Yauhaas 10
10
Zaaj Lug Pevtxwv Has Txug tug Tswv Yug Yaaj
1Yexus has tas, “Kuv qha tseeb rua mej has tas tug kws moog huv lub nkuaj yaaj, yog nwg tsi moog ntawm lub rooj nkuag moog, nwg ca le nce lwm qhov moog xwb, tug ntawd yog tubsaab. 2Tug kws moog ntawm rooj nkuag moog, tug ntawd txhaj yog tug tswv yug yaaj. 3Tug kws zuv qhovrooj, yuav qheb rooj nkuag rua nwg, thaus nwg cuab nwg paab yaaj tej npe, paab yaaj paub nwg lub suab hab nwg coj nwg paab yaaj tawm moog. 4Thaus nwg coj nwg paab yaaj tawm moog lawm, nwg moog ua paab yaaj ntej, hab paab yaaj lawv nwg qaab, rua qhov paab yaaj paub nwg lub suab. 5Paab yaaj yuav tsi lawv lwm tug qaab, tabsis paab yaaj yuav tsiv ntawm tug ntawd moog, rua qhov paab yaaj tsi paub tug ntawd lub suab.”
6Yexus has zaaj lug pevtxwv nuav rua puab, tabsis puab tsi totaub sov yog Yexus has dlaabtsi.
Yexus Yog tug Tswv Yug Yaaj Kws Zoo
7Yexus rov has rua puab tas, “Kuv qha tseeb rua mej has tas, kuv yog lub rooj nkuag yaaj. 8Txhua tug kws lug ua kuv ntej puavleej yog tubsaab xwb, tabsis paab yaaj tsi noog puab tej lug. 9Kuv yog lub rooj nkuag. Tug kws moog ntawm kuv moog, tug ntawd yuav dlim; nwg yuav moog moog lug lug hab nrhav tau zaub noj. 10Thaus tubsaab tuaj, tsuas yog tuaj nyag, tuaj tua hab ua kuas puamtsuaj xwb. Tabsis kuv lug, yog lug ua kuas mej tau txujsa hab tau lub neej nplua mag.
11“Kuv yog tug tswv yug yaaj kws zoo. Tug tswv yug yaaj kws zoo txaus sab tuag theej paab yaaj. 12Tug kws luas ndlav zuv paab yaaj tsi yog tug tswv hab paab yaaj tsi yog nwg le. Thaus nwg pum maa tuaj, nwg yuav tsiv tso paab yaaj tseg; maa yuav tum paab yaaj hab paab yaaj yuav tsiv taag. 13Tug ntawd tsiv, rua qhov luas ndlav nwg zuv paab yaaj xwb, nwg txhaj tsi mob sab paab yaaj. 14-15Kuv yog tug tswv yug yaaj kws zoo. Kuv paub kuv paab yaaj hab kuv paab yaaj paub kuv, ib yaam le leej Txiv paub kuv hab kuv paub leej Txiv. Kuv txaus sab tuag theej kuv paab yaaj.#Mat 11.27 16Kuv muaj dlua ib paab yaaj kws tsi nyob huv lub nkuaj nuav. Kuv yuavtsum moog coj puab lug rua huv lub nkuaj nuav; puab yuav noog kuv lub suab, hab puab yuav lug#10.16 puab yuav lug; tej phoo qub has tas puab yuav ua. ua ib paab koom ib tug tswv xwb.
17“Leej Txiv hlub kuv rua qhov kuv txaus sab tso kuv txujsa tseg, kuv ua le ntawd kuv txhaj tau kuv txujsa ntawd rov qaab lug. 18Tsi muaj leejtwg yuav txeeb tau kuv txujsa. Kuv txaus sab tso kuv txujsa tseg. Kuv muaj cai tso kuv txujsa tseg hab kuv muaj cai muab kuv txujsa rov qaab lug. Kuv Txiv kuas kuv lug ua le nuav.”
19Vim tej lug kws Yexus has nuav, txhaj ua rua cov Yudais rov tsi sis hum dlua. 20Muaj ntau leej has tas, “Nwg raug dlaab! Nwg vwm lawm! Ua le caag mej tseem yuav noog nwg tej lug ua dlaabtsi?”
21Tabsis muaj qee leej has tas, “Tug tuabneeg kws raug dlaab yeej tsi txawj has le tug nuav has! Dlaab yeej khu tsi tau tug tuabneeg kws dligmuag kuas pum kev le.”
Cov Yudais tsi Ntseeg Yexus
22Thaus lub caij ntuj no kws ua kevcai ncu txug nub kws khu lub Tuamtsev huv lub nroog Yeluxalees. 23Yexus ncig moog ncig lug huv Xalumoos lub qaab khaav ntawm lub Tuamtsev, 24cov Yudais txawm sis sau tuaj cuag Yexus hab nug nwg has tas, “Koj tseem yuav ca peb tog txug thaus twg hab? Yog has tas koj yog tug Mexiyas, koj ca le qha qhov tseeb rua peb.”
25Yexus teb has tas, “Kuv tub qha rua mej lawm, tabsis mej tsi ntseeg kuv tej lug. Tej num kws kuv Txiv kuas kuv ua, tub qha rua mej paub lawm; 26tabsis mej tsi ntseeg, rua qhov mej tsi yog kuv paab yaaj. 27Kuv paab yaaj paub kuv lub suab; kuv paub kuv paab yaaj hab paab yaaj lawv kuv qaab. 28Kuv muab txujsa ntev dlhawv moog ibtxhis rua puab, puab yuav tsi tuag ib zag le, hab tsi muaj leejtwg yuav txeeb tau puab huv kuv txhais teg moog le. 29Tej kws kuv Txiv muab pub rua kuv, tseemceeb dlua txhua yaam huv tuabsi,#10.29 Tej kws kuv txiv pub rua kuv tseemceeb dlua txhua yaam huv tuabsi; tej phoo qub has tas Kuv Txiv tug kws muab puab pub rua kuv, yog tug kws muaj fwjchim luj dlua ndlais huv tuabsi. hab tsi muaj leejtwg tuaj txeeb tau tej kws leej Txiv tsomkwm. 30Leej Txiv hab kuv yog tuab tug.”
31Ces cov Yudais txawm khaws pobzeb yuav rov ntaus Yexus dlua. 32Yexus has rua puab tas, “Kuv Txiv kuas kuv ua ntau yaam num zoo rua mej pum; tej ntawd yaam twg ua rua mej ntsawv sab, mej txhaj yuav muab pobzeb ntaus kuv?”
33Puab teb has tas, “Qhov kws peb yuav muab pobzeb ntaus koj, tsi yog vim tej num zoo kws koj ua, tabsis vim qhov kws koj has lug saib tsi taug Vaajtswv. Koj tsuas yog tuabneeg xwb, tabsis koj khaav has tas koj yog Vaajtswv.”#Lek 24.16
34Yexus teb has tas, “Tub muaj lug sau tseg rua huv mej txuj Kevcai lawm, Vaajtswv has tas, ‘Mej yog tej vaajtswv.’#Pnk 82.6 35Yog Vaajtswv txujlug tub has tas puab yog tej vaajtswv; yog le ntawd, yeej tsi muaj leejtwg yuav rhuav tau Vaajtswv txujlug le. 36Kuv tub yog tug kws leej Txiv xaiv hab khaiv kuv lug rua huv nplajteb nuav. Ua le caag mej has tas kuv has lug saib tsi tau Vaajtswv, rua qhov kuv has tas kuv yog Vaajtswv Leej Tub? 37Yog kuv tsi ua tej num kws kuv Txiv kuas kuv ua, ces mej tsi xob ntseeg kuv tej lug. 38Tabsis kuv tub ua tej num ntawd lawm, txawm yog mej tsi ntseeg kuv los mej yuavtsum ntseeg tej num kws kuv ua ntawd, mej yuav paub has tas leej Txiv hab kuv koom ib txujsa.”
39Ces puab yuav rov nteg Yexus dlua, tabsis Yexus tsiv lawm.
40Ces Yexus txawm hlaa tug dlej Yauladees moog rua ntawm qhov chaw kws Yauhaas muab tuabneeg ua kevcai raus dlej hab Yexus moog nyob tid.#Yhs 1.28 41Muaj tuabneeg coob coob tuaj cuag Yexus, puab has tas, “Yauhaas tub tsi tau ua ib yaam txujci tseemceeb le, tabsis txhua yaam kws Yauhaas has txug tug txivneej nuav puavleej muaj tseeb.” 42Cov tuabneeg kws tuaj ntawd muaj ntau leej ntseeg Yexus.
Actualmente seleccionado:
Yauhaas 10: HNJ2000
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2000 United Bible Societies. All rights reserved.