San Juan 7
7
Ndia ñani Jesús ra ndikandïxa ndia ra
1Ra suvi mii ñuu ña ndoꞌni chi Galilea kan ke, ndixika niꞌni va Jesús tiempo kan, saa chi ndiküni ra koo ra chi Judea, saa chi na judío ra na xika nduku va ku na ña kaꞌni na ra. 2Ra nani saa kuu Jesús xika ra, saa ra xa kuaꞌan kuyachin ni tu koo viko ña ndatava na judío, ta kuiya ta kuiya va, ña xavaꞌa na veꞌe tuvixin vali ndee na. 3Ra xaꞌa ña kan ke ndikaꞌan ndia ñani Jesús xiꞌin ra kachi ndia saa:
―Kanata ñuu yoꞌo, ra kuaꞌan chi Judea, ña vaꞌa na kuni tu na ndikun sata kun na ndee kan va chiñu ña xa kun. 4Saa chi iin tiaa ra kuni ña na kundaa ndiꞌi ini yuvi xaꞌa ra, ra xä seꞌe ra chiñu. Ra ña kan ke yoꞌo, ra chiñu ña xa kun ra na sa kun ña kuni takundiꞌi va yuvi ―kachi ndia xiꞌin ra.
5Saa chi nii ndia ñani ra, ra ndikandïxa vi ndia ra. 6Ra saa ndikaꞌan Jesús xiꞌin ndia kachi ra saa:
―Täan xaa kii ña kuꞌun yu, ndi su nuu ndoꞌo ra ndia ndia ka mii kii ra ña vaꞌa kuvi va ña. 7Saa chi na yuuvi yoꞌo, ra küvi vi kundasi na ndoꞌo, ndi su kundasi va na yuꞌu, xaꞌa ña kaꞌan yu xiꞌin na ña xa na chiñu ña väꞌa. 8Ña kan ke na kuꞌun mii va ndo viko, chi yuꞌu ra küꞌun yu, saa chi täan xa kii ña kuꞌun yu ―kachi ra xiꞌin ndia.
9Ra te ndiꞌi ndikaꞌan Jesús tuꞌun yoꞌo xiꞌin ndia, ra saa nindoo ra chi Galilea va.
Kuaꞌan Jesús viko ña ndatava na judío
10Ra te xa ndakiꞌin ndia ñani ra kuaꞌan ndia, ra saa ndakiꞌin tu mii va ra kuaꞌan ra viko kan, ndi kuäꞌan tuvi ra, chi kuaꞌan seꞌe va ra. 11Ra ndanduku ni va na judío ra viko kan, ra ndikaꞌan na kachi na saa:
―¿Ndia chi xika tiaa kan? ―kachi na.
12Ra yuvi kan ra iin niniꞌi kaꞌan na xaꞌa ra. Ra sava na kaꞌan kachi na saa: “Ra vaꞌa va kuvi ra”, kachi na. Ra sava tu na kaꞌan kachi saa: “Süvi ra vaꞌa kuvi ra, chi ra sandaꞌvi yuvi va kuvi ra”, kachi na.
13Ra ndia nii na ndiküvi kaꞌan tuvi xaꞌa Jesús, xaꞌa ña iyuꞌvi na nuu na judío.
14Ra te xa nditaꞌvi sava viko kan, ra saa ndikiꞌvi Jesús kuaꞌan ra nuu keꞌe veꞌe ñuꞌu kaꞌnu, ra xaꞌa ra sañaꞌa ra. 15Saa ra iin ndakanda ini na judío kan ra kachi na saa:
―¿Ni ke ^xa tiaa yoꞌo ña xini ni ra, ra ndikäꞌvi ra xaꞌa tuꞌun Ndioxi veꞌe ñuꞌu? ―kachi na.
16Ra saa ndakuiin Jesús kachi ra saa xiꞌin na:
―Ña sañaꞌa yu, ra süvi ña sandaku mii yu kuvi ña, chi ra tiꞌvi yuꞌu vaxi va yu kuvi ra ^taxi ña. 17Ra na kuni sa ña kaꞌan Ndioxi, ra ndakuni va na a ndixa Ndioxi ku ra taxi ña sañaꞌa yu, a ña sandaku ini mii va yu kuvi ña. 18Saa chi ra kaꞌan ña ^ndaku ini mii, ra ña kuni ra ña na satoꞌo ni yuvi va ra ke kaꞌan ra; ndi su ra kuni ña na satoꞌo ni na ra tiꞌvi ñaꞌa vaxi ra, ra ña ndaa va kaꞌan ra, ra sandäꞌvi ra.
19’Ra ndoꞌo, ra ña ndixa ke iyoo va ndiayu Ndioxi ña ndakoo ra Moisés ndaꞌa ndo, ndi su ndia nii ndo xïin kandixa ña. ¿Nichuun kuni ndo kaꞌni ndo yuꞌu? ―kachi ra xiꞌin na.
20Ra saa ndakuiin takundiꞌi yuvi kan kachi na saa:
―Tachi ndivaꞌa va ke iyoo xiꞌin kun, saa chi ¿yoo ku na kuni kaꞌni yoꞌo? ―kachi na.
21Ra saa ndakuiin Jesús kachi ra saa xiꞌin na:
―Xaꞌa ña xa yu iin ña xituꞌun kii ndakindiee yo ke ndiee ni ndakanda ini ndo. 22Ndi su xachiñu tu ndoꞌo va kii ña ndakindiee yo, chi xaꞌndia va ndo ñii loꞌo xini kaꞌa tiaa vali seꞌe ndo, ña saxinu ndo ndiayu ña ndakoo ra Moisés ndaꞌa ndo (ra süvi vi ra Moisés kuvi ra nindakoo ña, chi na xii xikua va ndo kuvi na xa ña). 23Ra tu xaꞌa ña küni ndo kanduu ndo ndiayu ña ndakoo ra Moisés va ke xaꞌndia ndo ñii xini kaꞌa seꞌe tiaa vali ndo kii ña ndakindiee yo, ra na kundaa ini ndo, chi ña vaꞌa ke xa tu yuꞌu va kii ña ndakindiee yo, saa chi iin tiaa ka vi sandaꞌa yu, ¿ra nichuun sáa̱ ndo xiꞌin yu? 24Ra na sandäku ndo kuachi ta kuꞌva tuvi mii ndo, chi xiꞌna ka va na kundaa vaꞌa ini ndo ndia kuꞌva ke iyoo iin chiñu ra saa ke vaꞌa sandaku ndo iin kuachi xiꞌin mii ña ndaa ―kachi ra xiꞌin na.
Kaꞌan Jesús ndia chi ke kee ra
25Ra saa xaꞌa sava mii na ñuu Jerusalén kan kaꞌan na kachi na saa:
―¿A süvi ra yoꞌo, kuvi ra xika nduku na kaꞌni na? 26Ra yoꞌo va tu íin ra kaꞌan ndoso ra nuu takundiꞌi yuvi, ra köo mii na kaꞌan xiꞌin vi ra. ¿Ra a Cristo ku ndixa va ra tuvi na chiñu? 27Ndi su ra yoꞌo, ra xini va yo ndia ke kee ra, ra te xa na kixi ra kuu Cristo ra ndia nii na kundäa ini ndia mii ke kee vi ra kan ―kachi na.
28Ra saa kuu Jesús íin ra sañaꞌa ra na nuu keꞌe veꞌe ñuꞌu kan, ra kundaa va ini ra ña kaꞌan na xaꞌa ra, ra saa ndiee ka vi ndoniꞌi ra tachi ra, ra ndikaꞌan ra xiꞌin na kachi ra saa:
―^Xini ndo yuꞌu, ra ^xini tu ndo ñuu va yu tuvi, ndo, ndi su na kundaa ini ndo, chi süvi ña kuni mii yu ke vaxi yu, chi iyoo va iin ra ndaa, ra ra kan va kuvi ra tiꞌvi yuꞌu ña vaxi yu, ra ndoꞌo, ra xïni vi ndo ra. 29Ndi su yuꞌu ra xini va yu ra, chi nuu ra kan ke kee va yu vaxi yu, chi ra kan kuvi ra tiꞌvi yuꞌu va ―kachi ra.
30Ra saa xaꞌa sava na kuni tiin na Jesús ña chikaa na ra veꞌe kàà, ndi su ndia nii na ndixändiee ini ña tiin na ra, saa chi täan xaa kii ña tiin na ra. 31Ra kuaꞌa ni na ndee ini veꞌe ñuꞌu kaꞌnu kan, ra kandixa va na Jesús, ra ndikaꞌan na ^kachi na saa:
―Te na xaa ra kuu Cristo, ¿ra a kuaꞌa ni ka va ña xituꞌun sa ra kan, nuu ña ^xa ra yoꞌo? ―kachi na.
Xaꞌndia na fariseo chiñu nuu ndia kumisio ña na tiin ndia Jesús
32Ra saa xini soꞌo na fariseo ña ndiee ni kaꞌan yuvi kan xaꞌa Jesús, ra saa ndakutaꞌan na xiꞌin na xikuaꞌa nuu ndia sutu ra xaꞌndia na chiñu nuu ndia kumisio ndiaa veꞌe ñuꞌu kaꞌnu kan, ña na tiin ndia Jesús. 33Ra saa ndikaꞌan Jesús xiꞌin yuvi kan kachi ra saa:
―Saloꞌo ni va tiempo íin yu xiꞌin ndo, saa ra nandiko yu kuꞌun yu nuu ra tiꞌvi yuꞌu vaxi va yu. 34Ra ndoꞌo, ra nanduku ni va ndo yuꞌu, ndi su ndanïꞌi ndo yuꞌu, ra nii nuu kuꞌun yu koo yu ke kuchüun ndo kuꞌun vi ndo ―kachi ra.
35Ra saa xaꞌa na judío kan ndakatuꞌun taꞌan na kachi na saa:
―¿Ndia chi ke kuꞌun ra yoꞌo ña kaꞌan ra, ña ndanïꞌi yo ra? ¿A nuu na taꞌan yo, na xinuꞌni kuaꞌan ndoꞌni tiañu na griego ke kuꞌun ra, ra ikan sañaꞌa ra na griego kan va? 36¿Ra ni ke kuni kachi tuꞌun yoꞌo ña ndikaꞌan ra ña xiꞌin yo: “Nanduku ndo yuꞌu, ndi su ndanïꞌi ndo yuꞌu, ra nii nuu kuꞌun yu koo yu, kuchüun ndo xaa vi ndo kachi ra”? ―kachi na.
Itia ra taxi ña kutiaku yuvi
37Ra kii ña ndiꞌi viko kan kuvi iin kii ña tiaa ni ka va ndasakaꞌnu na judío. Ra mii kii kan ke ndakundichi Jesús ra ndiee ka vi ndikaꞌan ra xiꞌin na kachi ra saa:
―Tu ndia ndo ndachi ini, ra naꞌa ndo nuu yu, ra yuꞌu taxi tiakuii koꞌo ndo. 38Ra yuvi na kandixa yuꞌu, ra ini vi na ke kana iin itia kaꞌnu, ra tiakuii ra taxi ña tiaku yuvi va kuvi ra, ta kuꞌva kachi tuꞌun Ndioxi ―kachi ra xiꞌin na.
39Ra ña ndikaꞌan Jesús tuꞌun yoꞌo xiꞌin na, ra xaꞌa Tachi Yii Ndioxi ña xinu koo xiꞌin takundiꞌi na kandixa tuꞌun va ra ke ndikaꞌan ra ña; saa chi täan xaa vi Tachi Yii Ndioxi ña koo ña xiꞌin na, chi täan nandiko Jesús kunuꞌu ra ndivi.
Ndataꞌvi taꞌan ndiꞌi yuvi xaꞌa tuꞌun ña ndikaꞌan Jesús
40Ra saa te xini soꞌo sava na ndita tiañu yuvi kan, tuꞌun ña ndikaꞌan Jesús, ra saa ndikaꞌan na kachi na saa:
―Tiaa yoꞌo kuvi ndixa va ra vaxi kaꞌan ndoso tuꞌun yuꞌu Ndioxi ―kachi na.
41Ra sava tu na kaꞌan kachi saa:
―Ra yoꞌo kuvi ra kuu Cristo va ―kachi na.
Ra inka tu na kaꞌan kachi saa:
―¿Ama kee Cristo chi Galilea? Këe ra chi kan. 42Saa chi Cristo, ra seꞌe xikua ra rey David va ke xiniñuꞌu kuu ra, ra ñuu Belén nuu ndixiyo ra rey David va ke kee ra, kachi tuꞌun Ndioxi ―kachi na.
43Ra saa taꞌvi taꞌan ndiꞌi va yuvi kan xaꞌa Jesús. 44Ra saa kuni sava na tiin na Jesús kuꞌun ra veꞌe kàà, ndi su ndia nii na ndixändiee ini ña tiin na ra.
Na chiñu ra ndixïin na kandixa na Jesús
45Ra saa nandiko ndia kumisio, ndia kuaꞌan tiin Jesús ndaxaa ndia nuu ndia xikuaꞌa kunaꞌnu nuu ndia sutu xiꞌin ndia fariseo, ra nindakatuꞌun ndia ndia kachi ndia saa:
―¿Nichuun ndixïndiaka ndo ra kixi ndo? ―kachi ndia xiꞌin ndia. 46Ra saa ndakuiin ndia kumisio kan kachi ndia saa:
―¡Ndia nii tiaa ra täan kaꞌan ra taꞌan tuꞌun ña kaꞌan ra kan! ―kachi ndia.
47Ra saa ndakuiin ndia fariseo kachi ndia saa xiꞌin ndia:
―¿A kuchuun tu ra sandaꞌvi ra ndoꞌo va? 48¿A kandixa ndia kunaꞌnu nuu ndo ra, tuvi ndo? ¿A ndia kunaꞌnu nuu ndia fariseo tu kandixa ñaꞌa, tuvi ndo? 49¡Yuvi na xini soꞌo ña kaꞌan ra kan, ra na xïni ndiayu Ndioxi vi kuvi na, chi na nditavi chiꞌña va kuvi na! ―kachi ndia.
50Ra nduꞌu tu ra Nicodemo, ra ndixaꞌan seꞌe nuu Jesús iin ñuu va xiꞌin ndia fariseo kan, saa chi fariseo ku tu ra kan va, ra saa ndikaꞌan ra xiꞌin ndia kachi ra saa:
51―Küvi vi sandaku yo kuachi xiꞌin iin tiaa, tu täan kundaa vaꞌa ini yo ndia ña kuu kuachi ra, kachi ndiayu ña iyoo ndaꞌa yo ―kachi ra xiꞌin ndia.
52Ra saa ndakuiin ndia, kachi ndia saa xiꞌin ra:
―¿A ra kee ñuu Galilea ku tu yoꞌo va? Na kaꞌvi vaꞌa kun tuꞌun Ndioxi, ra kundaa ini kun, saa chi ndia nii ra kaꞌan tuꞌun yuꞌu Ndioxi täan kee chi Galilea ―kachi ndia.
53Ndia saa ra ndakiꞌin ta iin ta iin ndia kuanuꞌu ndia veꞌe va ndia.
Actualmente seleccionado:
San Juan 7: mxvNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2017, Wycliffe Bible Translators, Inc. All rights reserved