مَرکاس 15
15
ایسّا پیلاتوسئے دێما
(مَتّا 27:1–2، 11–26؛ لوکا 23:1–7، 13–25؛ یوهَنّا 18:28–40)
1سَباها ماهلّه مزنێن دینی پێشوا، کئومئے کماش، شَریَتئے زانۆگر و سرۆکانی دیوانئے سجّهێن باسک همشئور بوتنت و ایسّااِش بست، گِرّان کرت و پیلاتوسئے دستا دات. 2پیلاتوسا چه آییا جُست کرت: ”تئو یَهودیانی بادشاه ائے؟“ ایسّایا پَسّئو دات: ”تئو وت گوَشگا ائے.“ 3مزنێن دینی پێشوا آییئے سرا بازێن بُهتام جنَگا اَتنت. 4پیلاتوسا پدا جُست کرت: ”په چے پَسّئوَ ندئیئے؟ بچار تئیی سرا چینچُک بُهتام جنَگا اَنت.“ 5ایسّایا هچّ پَسّئو ندات. پیلاتوس هئیران مَنت.
6پیلاتوسا، هر سال ائییدئے وهدا، چه یَهودی بندیگان یکّے، هما که مردمان بلۆٹتێن، آزاتَ کرت. 7بندیگانی تها باراباس نامێن مردے هست‌اَت. گۆن هما آشۆپیان گِرگ بوتگ‌اَت که شۆرشے وهدا هۆن و کۆشِش کرتگ‌اَت. 8مردم، پیلاتوسئے کِرّا آتکنت، دَزبندی‌اِش کرت و گوَشتِش: ”هر دابا که تئو گوَستگێن سالان کرتگ، اِمبری هم هما دابا بکن.“ 9پیلاتوسا جُست کرت: ”شما لۆٹێت که یَهودیانی بادشاها په شما آزات بکنان؟“ 10آییا زانتگ‌اَت که دینی پێشوایان، ایسّا په هَسَدّ و کُنّت آییئے دستا داتگ. پمێشکا چُش گوَشتی. 11بله دینی پێشوایان مردم شۆرێنت و آشُپێنتنت#15:11 آشُپێنگ، بزان پاد کنگ، تَهریک کنگ. تان چه پیلاتوسا ایسّائے بدلا، باراباسئے آزاتیا بلۆٹنت. 12پیلاتوسا پدا جُست کرت: ”گڑا اے مردا که شما آییا یَهودیانی بادشاهَ گوَشێت، چۆن کنان؟“ 13مردمان کوکّار کرت: ”سَلیبی کَشّ!“ 14پیلاتوسا جُست کرت: ”چیا بارێن؟ مئیاری چے اِنت؟“ بله آیان گێشتر کوکّار کرت: ”سَلیبی کَشّ!“ 15گڑا پیلاتوسا، که لۆٹتی مردمان چه وت رزا بکنت، باراباس آزات کرت و ایسّا، شلّاک جناێنت و داتی که سَلیبئے سرا بدْرنجنتی.
ایسّائے سرا کَلاگ و ریشکند
(مَتّا 27:27–31؛ یوهَنّا 19:1–3)
16سپاهیگان، ایسّا والیئے کۆٹ و ماڑیئے پێشگاها برت و سپاهیگانی سجّهێن لشکر لۆٹت و مُچّ کرت. 17آیان، بادشاهی جَمورنگێن#15:17 جَمو، رنگے که پارسیا بنفش و اردوا بنفشی گوَشنتی. کَباهے ایسّائے گوَرا دات، چه ڈَنگر و کُنٹگان تاجے جۆڑێنت و آییئے سرا اێر کرت. 18گۆن کَلاگ و ریشکندے، شرپ و اِزّت دات و گوَشتِش: ”سلام و درۆت، و یَهودیانی بادشاه!“ 19لَٹِّش سرا جت، دپ و دێمان تُکّ جت و سُجده‌اِش کرت. 20وهدے کَلاگ و مَلنڈِش هلّێنت، گوَرئے جَمورنگێن کَباهِش کَشّت و آییئے جندئے گُدِش پدا گوَرا داتنت. رندا، دێم په سَلیب کَشّگا برتِش.
ایسّا و سَلیب
(مَتّا 27:32–44؛ لوکا 23:26–43؛ یوهَنّا 19:17–27)
21هما وهدا، کِرینیئے شهرئے#15:21 کِرینیئے شهر اَنّوگێن زمانگئے لیبیائے مُلکا اِنت. شَمون نامێن مردے، که اِسْکَنْدَر و روپُسئے پت اَت، چه کِشاران دێم په شهرا آیگا دیستِش. سپاهیگان په بیگار گپت که ایسّائے سَلیبا بَڈّا بکنت. 22آیان، ایسّا هما جاگها آورت که نامی ”جُلْجُتا“ بزان ”کامپۆل“ اِنت. 23گڑا، شرابِش مُرّ مان کرت و په ورگا دات، بله ایسّایا نئوارت. 24نون سَلیبئے سرا دْرتکِش، پُچّ و پۆشاکِش وت‌مان‌وتا بهر کرتنت و شرتِش بست که بارێن کئیا چے رسیت.
25سُهبئے وهد اَت#15:25 اَسلیگێن یونانی نبشتانکَ گوَشیت: ”سئیمی ساهت“، بزان ساهت نُها. یَهودیانی رۆچئے هساب، ساهت سُهبئے شَشا بُنگێجَ بوت. که ایسّااِش سَلیب کَشّت. 26مئیارنامگئے سرا په آییئے جُرم و مئیارا چُش نبشتگ‌اَت: ”یَهودیانی بادشاه.“ 27ایسّائے همراهیا دو یاگی و دُزِّش هم سَلیبئے سرا دْرتک، یکّے راستێن و دومی چَپّێن نێمگا. 28اے ڈئولا، پاکێن کتابئے هما پێشگۆیی سَرجم بوت که گوَشیت: آ چه رَدکاران زانگ بوت.#15:28 اِشئیا نبیئے کتاب 53:12. لهتێن دَزنبشتا بَند 28 نێست. 29رهگوَزان دژمان دئیان، وتی سر چَنڈێنت و گوَشتِش: ”او مزنێن پرستشگاهئے کرۆجۆک که گوَشتگِت: ’سئے رۆچا پدا آییا اڈَّ کنان‘! 30نون وتا برَکّێن و چه سَلیبا اێر آ!“
31همے پئیما مزنێن دینی پێشوا و شَریَتئے زانۆگر ریشکند و مَسکرا کنگا اَتنت و گوَشتِش: ”آ دگه مردمی رَکّێنتنت بله وتا رَکّێنتَ نکنت. 32بِلّ که مَسیه، اِسراییلئے بادشاه، نون چه سَلیبا اێر بکپیت تانکه ما بگندێن و باور بکنێن.“ آ دوێن هم که گۆن آییا دار کَشّگ بوتگ‌اَتنت، ایسّایا بَد و رَد گوَشگا اَتنت.
ایسّائے مَرک
(مَتّا 27:45–56؛ لوکا 23:44–49؛ یوهَنّا 19:28–30)
33نێمرۆچا بگر تان بێگاهئے سئیا،#15:33 اَسلیگێن یونانی نبشتانکَ گوَشیت: ”ششمی ساهتا بگر تان نُهمی ساهتا“، بزان مرۆچیگێن ساهتانی هسابا، نێمرۆچئے دوازدها بگر تان بێگاهئے سئیا. سجّهێن مُلک اَناگت تهار بوت. 34بێگاهئے ساهت سئیا،#15:34 اَسلیگێن یونانی نبشتانکَ گوَشیت: ”نُهمی ساهتا“. ایسّایا چیهال#15:34 چیهال، بزان دردناکێن کوکّار. جت: ”اِلویی، اِلویی، لِما سَبَکْتَنی؟“ (بزان: او منی هُدا، او منی هُدا! تئو چێا منا تهنا اِشت؟)#15:34 زَبور 22:1. 35اۆدا نزّیکّا، لهتێن اۆشتاتگێن مردما وهدے اِشکت، گوَشتِش: ”بچارێت، اِلیاسا تئوار کنگا اِنت.“ 36چه آیان یکّے تچانا شت، اِسْپنجے زرت و تْرُپشێن شرابا میسّێنتی. اِسْپنجی دارێئے سرا بست و په چوسّگا ایسّائے نێمگا شهارت و گوَشتی: ”سَبر کنێت، بچارێن بارێن اِلیاس اِشیئے رَکّێنگا کئیت یا نه؟“ 37گڑا، ایسّایا بُرزێن تئوارێا چیهال کَشّت و ساه دات. 38همے وهدا، مزنێن پرستشگاهئے پرده، بُرزادا بگر تان جَهلاد دِرت و دو بهر بوت. 39هما پئوجی اَپسر که ایسّائے دێم په دێما اۆشتاتگ‌اَت، وهدے دیستی که آییا چۆن ساه دات، گڑا گوَشتی: ”بێشکّ اے مرد هُدائے چُکّ اَت.“
40لهتێن جنێن دور اۆشتاتگ و چارگا اَت، گۆن آیان، مَریم مَجْدَلیَه، کَسانێن آکوب و یوشائے مات مَریم و سالومه گۆن اَتنت. 41وهدے ایسّا جَلیلا اَت، اے جنێن آییئے همراه اَتنت و آییئے هِزمت و چلۆپگِش کرتگ‌اَت. اَبێد چه اِشان، دگه بازێن جنێنے هم اۆدا اَت که آییئے همراهیا اورشَلیما آتکگ‌اَتنت.
ایسّائے کَبر و کَپن
(مَتّا 27:57–61؛ لوکا 23:50–56؛ یوهَنّا 19:38–42)
42آ رۆچ، جُمَهئے رۆچ اَت و مردم، په شَبَّتئے رۆچئے آرام کنگا، وتا تئیار کنگا اَتنت. 43ایسُّپ نامێن مردے که اَریماتیائے شهرئے نندۆک اَت، سرۆکانی دیوانئے اِزَّتمندێن باسکے اَت و وت هم هُدائے بادشاهیئے رَهچار و وداریگ اَت. جُمَهئے بێگاها پیلاتوسئے کِرّا شت و گۆن بهادُرّی و دِلێری، ایسّائے جۆنئے برگئے اِجازتی لۆٹت.
44وهدے پیلاتوس سَهیگ بوت ایسّا چۆ زوتّ مُرتگ، هئیران و هَبَکَّه مَنت و پئوجیانی مستری لۆٹت تان بزانت که ایسّا مُرتگ یا نه؟ 45پئوجیانی مسترئے سجّهێن هال و هبرانی اِشکنگا رَند، ایسّائے جۆنئے برگئے اِجازتی دات. 46ایسُّپا، لیلُمێن گُدے بها گپت و آورت، آییئے جۆن چه سَلیبا اێر گێتک و هما گُدئے تها کَپن کرت. کَبرێئے تها که چه پێسرا چه تَلارا#15:46 تَلار، بزان مُهر و مزنێن سنگ، سِنگێن کۆهی ٹُکّر. تْراشگ و تئیار کنگ بوتگ‌اَت، ایسّایی کَبر کرت و مزنێن ڈۆکے لێٹ دئیانا کَبرئے دپا اێر کرت. 47مَریم مَجْدَلیَه و یوشائے مات مَریم، هر دوێنان دیست که آاِش کجا کَلّ کرت.
Actualmente seleccionado:
مَرکاس 15: HPKB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016-22 Wycliffe Bible Translators, Inc.