Lukahtar 9
9
O bičhalipe e dešudone apostolongo. E pandž milje manuša čaljarde. O prvo mothovipe e daramne pharimahtar. O preobrazipe e Isusohko. O sastaripe e linehko. O barikanipe e amalengo thaj lengje lačhe ile prema sikamnete. Gola save džana pala o Isuso.
1Vov ćidijah e dešudo amalen piren thaj dijah len moćo thaj zuralipe upral sa e benga thaj te sastaren katar o nasvalipe.
2Thaj bičhaldah len te sikaven e Devlehko alav thaj te sastaren e nasvalen.
3Thaj phendah lengje: Na te len niso po drom, khanči, ni e rovli, ni e trasta, ni love, thaj na te igjaren duj džute patave, thaj na te phiraven duj gada.
4Ando savo god ćher tumen dena, inćate bešen thaj okothar džan tar.
5Te khonik varekaj nići ažućarela tumen šukarimaha, a tumen, kana iklen andar gov than, katar gov foro, ćinosaren o prah̄o katar tumare prne, nek džangljol pala lende.
6Von gjele tar thaj nakhle krozo gava, sikavindo e Devlehko alav thaj sastarindo e dženen pe sa e riga.
7Kana ašundah o Irodo so vov ćerel, lijah but te čudi pe, kaj varesave manuša dije vorba, kaj o Jovano uštilah katar e mule.
8Nesave džene pale phe de kaj sikadilah o Ilija, a e aver dije vorba kaj uštilah varesavo katar e phure, dumutane, prorokujra.
9Thaj phendah o Irodo: Me ćhindem e Jovano. A ko si gova savehtar me ašunav gasave bare buća? Vov manglah te dikhel le.
10Irisalje e amala thaj sa mothode lehće so ćerde, a vov lijah len peha thaj gjele tar ando korkor̄ipe uzo jekh them po anav Vitsaida.
11Kana e manuša haćarde pala gova, lije te džan pala lehte, a vov doažućardah len thaj dijah vorba lengje katar e Devlehko thagaripe thaj sastardah golen save trubusardeha te sastardon.
12A e jrat pašili. Akana avile e dešuduj džene lehte thaj mothode lehće: Bičhal e manušen te džan po raćaripe ande pašalne pera, thaj ande pašutne themor̄a, tha te arakhen pehće h̄ape, kaj kathe sam ande jekh korkor̄no than.
13A vov phendah lengje: Anen lengje te h̄an von. A von vaćarde: Amende si samo pandž marne thaj duj mačhe. Maj feder avela te džah amen te ćinah marno pala sa gala manuša.
14A okoringate seha pandž milje džene thaj vov phendah po amalengje: Bešalen len pe svako than po pinda dženen.
15A von ćerde gadija thaj bešalde len savor̄en.
16Thaj vov lijah go pandž marnor̄e the liduje mačhen thaj dikhindo upre po del, phaglah len thaj dijah len ke pire manuša te ulaven len maškar e džene.
17Pe gova saijekh h̄alah thaj čaljiljah. A golehtar so ačhilah lendar, ćidije dešuduj krošnice.
18Kana jekhvar korkor̄e molisaljah e Devlehće, phučlah vov pe amalen save seha paše: So paćan e manuša, ko sem me? So den vorba mandar?
19A von dindo vorba phende lehće: Jekh džene vaćaren kaj san tu o Jovano Krstiteljo, a e aver kaj san o Jlija jal jekh katar e phureder prorokujra, savo uštilan e mulendar.
20A vov phučlah len: A so tumen mislisaren, ko sem me? A o Petre dindo vorba phendah lehće: O Hristo e Devlehko.
21A vov daradah len mothovindo lengje, kaj nikahće niči troman te vaćaren gova.
22Dindo vorba lengje kaj kam o čhavo e manušehko but ićhajvol thaj dukhadinajvol thaj kam phukaven le, kam čingarden le e phuredera e rašajengje thaj e sikavde, thaj kam muda en le, thaj o trito djive kam vov uštel katar e mule.
23A savor̄engje phendah: Ko kamel te džal pala mande, nek mukel sa gova so si le thaj nek lel piro trušul, piro krsto, thaj te džal pala mande.
24Kaj ko god kamel te arakhel piro odji, ka h̄asarel le, a ko god h̄asarela le pala mande, gova kam araćhel le pale.
25Kaj so mola e manušehće kana avela lehći sa e phuv, a peh h̄asarel, pehće ćerel džungalipe.
26Ko ladžala mandar mrne alavendar, lehtar kam ladžajvol o čhavo e manušehko kana avela ande po baripe thaj ande pe dadehko thaj ande angjelongo baripe.
27A me čačimaha mothovav tumee: Maškar kala save ačhen kathe, si len save niči kam haćarena o meripe dži kaj god niči dikhen e Devlehko thagaripe.
28Pala gaja vorba nakhle oh̄to djivesa, a vov lijah e Petre, thaj e Jovano, thaj e Jakovo thaj iklistah upre pe plajin te molisajvol e Devlehće.
29Kana vov gadija molisaljah e Devlehće, lehko muj avilah aver, a lehko hujravipe lijah te parnjol thaj te strafinisavol.
30Thaj, eke dikh, duj džene lije te den vorba leha, a gova seha o Mojsije thaj o Ilija.
31Thaj von sikadile ando baripe thaj dije vorba katar e Isusohko iklipe savo trubusardaha te ćerdol ando Jerusalimo.
32A o Petre thaj gola save seha leha, sute tar. A kana džungadile, dikhle lehko baripe thaj e duje dženen save leha ačhena.
33Thaj kana gjele tar lehtar, dijah vorba o Petre e Isusohće: Sikamneja, amee si lachipe kathe. Av te ćerah trin ćheror̄a, jekh tuće, jekh Mo sijehće, a jekh Ilijahće. Ali vov niči džanglah so dijah vorba.
34A dži kaj vov gadija vaćardah, tunjarikosaljah o del the garudah len e učhalinaha a von golehtar daralje.
35A andar o učhalutno kalipe ašundinaljah e vorba: Gava si mrno čhavo čumidino, ašunen thaj kanden le.
36A kana ašundilah e vorba, ačhilah o Isuso korkor̄e, korkor̄aljah. A von ačhade e vorba thaj niči mothode nikahće so dikhle gole djivesengo.
37Thaj kana aver djive lijah te huljel katar e plajin dijah pe but manuša.
38Eke, dikh, pe jekhvar maškar lende dijah vorba jekh manuš: Sikamneja, me moli ma tuće, dikh pe mo čhavo, savo si mae jekhor̄o.
39Thaj dikh, astardah le o bengjalo odji, phagardah le, crdijah le thaj andar lehko muj dijah e spuma thaj kana sa ićhardah le, gjelo tar.
40A me molisardem će amalen te traden le, ali von nahi tradije le.
41Thaj dindo vorba o Isuso phendah lengje: Ej, bipaćamne thaj khalkhane manušale, dži kaj kam avav tumenca thaj dži kaj kam h̄av h̄oli tumendar? An mae će čhave akaring.
42A kana vov lijah džal lehte, eradah le o beng, lijah ićharel le. A o Isuso daradah e džungale duho thaj sastardah e čhave thaj dijah le ke lehho dad.
43Thaj savor̄e divisalje e Devlehće barimahće thaj golehće so ćerdah o Isuso, a vov phendah pe amalengje.
44Čhuven gav alava an tumare kan, kaj o čhavo e manušehko trubuj te perel ande va e manušengje.
45A von niči haćarde gaja lehći vorba, kaj voj saha garudini lendar thaj našti haćarde la. Von niči tromaje te phučen le pala gav alava.
46A von lije te den vorba maškar pehte, ko šaj avela maj baro lendar.
47A o Isuso haćardah so von an godji ićaren thaj lindo e čhavor̄e thodah le angla pehte.
48Thaj phendah lengje vov: Gova savo lela gav čhavor̄e ande mrno anav, mol lehće sar kana man kaj lijah, a ko man lela, lela vi gole savo man bičhaldah, kaj godova savo si maj cinono maškar tumende, vov si baro.
49A o Jovano dindo vorba phendah: Sikamneja! Dikhlam jekhe manuše savo tradijah e bengjen ćire anaveha thaj vaćardam lehće te na gova ćerel kaj vov niči džal amenca pala tute.
50Thaj phendah lehće o Isuso: Muken le te gova ćerel, kaj savo naj proti tumende, gova si tumenca.
51A kana pašile e djivesa te vov džal upre ando del, irisaljah te džal ando Jerusalimo.
52Thaj muklah angla pehte e bičhalden angle. A von gjele tar thaj avile tar ande jekh Samarijako gav te lačharen lehće o than kaj kam raćarel.
53A von niči lije le pehte, kana dikhle kaj džal ando Jerusalimo.
54A kana lehće amala dikhle gova, o Jakovo thaj o Jovano phende: Bareja, kameha te phenah te huljel e jag upral katar o del, te phabarah len thaj te phabon, sar vi o Ilija kaj ćerdah.
55A vov lende boldinaljah thaj daradah len gale vorbaha: Ni tumen niči džanen korkor̄e, save odjehko sen.
56Kaj o čhavo e manušehko niči avilah te mudarel e odja e manušengje; vov kamel te arakhel len. A maj palal gjele tar ande jekh aver gav.
57Thaj kana von gadija gjele e dromeha, pašilah varesavo manuš lehte thaj phendah: Bareja, me kam džav tuha, kaj god tu džah.
58Thaj o Isuso phendah lehće: E vošutne lolen, e lisicen, si h̄îva, e čirikljen e Devlehćiren si kujbujra, a e manušehko čhavo naj kaj te garuvel po šoro.
59A e averehće phendah: Av pala n ande! A vov mothodah: Bareja, muk ma m’anglal te džav te prah̄oj me dade ando limori.
60A o Isuso dijah vorba lehće: Muk gova, nek e mule prah̄on pire mulen, a tu dža thaj sikav e Devlehko alav.
61A o aver phendah: Bareja, me džav pala tute, ali muk ma maj anglal te phenav Devleha golengje savo ačhile ćhere, e ćherutnengje.
62A o Isuso mothodah lehće: Ni jekh gasavo manuš naj lačhardo pala o Devlikano thagaripe, savo thovel o va po plugo pa dikhel pala pehte palpale.
Actualmente seleccionado:
Lukahtar 9: GURB1938
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Englezongo thaj avere Themengo Biblijako Amalipe 1938.