Dəkəcop 5
5
Kəyɛfɛ Adama haŋ Nuha
1Buk ba dokombəra da Adama bɔ bambɛ. Dɔsɔk ndɛ Kanu kəsɛl Adama mɔ, k'ɛsɛl kɔ, pəwurɛnɛ kɔ nkɔn Kanu. 2Wərkun kɔ wəran k'ɛsɛl ŋa, k'ompocɛ ŋa pətɔt, k'ewe ŋa tewe ta «fum,» dɔsɔk ndɛ ɛncsɛl ŋa mɔ.
3Adama endesɔtɔ meren 130, k'ɔsɔtɔ wan wəwurɛnɛ kɔ nkɔn, pəmɔ tɔkɔ eyi mɔ, k'ɔsɔŋ kɔ tewe ta Sɛt. 4Ntɛ Adama oŋkom Sɛt mɔ, k'eyi sɔ doru meren 800, mmɛ ɛnasɔtɔ sɔ awut arkun k'awut aran mɔ. 5Kəwon ka Adama doru kənasɔtɔ meren 930, a k'endefi.
6Sɛt ɛnasɔtɔ meren 105, a k'endekom Enɔs. 7Ntɛ Sɛt oŋkom Enɔs mɔ, k'eyi sɔ doru meren 807, mmɛ ɛnakom sɔ awut arkun k'awut aran alɔma mɔ. 8Kəwon ka Sɛt doru kənasɔtɔ meren 912, k'efi.
9Enɔs ɛnasɔtɔ meren 90 a pədekom Kenaŋ. 10Ntɛ Enɔs oŋkom Kenaŋ mɔ, k'eyi sɔ doru meren 815, mmɛ ɛnakom sɔ awut arkun k'awut aran alɔma mɔ. 11Kəwon ka Enɔs doru fəp kənasɔtɔ meren 905, k'efi.
12Kɔ Kenaŋ ɔsɔtɔ meren 70 a k'endekom Mahalalel. 13Ntɛ oŋkom Mahalalel mɔ, kɔ Kenaŋ eyi sɔ doru meren 840, mmɛ ɛnakom sɔ awut arkun k'awut aran alɔma mɔ. 14Kəwon ka Kenaŋ doru fəp kənasɔtɔ meren 910, k'efi. 15Mahalalel ɛnasɔtɔ meren 65 a k'endekom Yɛrɛdu. 16Ntɛ Mahalalel oŋkom Yɛrɛdu mɔ, k'eyi sɔ doru meren 830, mmɛ ɛnakom sɔ awut arkun k'awut aran alɔma mɔ. 17Kəwon ka Mahalalel doru fəp, kənasɔtɔ meren 895, k'efi. 18Yɛrɛdu ɛnasɔtɔ meren 162 a k'endekom Henok. 19Ntɛ Yɛrɛdu oŋkom Henok mɔ, k'eyi sɔ doru meren 800, mmɛ ɛnakom sɔ awut arkun k'awut aran alɔma mɔ. 20Kəwon ka Yɛrɛdu doru fəp kənasɔtɔ meren 962, k'efi.
21Henok ɛnasɔtɔ meren 65 a k'endekom Metusela. 22Ntɛ Henok oŋkom Metusela mɔ, k'ɔsɔtɔ sɔ meren 300 ŋasol kɔ Kanu. K'oŋkom sɔ awut arkun k'aran alɔma. 23Kəwon ka Henok doru fəp kənasɔtɔ meren 365. 24Kɔ Henok ɛncəmɛ dɔpɔ da Kanu darəŋ, kɔ tende telip, bawo Kanu kənalɛk kɔ pəyi wəyeŋ.
25Metusela ɛnasɔtɔ meren 187 a k'endekom Lɛmɛk. 26Ntɛ Metusela oŋkom Lɛmɛk mɔ, k'ɔsɔtɔ sɔ meren 782, mmɛ ɛnakom sɔ awut arkun k'awut aran alɔma mɔ. 27Kəwon ka Metusela doru kənasɔtɔ meren 969, k'efi.
28Lɛmɛk ɛnasɔtɔ meren 182 a k'endekom wan wərkun. 29Kɔ Lɛmɛk ewe wan wəkakɔ «Nuha.»#5.29 Nuha = cəHebəre «kəyaməs-yaməs» K'oloku: «Wəkawɛ ende pəcyamsɛ-yamsɛ su, kəcɛm-cɛmnɛ ka pucuy mpɛ yɛbəc yocuca nyɛ waca womboc antɔf nyɛ, MARIKI ɛnasɔŋ pəlɛc tetosu mɔ.» 30Ntɛ Lɛmɛk oŋkom Nuha mɔ, k'eyi sɔ doru meren 595. K'oŋkom sɔ awut arkun k'awut aran alɔma. 31Kəwon ka Lɛmɛk doru fəp kənasɔtɔ meren 777, k'efi.
32Nuha ɛnasɔtɔ meren 500 a k'endekom Sem, Ham, kɔ Yafɛt.
Actualmente seleccionado:
Dəkəcop 5: KKK
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/