanitaꞌan ra xiꞌin na chiñu va ke ndikaa ra veꞌe kàà. 20Ra kuni va ra Pilato saña ndika ra Jesús, ña kan ke ndikaꞌan tuku ra xiꞌin yuvi kan. 21Ndi su na ndiee ka xaꞌa nindaꞌyu va kuvi na, ra iin tuku tuku kaꞌan na kachi na saa:
―¡Na kutakaa ra ndaꞌa cruz, na kutakaa ra ndaꞌa cruz! ―kachi na.
22Ra saa ndikaꞌan tuku ra Pilato kan xiꞌin na ichi ña uni, kachi ra saa:
―¿Ndia ña kuu kuachi tiaa yoꞌo tuvi ndo? Chi ndia nii kuachi ra köo ndaniꞌi yu ña kuvi ra xaꞌa ña; ña kan ke takua na sandoꞌo va yu ra, ra saa saña ndika yu ra kuꞌun va ra ―kachi ra.
23Ndi su yuvi kan, ra na ndiee ka ndikaꞌan va kuvi na, ña kuni na ña na kuꞌun Jesús kutakaa ra ndaꞌa cruz. Ra xaꞌa ña ndiee ni sandiꞌi yuvi kan, xiꞌin ña ndikaꞌan ni ndia kunaꞌnu nuu ndia sutu va ke ndixinu va ña kuni na sa na. 24Ndia saa ra xa ra Pilato ña kuni va na. 25Ra saa saña ndika va ra Pilato, ra Barrabás, ra ndikaa veꞌe kàà xaꞌa ña xaꞌni ra ndii, xiꞌin xaꞌa ña kanitaꞌan ra xiꞌin na chiñu, ra ndataxi ra Jesús ndaꞌa na ña sa na ña kuni mii na xiꞌin va ra.
Ndiaka na Jesús kuaꞌan ra kutakaa ra ndaꞌa cruz
26Ra saa ndakundiaka ndia soldado kan Jesús kuaꞌan ra xiꞌin ndia ña katakaa ndia ra ra ndaꞌa cruz, ra ichi kan ndakutaꞌan na xiꞌin iin tiaa ra nani Simón, ra chi iku va ke kee tiaa kan vaxi ndixi ra ñuu Jerusalén, ra ra ñuu Cirene va kuvi ra. Ra saa sakuiso nduxa na cruz tun kasoko Jesús ra, ra ndakundikun ra sata Jesús kuaꞌan ra xiꞌin na.
27Ra kuaꞌa ka vi na ñuu kan ndikun kuaꞌan sata Jesús, ra kuaꞌan kuaꞌa tu na siꞌi va, ra tiaa ni xaku na, ra iin kani na ndika na xaꞌa ña kusuchi ni ini na xaꞌa Jesús. 28Ra saa ndakotoꞌni Jesús nuu na siꞌi kan, ra ndikaꞌan ra xiꞌin na, kachi ra saa:
―Ndoꞌo, na siꞌi ñuu Jerusalén, xäku ndo xaꞌa yuꞌu, chi na kuaku ndo xaꞌa mii ndo, xiꞌin xaꞌa seꞌe va ndo. 29Saa chi vaxi kii ra kaꞌan na ñuu yoꞌo, kachi na saa: “Vaꞌa ni ^kee na siꞌi numa, ra saa tu na siꞌi na ndikäku seꞌe va, saa chi köo na vali sachichin na ña sakuaꞌnu na na” ―kachi na. 30Ra saa xaꞌa na kaꞌan na xiꞌin xiki naꞌnu, kachi na saa: “Koyo ndo sata ndi”; ra kaꞌan tu na xiꞌin koꞌndo vali va kachi na: “Ndasi ndo sata ndi”, kachi na. 31Saa chi tu suꞌva xa na xiꞌin itun kuii, saa ra ndiee ka va sa na xiꞌin itun ichi ―kachi Jesús xiꞌin na siꞌi ñuu Jerusalén.
32Ra ndiaka tu ndia soldado kan, uvi tiaa ndia iyoo ni kuachi va ña kuaꞌan ndia kuvi ndia xiꞌin Jesús. 33Ra ta ndixaa na iku ña nani Leke Xini Ndìì, ra ikan katakaa ndia soldado kan Jesús ndaꞌa cruz, ra katakaa tu ndia tiaa ndia iyoo ni kuachi va, ra iin ra katakaa ndia ndaꞌa cruz tu ndichi chi xiin kuaꞌa Jesús, ra inka ra katakaa ndia ndaꞌa cruz tu ndichi chi xiin ichin va ra. 34Ra saa ndikaꞌan Jesús xiꞌin Ndioxi, kachi ra saa:
―Tata, sakaꞌnu ini xaꞌa kuachi na, saa chi kundäa ini na ni ke xa vi na ―kachi ra.
Ra saa keꞌe taꞌan ndia soldado kan, ña vaꞌa kundaa ini ndia yoo ku ndia ndakiꞌin tikoto Jesús. 35Ra xitoꞌni takundiꞌi yuvi na ndixaa kan ndita na, ra ndia ndia chiñu kan va ^xa siki Jesús, kachi ndia saa:
―Vaꞌa va sakaku ra inka yuvi, ra na sakaku tu ra mii ra vichin va tu ndixa ke kuu ra Cristo, ra ndikaxin Ndioxi ―*kachi na.
36Ra xasiki ni tu ndia soldado kan va Jesús, ra taxi ndia ndutia iyá koꞌo ra, 37ra ndikaꞌan ndia xiꞌin ra, kachi ndia saa:
―Tu ndixa rey na judío kuvi kun, ra sakaku mii kun vichin ―kachi ndia.
38Ra tiaa na nuu iin vitu loꞌo, ra chinuu ndiaa na nu xini cruz tu takaa Jesús ndaꞌa, ra kaꞌan tuꞌun kan kachi ña saa: “Ra yoꞌo kuvi rey na Israel”, kachi ña, ra uni nuu tuꞌun ke tiaa na, tuꞌun griego, xiꞌin tuꞌun latin, xiꞌin tuꞌun hebreo.
39Ra saa xaꞌa iin ra iyoo ni kuachi, ra takaa ndaꞌa cruz kan, kañaꞌa ra xiꞌin Jesús, kachi ra saa xiꞌin ra:
―Tu ndixa yoꞌo kuvi Cristo, saa ra sakaku mii kun, ra sakaku kun nduꞌu vichin ―*kachi ra.
40Saa ndukueꞌe ra iyoo kuachi taꞌan ra xiꞌin ra, kachi ra saa:
―¿Nichuun kuayüꞌvi kun Ndioxi? Ra xa kundaa kaxi ini kun chi yo kuvi ku uni saa va yo vichin. 41Ra vaꞌa va yoo chi xaꞌa kuachi va yo ke ndoꞌo yo ña yoꞌo, ndi su ra yoꞌo, ra ndia nii kuachi köo ndixa ra ―kachi ra.
42Ra saa ndikaꞌan ra xiꞌin Jesús, kachi ra saa:
―Tata, ta xa na ndakiꞌin kun ña kaꞌndia kun chiñu, ra na ndakaꞌan kun xaꞌa yu ―kachi ra.
43Saa ndakuiin Jesús, kachi ra saa xiꞌin ra:
―Ña ndixa kaꞌan yu xiꞌin kun, chi mii kii vichin koo kun xiꞌin yu nuu nduvi ni kaa ―kachi ra.
Ndixiꞌi Jesús
44Ra ta xa kuu ña kaa uxi uvi kaꞌñu, saa ra kuñaa nuu iinii saa nuu ña yuuvi yoꞌo, ra iin saa ndia ka uni xikuaa. 45Ñuꞌù, ra iin nundiaa ni va ña, ra nindata sava maꞌñu tikoto ña takaa ini veꞌe ñuꞌu kaꞌnu ñuu Jerusalén. 46Ra saa ndiee ka vi nindaꞌyu Jesús, kachi ra saa:
―¡Tata, ndaꞌa mii kun ndataxi yu nima yu! ―kachi ra xiꞌin Ndioxi.
Ra ndia tuꞌun yoꞌo ndikaꞌan ra, saa ra ndixiꞌi va ra.
47Ra ta xini ra kuchee nuu ndia soldado ñuu Roma ña kuu, ra saa ndasakaꞌnu ra Ndioxi, kachi ra saa:
―Ña ndixa ke, ra vaꞌa ku ndixa va tiaa yoꞌo ―kachi ra.
48Ra takundiꞌi yuvi na ndixaa nuu katakaa na Jesús ndaꞌa cruz, ra ta xini na ña ndoꞌo ra, ra saa nandiko na kuanuꞌu na, ra iin kani ndaꞌa na ndika na kuaꞌan na, ña kusuchi ni ini na. 49Ndi su takundiꞌi na itaꞌan mani xiꞌin Jesús, ra xika va xikundita na xitoꞌni na ña ndoꞌo ra, ra ndita tu na siꞌi na ndikun kuaꞌan xiꞌin ra ndia ta kee ra chi Galilea va.
Ndinduxin na Jesús
50Ra ñuu kan, xikanduꞌu iin tiaa ra nani José, ra ra ñuu Arimatea ña ndikun ndiaa Judea kuvi ra, ra iin tiaa ra toꞌo, ra vaꞌa ni kuvi ra, ra ndiaꞌvi ndiaa tu ra xiꞌin na kunaꞌnu kan va. 51Ndi su ndixïyo vi yuꞌu ra xiꞌin na, xaꞌa ña xa na xiꞌin Jesús. Saa chi xindiatu tu ra kan va ña xaꞌa Ndioxi kaꞌndia ra chiñu nuu na yuuvi yoꞌo. 52Ra ra kan kuvi ra ndixaꞌan nuu ra Pilato, ña nduku ra ndiayu ña sanuu ra iki kuñu Jesús ña nduxin ra ña. 53Ra saa kee ra ndixaꞌan ra sanuu ra Jesús ndaꞌa cruz, ra ndasuvi ra ra iin tikoto ña vaꞌa ni, ra saa ndixaꞌan ra chikaa ra ra ini iin yavi ña kaan ra ndika kava ta yachi, ra yavi kan ra ña xaa vaꞌa va kuvi ña. 54Ra xikuaa kii viernes te xaꞌa na ñuu Israel xa nduvi na ndakindiee na kii yii sábado ke kuu ña.
55Ra takundiꞌi na siꞌi na ndikun sata Jesús ta kee ra ndia chi Galilea, ra ndikun na sata ra José ndixaꞌan na xini na ndia nuu chikaa ra iku kuñu Jesús. 56Ra ta ndiꞌi, saa nandiko na siꞌi kan ndaxaa na chi veꞌe, ra saa xavii na ndutia xaꞌan tami, xiꞌin tatan ña xaꞌan tami, ña chikaa na sata iki kuñu Jesús. Ra ndakindiee̱ va na kii yii sábado, xa ta kuꞌva kachi mii ndiayu Ndioxi ña ndakoo ra Moisés va.
Actualmente seleccionado:
San Lucas 23: mxvNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2017, Wycliffe Bible Translators, Inc. All rights reserved