Matayo 5
5
Yesu babola bandu pikitombi
1Yesu pababona bandu ajingi ngaombe pikitombi ngatama. Akinapunji bakwe ngabannyendelela, 2jwombe ngatumbu kabolanga,
Laa ja kweli
(Luka 6:20-23)
3“Mbaya ababi nu uwocho muhuke,
gambu Kingwana chu kumbengu nga chabe!
4Mbaya ababi nu kuechuka,
gambu Nnoongo mabapembelea.
5Mbaya mundu jwa jali,
gambu mapokela malagano ga Nnoongo!
6Mbaya ababi na njala na nyota ju kutenda gapala Nnoongo,
Nnoongo mababeka bajukute!
7Mbaya ababi na kia,
gambu Nnoongo mababonela kia!
8Mbaya abampala Nnoongo kwa mwojo chwapi,
gambu mabammona Nnoongo!
9Mbaya akachikichani,
gambu bikemigwa ingota ya Nnoongo!
10Mbaya abapotekigwa kwa magambu gu kutenda agapala Nnoongo,
gambu Kingwana cha kumbengu nga chabe!
11“Mbaya mangweto anda bandu bantukine na bamponjite nu kunkopakeya kilebe chachoa chubaja kwa magambu gango nenga. 12Nhwalalange mwojo nu kululuta gambu hupo inu ngolongwa kumbengu. Yene ngapaba bonelanga akalondoli ba Nnoongo abakiba tango namangweto kubeje.
Mwinyo nu lumuli
(Maluko 9:50; Luka 14:34-35)
13“Mangweto nga mwinyo panakati ja bandu padunia. Nambu anda mwinyo uoite kulaa kwakwe ipakolelwa na nike? Kuchataje kabele, nambu kuleke panja nu kulebatigwa na bandu.
14“Mangweto nga lumuli lwa dunia. Kilambo chikichengigwe panani pa kitombi kuotoje kukiia. 15Na bandu kupambaje lumuli nu kuluekelela lidebe, nambu kulubeka panani putala, kupala bamulakile bandu boa ababi unyumba. 16Mangweto uyo mpaka oti lumuli lwinu lumulike nnongi ja bandu, bagabone maengo ginu gabe chwapi na bakoigwe Awawa binu ababi kumbengu.
Malagilo ga Musa na Majandiko ga akalondoli ba Nnoongo
17“Makakita nhikila kuboya Malagilo ga Musa na maboulo ga akalondolije. Nhikila kuboyaje, nambu nhikila kulenganakia. 18Nannenge kweli mpaka mbengu na dunia pipakupeta, napachokoje pa Malagilo ga Musa pukuboigwa, mpaka goa galenganile. 19Mundu jwajwoa ojwapakulemwa amuli ejibi njokochoko kupeta joa na kabola bange batendange jenia, jwenio apakube nchokochoko mukingwana chu kumbengu. Nambu jwajo ojwapakagakamula na kabola bange, jwenio apakube nkolongwa mukingwana chu kumbengu.” 20“Nannengelanga kweli nukamuje gambone gapala Nnoongo kapeta Mafalisayo na aboli ba Malagilo ga Musa, nnyingije ngu mukingwana chu kumbengu.”
Maboulo gi lilaka
(Luka 12:57-59)
21“Nnyoaninge kutenda bandu ba lolo balengigwe, ‘Makakomaje! Abapakoma bapa kuhukumigwa.’ 22Nambu nenga nannenge, jwajwoa ojwapa kunchimwa nnunu gwakwe apakuhukumigwa. Ojwapa kummembula nnunu gwakwe apakuntakiana kana jumbe na ojwapa kunkema nnuna gwakwe, ‘Matokamau!’ Apaligwa kujingi mumwoto gwangaimika machoba goa. 23Anda mpelike lilumbo lya hupo linu kukitembe cha Nnoongo na penia nkombakile nnunugwinu abi na bulwa na mwenga, 24mileke hupo inu pikitembe, nnyabule oti makachikachane na nnunugwinu, kuboka penia mmuje makapange hupo inu.”
25“Nchikachane na mundu ojwantakiine kiti mmi undela, makajenda kanajumbe. Andaje ojwantakiine apakunkamuya kana akimu na akimu apa kunkamuya ku linjolinjoli na kubekigwa mukipungo. 26Nannenge kweli mpitaje mwenio mpaka nnyomole kulepa uloi gwoa.”
Maboulo nhwalo gwa ngongola
27“Nnyoaninge kube bandu balengigwe, ‘Makatendaje ngongola!’ 28Nambu ne nannenge, ojwapa kunnolakea munkege nu kunnokolela bai ateile nakwe ngongola umwojo gwakwe. 29Anda lio linu lyakalelo lipakunnyambuki kulemwa, muliboye mililekele kutali namwenga! Mbaya kuoya kipagwa chimwe cha mmele gwinu, kuliko kuoya mmele gwoa kukulekeligwa kumwoto gwangaimika machoba goa. 30Anda luboko lwinu lwa kalelo lupakunnyambukia kulemwa, mbaya muluekete mululekele kutali namwenga! Mbaya kuoya kipagwa chimwe cha mmele gwinu, kuliko mmele gwoa ujende kumwoto gwangaimika machoba goa.”
Nhwalo gwa kulekana mundu na anamundu
(Matayo 19:9; Maluko 10:11-12; Luka 16:18)
31“Uyo ilengigwe, ‘Ojwapakaleka anamundu apaligwa kape talaka.’ 32Nambu nenga nannengelanga, mundu jwajoa ojwabaleka aanamundu, nambu tu gambu ga ngongola, jwenio ammeka munkege jwenio abe nngongola na mundu anda antoi munkege jwenio atenda ngongola.”
Maboulo ga nhwalo gwa kulapila
33“Kabe nyoininge kube bandu ba lolo balengaligwe, ‘Mikikilekaje channapila, nambu mpaka ntende channapile Kangwana.’ 34Nambu nenga nannenge, makalapije. Nu kumbenguje, gambu kwenio nga kukibi kitebu cha Nnoongo, 35na pannemaje, gambu penia nga pukubeka makongono gabe, nuku Yelusalemuje, gambu chenie nga kilambo cha Angwana Akolongwa. 36Na makalapije kwa mutwe gwinu, gambu mwe kuotoje kulubeka lunywili lube luhu andaje lupili. 37Andannengite, ‘Elo’, Ibe ‘Elo’, Anda nnengite, ‘Ije’, Ibe ‘Ije’, Chachoa chikipeta genia kiboka kwa Mmaja.”
Maboulo nhwalo gwa kubuyana
(Luka 6:29-30)
38“Ngannyoanga kube galengigwe, ‘Nnyinu anda ammoite lio namwe mammoya lio, nnyinu anda ankolite lino namwe mankola lino.’ 39Nambu nenga nannengela, makammukije ubaja mundu mmaja. Mundu anda amputite likopi lijego lya kalelo, mantendebukie lenge. 40Mundu anda ampelike kamahakama kupala kutola lichati linu munnekele nilikoti linu atole. 41Mundu anda anhwamuliche kupotola nhwigo gwakwe mwanja gwa maili jimwe mpotola maili ibena. 42Ojwapakunyopa kilebe mumpe, makannyimaje ojwaika kunnyaika kilebe.”
Maboulo ga kapalanga akangondwa
(Luka 6:27-28,32-36)
43“Ngannyoa kutenda ilengigwe, ‘Mumpale nndami nyinu, na manchimwe nngondwa jwinu.’ 44Nambu nannenge, mapalange akangondwa binu, na majopele ku Nnoongo abampoteka, 45kupala mmegange makinangota ba Awabinu ababi kumbengu. Gambu benia bamulakila lumuli lwabe bandu boa akabaja na bambone, na kakomelekea ula bandu bambone na bandu akabaja. 46Bo, mpakupata upo nike ku Nnoongo, kwa kapala abampalanga mangweto tu? Magambu ata akatocha kodi bakamulanga ugo! 47Anda mapatangite abali akalongo binu tu, ngimikikamwa ni kiyono? Mbone na bandu bangammanya Nnoongo bakamu ugogo! 48Mmeganga makambone, anda Awabinu bu kumbengu pababi bambone!”
Actualmente seleccionado:
Matayo 5: NNQNT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Ngindo New Testament © The Word For The World, 2015.