Lukéstar 8
8
1Uló so uló, geló dis dizjáte, o thagaribé e Devléskoro izvakerindós, o deš‐u‐dúi‐da lésa berabér.
2Thai džuvljá‐da, kai sastjardjás len katár o górke dúxja thai katár naborjámata, i María, kai vikínen la i Magdalína, — látar‐da ikístile éfta bengá.
3Thai Joánna, e Xusáskeri ŗomní, amí o Xúsas e Herodóskoro kjája, (xizmetdžís) sas, thai Susánna, thai avér but džené, ol‐da xizméti kerénas léske.
4But baró kalabalékji kidisájlo, prástan andár i Dis mamúi léste, ov‐da jek paramísi vakerél lénge.
5Siné kai siné jek sejáči; íkljol ta te čhivél o giv. Čhitjás. Amí perél xaŗí giv ándo drom, basdínjovel telál o piŗé, xan les o čiriklé.
6Thai perél xaŗí giv ándo baŗ, hemén bárjol, šúkjovel, sóske suslipé nanái.
7Perél‐da xaŗí giv ándo kaŗé, bárjon kai bárjon lésa jekhethané o kaŗé, tasávdjovel o giv.
8Amí perél xaŗí giv ándi lačí phuv, bárjol, kití sas pó‐anglé, akaná šel‐var pó‐but isí. Vakerél o Ísus, thai pištínel: Káske si kaná, ta te šunél.
9Phušlé o amalá léskere: Saví si adiká paramísi, ta t’axáljon.
10Vakerél o Ísus: Mukél o Del, ta te axáljon tumé so garavdó isí ándo thagaripé e Devléskoro. Amá e averénge paramisjéntsa vakerél, ta te na dikhén, kána dikhén, ta te na axáljon kána šunén.
11Áke i paramísi so značínel: O giv isí o aláv é Devléskoro.
12So si e droméste isí o manúš kai šunén; pále avél o bengk, léngere vogjéndar lel, čorél o aláv e Devléskoro, ta te na pakjén, zerre kaspasínjoven.
13So si e baŗéste isí odolká kai šunén, lošanibnása len o aláv, amí nanái lénge kórenja, xaŗí vréme pakjén, pále avél o bengk, palál léste perén.
14So peló ándo kaŗé isí odolká kai šundé, džan‐peske, e dünjáskere butjátar thai barvalipnástar tasávdjoven, plódos nána den.
15So si e lačé phuvjáte isí odolká kai šunén, mišté lačé vogjénde ikerén, terpenjása plódos kadén.
16Nanái manúš kai tharél pe momeljá thai pále jekhé čarésa učharél ili telál i kéreveti thovél, amí thovél la ándo momeljákoro, te thábjol, savó avél ta te dikhél.
17Zérre so si garavdó kasikávdjol, kadžanén les, ka‐íkljol na‐avrí.
18Šunén‐ta, kánden‐ta. Sóske káske si váreso, léske pó‐but kadén, amí káske nanái čípota, léstar kalén o šexjá da.
19Alé paš léste o phralá léskere, thai i dai. Amí naští avén katár o kalabalékji.
20Phenén léske: Te phralá, thai ti dai térdjon avrí, mangén te dikhén tut.
21Phenél adavká, o Ísus: Mi dai thai me phralá, ol‐da šunén o aláv e Devléskoro, thai ikerén.
22Nakló so nakló, jek diés geló; isí jek beroŗó (gémi); del andré pe amaléntsa berabér, phenél lénge: Háide, te džas aménge averé rigáte ko paní, (perdál o paní.) Gelé kai gelé.
23Hem džan, hem sovél adavká, o Ísus. Ulí jek barí balvál uprál o paní, phérdilo o beroŗó (o korábi), paní: barí bibáxt.
24Avén, džangavén les, phenén: Xulája‐ba (Góspodi), kamerás! Ov‐da uštjél, vakerél e balvaljáke, thai e divioné panjéske, ol‐da mukén, smirínen‐pes.
25Phenél lénge o Ísus: Tumaró pakjoibé káte si? Ol‐da daránile, xoratínen‐peske, phenén: Savó si adavká kai phenél hem e bavlaljáke, hem e denizjáke, thai kánden?
26Gelé kai gelé dži kai resté ándo them e Gadarinéngoro kai isí mamúi Galiléa.
27Ov kána íkljol uprál i phuv avél dži les jek murš kai but vréme isí léske jek bengk. Odolké muršéske nanái urjaibé, nána bešél andé jekhé kheréste, amá bešél andé muléngere xendekjénde ko muló than.
28Dikhél e Isús, perél pe móste léske ko čangá, zoralés‐da pištínel, vakerél: So isí mánge túsa te keráv, abé Isuséja, e baré Devléskoro čhavéja? Mangáv tut, ma ker mánge ziáni.
29Sóske ov phendjás e bišužé duxóske, ta t’íkljol katár e muršéste. But var sîkîldinkjardjás les, ov‐da ándo sras phangló sas, thai e zindžirjéntsa phangló; o zindžírja‐da phagjél, trádel les o bengk andé pustoné thanénde.
30Phučél léstar o Ísus, vakerél: To aláv so isí? Ov‐da džewábi del: Mo aláv “Nái‐but” isí, sóske andé mánde but bengá andré diné.
31A mangén e Isústar o bengá, ta te na phenél lénge, te džan ándo xoripé.
32Othé‐da uprál i planína, (ándo veš) but isí balé, čárjon. Mangén o bengá ta te mukjél len o Ísus, andé lénde, e balénde te den. Mukljás.
33Íkljon katár o murš o bengá, džan, den andé balé, prástan o bengá‐da sígo na‐telé andé jekhé panjéste, tasávdjoven.
34Dikhén o svinárja, so uló, darán, ándi Dis thai ándo gavá našén, so dikhlé, phenén.
35O džené‐da ikístile, alé paš e Isúste, arakhlé e muršés, kai léstar ikístile o bengá, ov‐da e Isúske ko piŗé beštó si, urjavdó, thai i godí alí léskeri. Daránile o džené.
36Lénge‐da phenén o svidételja, sar uló sastó katár o but bengá.
37Thai ándo them e Gadarinéngoro mangélas les o naródos, ta te džal‐peske léndar, sóske but but darán. Ov‐da ándo korábi ukístilo, irisájlo.
38Amá o murš, kai ikístile léstar o bengá, mangélas e Isús, ta te mukjél les, te džal lésa kupáte. O Ísus‐da bičhalél les, te džal‐peske, phenél:
39Irín‐ta, dža te kheréste, savé baré kolá túke kerdjás o Del, váker. Ov‐da, o murš, sa džal ándi Dis, phenél, savé baré kolá kerdjás léske o Ísus.
40Uló so uló, irisájlo o Ísus, posreštínel les o naródos, — sáoŗe žarénas les.
41Aló jek murš léske, o Jairos, ková sas jek baró ándi kangerí, peló e Isúske ándo piŗé, mangél les ta t’aavél paš les ándo kher.
42Sóske isí léske jek čhai, i jekhoŗí léskeri, ói‐da hénos deš‐u‐doné beršéngeri nanái, kamerél. — Ov‐da, o Ísus, phirindós aló, amá e narodóstar hémen na tasávdilo.
43Isí‐da jek džuvlí, deš‐u‐dúi berš nasfalí, o rat láke sa thávdel; po barvalipé sa dinjás e drabengerénde, amí léndar níko naští sastjarél la.
44Alí palál léste, dokačínel o agór e urjaibnáskoro, spirínel pes o thavdipé (thoibé) lákoro andékhora, na thávdel.
45Phenél o Ísus: Ko sí adavká, kai dokandinjás man. Sa phenén: Me nána kerdjóm. Amá o Pétres, thai odolká kai siné paš léste, phendé: Abé Baréja, tesnínel tut o naródos, del turjál thai zagradínel tut, thai phučés‐li: Ko dokačínel man?
46Phenél o Ísus: Néko dokačindjás man, džanáv, sóske ikljólas mándar i síla.
47Axáljovel i džuvlí, naští garavél pes, hem avél, hem lisdrál, perél léske ko piŗé, vakerél mamúi saŗoŗénde sostár dokačínelas les, thai andékhora sástjolas.
48Ov‐da láke phenél: Čhaiíje, katár to pakjoibé ulján sastí; dža‐ta lačipnása.
49Hénos vakerélas, áke aló e kangerjákere načalnikóske dek murš, phenél: Ti raklí mulí; ma ker léske zaxméti.
50Šunél o Ísus, phenél e rakljákere dadéske: Ma‐dar, sámo te pakjés, thai ói kasástjol.
51Ándo kher kána aló, nikás nána mukél paš péste, sámo o Pétres, o Jákov thai o Ivános, e dadésa jekhethané, thai i dai‐da, e rakljákeri, den andré.
52Sáoŗe runé asál láke, runé kai runé. Ov‐da vakerél: Má‐rovén, i čhai mulí nanái, amí sovél.
53Ol‐da asánile léske, sostár džanén kai ói mulí.
54Ov‐da lel o vast lákoro, pištínel: uxtí‐ta, raklíje!
55Irisájlo láke o dúxos pe trupóste, uxtiní andékhora. Ov‐da phenél ta te den láke te xal maŗó.
56O dad‐da, thai i dai čudisájle. Amí phenél lénge odovká, ta te na izvakerén, so kerdjás.
Actualmente seleccionado:
Lukéstar 8: ARL1912
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© British and Foreign Bible Society