San Lucas 22
22
Kataꞌan na ndia kuꞌva ke sa na ña vaꞌa kuchuun na kaꞌni na Jesús
1Ra ta xa kuaꞌan kuyachin ni ña koo viko pascua, ta xixi na xita vaꞌa ña köo ndavi xiꞌin, 2ra saa xaꞌa ndia xikuaꞌa kunaꞌnu nuu ndia sutu, xiꞌin ndia maestro sañaꞌa ndiayu Ndioxi, ña xika ndia nduku ndia ndia kuꞌva ke sa ndia ña vaꞌa kaꞌni seꞌe ndia Jesús, saa chi iyuꞌvi ni va ndia nuu na ñuu.
3Ra saa ndikiꞌvi ti ndivaꞌa ini ra Judas, ra nani tu ra Iscariote va, ra ra yoꞌo kuvi iin ra itaꞌan xiꞌin ndia itaꞌan xiꞌin Jesús ña kuu ndia uxi uvi. 4Saa ndakiꞌin ra Judas kan ndixaꞌan ra nuu ndia kunaꞌnu nuu ndia sutu, xiꞌin nuu ndia kunaꞌnu nuu ndia kumisio ndiaa veꞌe ñuꞌu kaꞌnu, ra ndikataꞌan ra xiꞌin ndia, ndia kuꞌva ke sa ra ña vaꞌa ndataxi ra Jesús ndaꞌa ndia. 5Saa ra tiaa ni kusii ini ndia, ra kindoo ndia xiꞌin ra ña chaꞌvi ndia ra. 6Ra kindoo tu ini mii va ra ña ndikaꞌan ndia xiꞌin ra, ra saa xaꞌa ra xika nduku ra ndia kuꞌva ke sa ra ña vaꞌa ndataxi seꞌe ra Jesús ndaꞌa ndia, kaꞌan ra.
Xixini Jesús xiꞌin ndia itaꞌan xiꞌin ra
7Ra ta nditiandiaa kii ña kuxi na xita vaꞌa ña köo ndavi xiꞌin, ra soko tu na iin ndikachi loꞌo xaꞌa ña ndakaꞌan na ña sakaku Ndioxi na, 8ra saa ndikaꞌan Jesús xiꞌin ra Pedro, xiꞌin ra Juan, kachi ra saa:
―Kuaꞌan ndo, ra savii ndo ña kuxini yo viko pascua vichin ―kachi ra.
9Saa ndindakatuꞌun ndia ra, kachi ndia saa:
―¿Ndia mii ke kuni kun kuꞌun ndi savii ndi ña kuxini yo Tata? ―kachi ndia.
10Ra saa ndakuiin Jesús, kachi ra saa xiꞌin ndia:
―Kuaꞌan ndo chi ñuu, ra te ndikiꞌvi ndo ñuu kan kuaꞌan ndo ra ikan ndakutaꞌan ndo xiꞌin iin tiaa ra kasoko ra yoo tiakuii kuaꞌan ra. Ra kundikun ndo sata ra kuꞌun ndo ndia mii veꞌe nuu xaa ra kiꞌvi ra. 11Ra ikan kaꞌan ndo xiꞌin mii ra tata xiꞌin veꞌe kan, kachi ndo saa: “Ra Tata Maestro kuvi ra kachi suꞌva: ¿Ndia mii ke íin veꞌe nuu koo yu kuxini yu xiꞌin ndia itaꞌan xiꞌin yu viko pascua vichin?, kachi ra”, kachi ndo xiꞌin ra. 12Ra saa ñaꞌa ra iin veꞌe chee ña piso ninu nuu ndo, ra iyoo nduvi ndiꞌi va ini ña; ra ikan ke na savii ndo ña kuxini yo ―kachi ra.
13Ra saa ndakiꞌin ndia kuaꞌan ndia, ra iin ta iyoo ña ndikaꞌan Jesús xiꞌin ndia, ra iin saa ndixa ke iyoo ña kuu va, ra ikan xanduvi ndiꞌi ndia chiñu ña ndikaꞌan Jesús xiꞌin ndia sa ndia.
14Ra ta nditandiaa hora ña kuxini ndia, ra saa xaa Jesús xiꞌin ndia itaꞌan xiꞌin ra, ra ndakundee ndia nuu mesa ña kuxi ndia. 15Ra saa ndikaꞌan Jesús xiꞌin ndia, kachi ra saa:
―Tiaa ni xa kuni yu, ña kuxini yu xiꞌin ndo viko pascua yoꞌo vichin, ña kumani ndoꞌo ni yu, ra kuvi yu. 16Ra na kundaa ini ndo ña kaꞌan yu xiꞌin ndo yoꞌo, chi takundiꞌi ka viko pascua ña vaxi ra köo ka yu ña kuxini yu xiꞌin ndo. Saa chi ndia na xinu kii ña kaꞌndia Ndioxi chiñu vi ke kuxini tuku yu xiꞌin ndo ―kachi ra.
17Ra saa tiin ra copa ña ñuꞌu vino, ra taxi ra taxaꞌvi ndaꞌa Ndioxi, ra ndikaꞌan ra xiꞌin ndia, kachi ra saa:
―Kiꞌin ndo ra yoꞌo, ra loloꞌo na koꞌo takundiꞌi ndo. 18Ra ña ndaa kaꞌan yu xiꞌin ndo vichin, chi nandïko ka yu ña koꞌo yu nduxi uva yoꞌo xiꞌin ndo, saa chi ndia te na tandiaa kii ña kaꞌndia Ndioxi chiñu vi ke koꞌo tuku yu ra xiꞌin ndo ―kachi ra xiꞌin ndia.
19Ra saa kiꞌin ra xita vaꞌa ra taxi ra tixaꞌvi ndaꞌa Ndioxi xaꞌa ña, ra saa taꞌvi ra ña taxi ra ndaꞌa ndia, ra ndikaꞌan ra xiꞌin ndia, kachi ra saa:
―Ña yoꞌo ku iki kuñu yu, ña ndataxi yu xaꞌa ndo vichin. Ra iin takundiꞌi ichi na sa ndo ña yoꞌo ña ndakaꞌan ndo xaꞌa yu ―kachi ra.
20Ra te sandiꞌi ndia xixini ndia, ra saa kiꞌin tuku ra copa ña ñuꞌu vino, ra ndikaꞌan ra xiꞌin ndia kachi ra saa:
―Vino yoꞌo ku iin trato xaa ña kindoo yu xiꞌin ndo vichin, chi ra yoꞌo ku nii yu ña kutia xaꞌa kuachi takundiꞌi ndo.
21’Ra vichin na kundaa ini ndo, chi iin ra nduꞌu nuu mesa xiꞌin va yu kuvi ra ndataxi yuꞌu ndaꞌa na saa ini xini yuꞌu. 22Ra ña ndixa ke xiniñuꞌu ndoꞌo ni va yuꞌu, ra xaa yoꞌo vichin, saa chi xa saa kuni mii Ndioxi ña ndoꞌo va yu, ndi su ¡ndaꞌvi ni tiaa ra ndataxi yuꞌu ndaꞌa na saa ini xini yuꞌu! ―kachi ra xiꞌin ndia.
23Ra saa xaꞌa ndia ndakatuꞌun taꞌan ndia, ña kuni ndia kundaa ini ndia, yoo ku iin ndia ndataxi Jesús ndaꞌa na saa ini.
Xa kuachi ndia itaꞌan xiꞌin Jesús xaꞌa iin ra kuchee kaꞌndia chiñu nuu ndia
24Saa kuu, ra xaꞌa ndia itaꞌan xiꞌin Jesús xa kuachi ndia xiꞌin taꞌan ndia, ña kuni ndia ña iin mii ndia na kuu ra kuchee kaꞌndia chiñu nuu mii ndia. 25Saa ndikaꞌan Jesús xiꞌin ndia, kachi ra saa:
―Na kundaa ini ndo, chi na chiñu iyoo nuu ña yuuvi yoꞌo, ra xa nduxa na xiꞌin yuvi ña na sa na chiñu, ra ndiakua xiꞌin ndiayu mii na ke kuu ndiꞌi va chiñu ña kuni na. Ra na kuu mii iin chiñu chee, ra xinisii ni na ña kaꞌan vaꞌa yuvi xaꞌa na. 26Ndi su ndoꞌo, ra süvi saa ke koo ndo, chi xa siin va ke koo xiꞌin ndoꞌo. Saa chi iin ra kuni kuchee nuu ndo ra ta iyoo iin ra loꞌo va ke na koo ra, ra ra xaꞌndia chiñu nuu ndo, ra ta xa iin na chuꞌun ndaꞌa va ke na sa ra.
27’Ra vichin kuni yu ndakatuꞌun yu ndoꞌo, ra na kaꞌan ndo xiꞌin yu, ¿yoo ku na chee vaꞌa ka tuvi ndo, a na ndee nuu mesa, a na chuꞌun ndaꞌa va? ¿A su na nduꞌu nuu mesa va kuvi na chee? Ra na kundaa ini ndo, chi yuꞌu ra kuu maestro ndo, ra ta iyoo iin ra chuꞌun ndaꞌa va ke iyoo yu nuu ndo vichin.
28’Ra ndoꞌo kuvi ndo xitaꞌan tuun xiꞌin yu ña ndoꞌo yu tundoꞌo ña uꞌvi va. 29Ra xaꞌa ña kan ke ^taxi va yu ña kaꞌndia ndo chiñu, ta kuꞌva xa Tata yu ña taxi ra ña xaꞌndia yu chiñu. 30Ra ndoꞌo kuvi ndo kuxi ra koꞌo ndo nuu kaꞌndia yu chiñu. Ra kundee ndo tiayu naꞌnu ña sandaku ndo kuachi xiꞌin uxi uvi saa na seꞌe xikua na ñuu Israel ―kachi Jesús xiꞌin ndia.
Kaꞌan Jesús ña tiseꞌe tuꞌun ra Pedro xaꞌa ra
31Ra saa ndikaꞌan tu Jesús xiꞌin ra Pedro va, kachi ra saa:
―Simón, Simón, na kundaa ini kun chi xa nduku va timiaꞌa ndiayu xaꞌa ndo ña kotondoso ri ndoꞌo. Ra iin ta kuꞌva xa na ña ndativi na nuni trigo, ke sa ri xiꞌin ndo kuni ri. 32Ndi su xa ndikaꞌan va yu xiꞌin Ndioxi xaꞌa kun, ña na kandixa ni ka kun yuꞌu, ra ta xa na nandiko tuku kun nuu yu, ra na chindiee taꞌan kun xiꞌin ndia ñani kun, ña ndinuni ni ka na kandixa ndia yuꞌu ―kachi ra xiꞌin ra.
33Saa ndakuiin ra Simón, kachi ra saa xiꞌin ra:
―Tata, yuꞌu ra xa iyoo nduvi va yu, nii veꞌe kàà na kuꞌun yu xiꞌin va kun, ra nii na kuvi tu yu xiꞌin va kun chi nandïko ini yu ―kachi ra.
34Ra saa ndikaꞌan Jesús xiꞌin ra, kachi ra saa:
―Na kaꞌan yu xiꞌin kun ra kundaa ini kun, chi vichin ra xa uni va ichi tiseꞌe tuꞌun kun xaꞌa yu, ña xïni kun yuꞌu kachi kun, ra saa kana chele ―kachi ra.
Xa kuyachin tundoꞌo nuu Jesús
35Ra saa ndindakatuꞌun Jesús ndia itaꞌan xiꞌin ra kachi ra saa:
―Ta tiꞌvi yu ndoꞌo ndixaꞌan ndo ndikaꞌan ndoso ndo tuꞌun Ndioxi, ta ndixinïꞌi ndo leka, ra nii xuꞌun ndixinïꞌi ndo, ra nii ndixan ndixinïꞌi ka ndo kuꞌun xiꞌin ndo kuꞌun xaꞌa ndo, ¿ra a ndia ñaꞌa kumani nuu ndo? ―kachi ra.
Ra saa ndakuiin ndia, kachi ndia saa:
―Ndia nii ñaꞌa ndikumäni nuu ndi, Tata ―kachi ndia.
36Ra saa ndikaꞌan Jesús xiꞌin ndia, kachi ra saa:
―Xa siin va koo vichin, chi ndoꞌo, ndia iyoo leka, ra na kaniꞌi va ndo ña, ra ndoꞌo, ndia niꞌi xuꞌun, ra kaniꞌi va ndo ña, ra ndoꞌo, ndia köo ichi niꞌi, ra na xiko ndo tikoto ña isukun ndo, ra sata ndo iin ichi ña kaniꞌi ndo. 37Ra kaꞌan yu ña yoꞌo xiꞌin ndo, chi vichin ke xiniñuꞌu xinu nuu tuꞌun Ndioxi ña tiaa na xaꞌa yu xinaꞌa ña ndakani kachi suꞌva: “Ra tiꞌvi Ndioxi xaa, ra xiꞌin yuvi na iyoo kuachi va ndachutaꞌan na ra”, kachi ña. Ra takundiꞌi tuꞌun ña ndakani xaꞌa yu, ra ña xaa yu vichin ke xinu nuu va ña ―kachi ra.
38Ra saa ndikaꞌan ndia xiꞌin ra, kachi ndia saa:
―Tata, xa yoꞌo va iyoo uvi ichi ―kachi ndia.
Ra saa ndakuiin Jesús, kachi ra saa:
―Xa vaꞌa; na käꞌan ka yo xaꞌa ña yoꞌo ―kachi ra xiꞌin ndia.
Kuaꞌan Jesús kaꞌan ra xiꞌin Ndioxi iin nuu nani Getsemaní
39Ra saa kita Jesús ini veꞌe kan, ra ndakiꞌin ra kuaꞌan ra iku Olivo kaꞌan ra xiꞌin Ndioxi, chi xa saa yunaꞌa va ra. Ra ndakundikun tu ndia itaꞌan xiꞌin va ra kuaꞌan ndia sata ra. 40Ra te ndixaa ndia kan, ra saa ndikaꞌan ra xiꞌin ndia, kachi ra saa:
―Kaꞌan ndo xiꞌin Ndioxi ña na chindiee taꞌan ra xiꞌin ndo, ña vaꞌa na köyo ndo ndaꞌa ña kuni kotondoso ndoꞌo ―kachi ra.
41Ra saa kuxika ra iin viviꞌi nuu ndia, ra iin ta kuꞌva ña sakoꞌni na yuu ke kuxika ra; ra ikan xikusiti ra, ra xaꞌa ra kaꞌan ra xiꞌin Ndioxi, 42kachi ra saa:
―Tata, tu kuni kun, ra na täxi kun ña ndoꞌo yu. Ndi su na köo ña kuni yuꞌu, chi na sa kun ña kuni mii va va kun ―^kachi ra.
43Ra saa xaa iin ra tatun Ndioxi ra kee ndivi, ña taxi ra ndiee ndaꞌa Jesús. 44Ra saa kusuchi ka vi ini ra, ra saa ndakundiee ni ka ra ndikaꞌan ra xiꞌin Ndioxi, ra saa xaꞌa koyo tiatiin ra nuu ñuꞌu, ra iin ta iin tinaꞌnu nii saa íin ra.
45Ra ta sandiꞌi ra ndikaꞌan ra xiꞌin Ndioxi, ra saa nandiko ra xaa ra nuu ndee ndia itaꞌan xiꞌin ra, ra xa ndia kixi va kuvi ndia ndee ndia xaꞌa ña kusuchi ni ini ndia. 46Ra saa ndikaꞌan ra xiꞌin ndia, kachi ra saa:
―¿Nichuun kixi ni ndo? Ndakoo ndo ra kaꞌan ndo xiꞌin Ndioxi ña na chindiee taꞌan ra xiꞌin ndo, ña vaꞌa na köyo ndo ndaꞌa ña kuni kotondoso ndoꞌo ―kachi ra.
Tiin na Jesús kuaꞌan ra xiꞌin na
47Ra sakan saa kuu Jesús kaꞌan ra xiꞌin ndia itaꞌan xiꞌin ra, saa ra xa ndixaa va iin tiaꞌndia chee yuvi nuu ndee ndia. Ra ra Judas ra itaꞌan xiꞌin ndia itaꞌan xiꞌin Jesús ña kuu ndia uxi uvi kuvi ra inuu nuu yuvi kan ndixaa na, ra saa kuyachin ra Judas ra nditandiaa yuꞌu ra nuu Jesús ña kaꞌan ndioxi ra xiꞌin ra iyoo tuꞌun. 48Ra saa ndikaꞌan Jesús xiꞌin ra Judas, kachi ra saa:
―¿A suꞌva va ke xa kun ña ndataxi kun yuꞌu ndaꞌa na saa ini xini yuꞌu? ―kachi ra.
49Ra saa xitoꞌni ndia itaꞌan xiꞌin Jesús ndita ndia, ra kundaa va ini ndia ña ^ndoꞌo ra, ra saa ndindakatuꞌun ndia ra kachi ndia saa:
―Tata, ¿a kuni kun tu na kanitaꞌan ndi xiꞌin na, xiꞌin ichi ña niꞌi ndi? ―kachi ndia.
50Saa ra ndikun xaꞌndia va iin ra itaꞌan xiꞌin ndia soꞌo kuaꞌa iin tiaa ra xachiñu nuu sutu ra kuchee nuu takundiꞌi sutu. 51Ra saa ndikaꞌan Jesús xiꞌin ra, kachi ra saa:
―Xa vaꞌa, na koo na saa ―kachi ra.
Ra saa nditiandiaa ndaꞌa Jesús soꞌo tiaa kan, ra sandaꞌa va ra ña. 52Ra te ndiꞌi, ra saa ndikaꞌan tu ra xiꞌin ndia kunaꞌnu nuu ndia sutu, xiꞌin ndia kunaꞌnu nuu ndia kumisio ndiaa veꞌe ñuꞌu kaꞌnu, xiꞌin ndia xikuaꞌa kunaꞌnu nuu na ñuu, na ndixaa tiin ñaꞌa, ña kuꞌun ra xiꞌin ndia, kachi ra saa:
―¿A ra kuiꞌna va kuvi yu tuvi ndo? ¿Nichuun xaa ndo xiꞌin ichi, xiꞌin itun ña tiin ndo yuꞌu? 53A su iin takundiꞌi va kii ndixiyo yu xiꞌin ndo ini veꞌe ñuꞌu kaꞌnu, ra nditïin ndo yuꞌu. Ndi su vichin ke xa ndixaa hora ña sa ndo ña kuni va ndo, saa chi vichin ke kaꞌndia ña ndivaꞌa chiñu va ―kachi Jesús xiꞌin ndia.
Tiseꞌe tuꞌun ra Pedro xaꞌa Jesús
54Ra saa tiin na Jesús, ra ndakiꞌin na kuaꞌan na xiꞌin ra chi veꞌe ra sutu kuchee. Ra saa xika xika ndikun ra Pedro kuaꞌan ra sata na. 55Ra te ndixaa na veꞌe ra sutu kuchee kan, saa chikaa na ñuꞌu nuu keꞌe ra, ra iin xinunduu na ndee na ndasaa na, ra tiañu yuvi kan ndakunduꞌu taꞌan va ra Pedro ndasaa ra xiꞌin na. 56Ra saa kuu ra Pedro nduꞌu ra ndasaa ra xiꞌin na. Ra xini va iin ñaꞌa ña xachiñu nuu ra sutu kan ra, ra saa ndikaꞌan ña, kachi ña saa:
―Ra itaꞌan xiꞌin Jesús kuvi tu ra yoꞌo va ―kachi ña.
57Saa ndakuiin ra Pedro, kachi ra saa xiꞌin ña:
―Ndïxa, xïni yu ra kaꞌan kun xaꞌa ―kachi ra.
58Ra saa ndiyaꞌa iin kani loꞌo, ra tuku va tiaa ndakuni ra Pedro, ra ndikaꞌan ra xiꞌin ra, kachi ra saa:
―Ra itaꞌan xiꞌin Jesús kuvi tu yoꞌo va ―kachi ra.
Ra saa ndakuiin ra Pedro, kachi ra saa:
―Yoꞌo, ra kaꞌan ñaa, ndïxa. Süvi yu ―kachi ra.
59Ra saa ndiyaꞌa kuꞌva iin hora, ra tuku va tiaa ndikaꞌan xiꞌin ra, kachi ra saa:
―Ña ndixa ke, ra itaꞌan xiꞌin Jesús kuvi tu ra yoꞌo va, chi ra kee Galilea kuvi ra ―kachi ra.
60Saa ndikaꞌan ra Pedro xiꞌin ra, kachi ra saa:
―Yoꞌo, ra kaꞌan ñaa, kundäa ini yu yoo xaꞌa ke kaꞌan kun ―kachi ra.
Ra sakan saa kuu ra kaꞌan ra, saa ra kana va chele. 61Ra saa ndikokuiin Jesús ndakotoꞌni ra nuu ra Pedro, ra saa vi ke ndakaꞌan ra Pedro xaꞌa tuꞌun ña ndikaꞌan Jesús xiꞌin ra, ta kachi ra suꞌva: “Ñuu vichin ra xa uni va ichi tiseꞌe tuꞌun kun xaꞌa yu, ra saa kana chele”, kachi ra. 62Ndia saa ra kanata ra Pedro chi keꞌe, ra xaꞌa ra xaku ni ra.
Xa siki ni na Jesús
63Ra saa xaꞌa ndia soldado, ndia ndiaa Jesús ña ^xa siki ndia ra, ra kani ni ndia ra. 64Ra ndasi ndia nuu ra, ra kani ndia ra, ra kaꞌan ndia xiꞌin ra, kachi ndia saa:
―Kaꞌan xiꞌin ndi, ¿yoo ku na kani yoꞌo? ―kachi ndia.
65Ra kuaꞌa ni ka nuu tuꞌun kiꞌvi kaꞌan ndia xiꞌin ra.
Ndiaka ndia soldado Jesús kuaꞌan ra xiꞌin ndia nuu na chiñu
66Ra te ndituvi inka kii, ra saa ndakutaꞌan ndia xikuaꞌa, xiꞌin ndia maestro sañaꞌa ndiayu Ndioxi ña tiaa ra Moisés, xiꞌin ndia sutu kunaꞌnu, ra saa ndiaka ndia soldado kan Jesús ndixaa ra nuu na chiñu kan. Ra saa xaꞌa ndia ndakatuꞌun ndia ra kachi ndia saa:
67―Kaꞌan xiꞌin ndi vichin, ¿a ndixa yoꞌo ku Cristo ra tiꞌvi Ndioxi xaa sakaku ña yuuvi yoꞌo? ―kachi ndia.
Ra saa ndakuiin Jesús, kachi ra saa:
―Nii na kaꞌan va yu xiꞌin ndo ña suvi yu, ra xa saa kandïxa vi ndo yuꞌu. 68Ra tu na ndakatuꞌun tu yu ndoꞌo, ra ndakuïin vi ndo, ra nii saña tu ndo yuꞌu va. 69Ndi su vichin, ra iin saa ndia kii ña vaxi ke kunduꞌu yuꞌu, ra xaa yoꞌo vichin, xitia kuaꞌa Tata yu Ndioxi ra kuu mii takundiꞌi ndiee ―kachi ra xiꞌin ndia.
70Ra saa ndindakatuꞌun takundiꞌi ndia ra, kachi ndia saa:
―¿A Seꞌe Ndioxi kuvi ndixa va kun? ―kachi ndia.
Ra saa ndakuiin Jesús, kachi ra saa:
―Xa mii ndo ndikaꞌan va, ra suvi kuvi va yu ―kachi ra.
71Ra saa ndikaꞌan ndia, kachi ndia saa:
―Yoo ka ku na xiniñuꞌu yo kaꞌan tieꞌe nuu vi ra, ra xa mii yo kuvi yo xini soꞌo, ña ndikaꞌan mii ra ña ku ra seꞌe Ndioxi va ―kachi ndia.
Actualmente seleccionado:
San Lucas 22: mxvNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2017, Wycliffe Bible Translators, Inc. All rights reserved