Lucas 20
20
Tsuã mia kuxipa inaĩma mĩ aki ikai? akĩ Jesus yukanibukiaki, na hãtxarã
(Mt 21.23-27; Mc 11.27-33)
1Hanushũ shaba betsatiã Templo hemaĩtĩ anushũ Jesusũ yura itxapabu kakape yuikĩ hatu yusĩayã Deusbe hawenabu hãtxashunika shanẽ ibubu inũ, Deusũ hãtxa kenenibu yusĩnanãmisbu inũ mae shanẽ ibu beshmasbũ Jesus nemanũ ika haki kemashũ 2habũ yukakĩ:
—Na mĩ eska wairã, tsuã hawẽ kuxipa mia yunuimawẽ mĩ aki ikai? Tsuã hawẽ kuxipa mia inaĩmamẽ, mĩ haska wanunã?— akabu
3Jesusũ hatu kemakĩ:
—Ẽtseri ẽ matu yukai ea yuikãwẽ— itã 4—Naximanika Joãonẽ hau hatu naximanũ yunukinã, tsuã kaya yunuyama mã xinaĩ, Deusraka, huniburaka? Ea dukũ yuikãwẽ— hatu wa
5hanua haburi hune yuinamekĩ:
—“Deusũ yunuyamaki”, nũ warã, “Haskakĩ Joãonẽ hãtxa mã ikũwãma ikimamẽ?” iwanã, nuku kũyã atiruki. 6Hamẽ yura mirimabũ Deusũ João yunuyamakiri habũ ikũwaĩbuwẽ taea habuki datekĩ yuikĩ: “Hunibũ yunuyamaki”, nũ ikaya mixkiwẽ nuku tsaka tsaka akĩ nuku tenãtirubuki— itã 7hanushũ habũ Jesus yuikĩ:
—Tsuãra João yunuyama nũ unãmaki— akabu 8Jesusũ hatu yuiriakĩ
—Haskakenã, tsuãra hawẽ kuxipawẽ ea yunuimarã, eãri ẽ matu yuiamaki— hatu watã,
Dayakapabu mekenika besumakiri Jesusũ hatu yusĩnikiaki, na hãtxarã
(Mt 21.33-44; Mc 12.1-11)
9hanushũ yura itxapabũ Jesus nĩkanũ ika beabu miyuiwẽ Jesusũ ana hatu yusĩkĩ:
—Huni betsã bai washũ uva bimi batapa banatã hau bimi dabukũ ea inãshanũbũ, iwanã, huni betsa dayakapabube habube yubakatã ibu keska wakĩ inãyubaini txai kaimakẽ 10hanu ma kani tsekatitiã ikaya bai ibuã hawena dabukũ hau yukatã ea bishũtanũ, iwanã, hawẽ tsuma betsa yunua ka habũ hawena inãkatsi ikama uva bimi mekeabũ atxishũ kuxa kuxa ashũ hawa inãma mais nitxiãbu kaya 11hanushũ bai ibuã ana hawẽ tsuma betsa yunuria ka hari inãshũkatsi ikamari habũ kũyã akĩ kuxa kuxa ariatã hawa inãma mais nitxĩriabu kakẽ 12hanua bai ibuã hawẽ tsuma betsa yunua ka habiaskari wakĩ dera dera atã kene petxiuri putabu isĩ tenei kakẽ 13atimas bai ibuã xinãkĩ: “Hawa haska washãpa?” itã, “Haskakenã ẽ huni bake ẽ abuhairai ẽ yunua ka haki mesekĩ ẽ bimi dabukũ ea inãshãkanimẽkaĩ”, iwanã, xinãtã nitxiã kai 14hawẽ bake hatuki kemai kai betxitã yuinamei: “Bai ibu mawaxĩkẽ na hawẽ bakẽ hawẽ bai tibi inũ hawẽ hiwe tibi dasibi hawenawayuikiki. Na bai nukunas nũ wanũ tenãnãkãwẽ”, ishũ 15atxibaĩ bai nekishũ tenãbũ haska waxinabũ ha bai ibuã haskara hatu washanimẽkaĩ? Matu yuinũ nĩkakãwẽ. 16Bai ibu kashũ hatu kupiriakĩ dayakapabu hatu tenã keyutã hanushũ dayakapa betsabu hawẽ bai hatu yunushanikiki— hatu wai nĩkai e itã yuikĩ:
—Hau hatu haska wayamashanũwẽ— ikaibu 17Jesusũ hatu beiskĩ yuikĩ:
—Ha Deusũ hãtxa Isaíasĩ kenenirã, haskara hakiri mã xinãmismẽ? eska yuinirã: ‘Hiwe wanikabũ mixki danãbiaibũ habias mixki Deusũ bishũ
deshũ makeresh wakĩ hawẽ kene mestẽwã keska wakĩ
nuku duawakĩ nuku ashũshanikiki’,
anirã. 18Eskaki, nĩkakãwẽ. Tsuara ha mixkiki sinatakĩ ea maemanũ ika mixki mamaki kawana teke teke ika itiruki. Hakia ha mixki haratukira kawani haki tĩ ikĩ txuxakĩ mixpu washanikiki— hatu waya
19hanushũ Deusbe hawenabu hãtxashunika shanẽ ibubu inũ Deusũ hãtxa kenenibu yusĩnanãmisbũ Jesusũ dayakapabu txakabubukiri miyuiwẽ hatukiri hãtxai habũ nĩkakĩ unãtã haskaitiã Jesus atxikatsis ibiai yurã kaiãki datekĩ hawa meama mapushũ uĩkĩ
Governo pei bishũmisbukiri Jesus yukanibukiaki, na hãtxarã
(Mt 22.15-22; Mc 12.13-17)
20haskawẽ unãti watã txitetã Romano shanẽ ibu Pilatos anu ha amakatsi Jesus paranũ ishũ huni betsabu Jesusũ unãriama judeubũ hatu yunukĩ hau huni pepa itsakĩ habũ unãti watã Jesus yukakĩ yuimakatsi nawa shanẽ ibu hau atximashanũ yunuabu 21Jesus anu bushũ parãpaikĩ yuikĩ:
—Yusĩnaã, hunibũ hatu kẽwãmamisbu keskama txanima hãtxa besti yusĩkĩ haska wakĩ Deus txibãtirubu besti mĩ shabakabi hatu yusĩkubaĩmis nũ unaiĩ. 22Haskawẽ taeshunã, haskara mĩ xinaĩmẽkaĩ mia yukapa? Ha Romano shanẽ ibu Césarn nuku pei yukamisrã, haska wanãshãpa? Ana pakanãshãpa? Pakatimaraka?— aki
23haki beparamebainabu Jesusũ unãkĩ hatu yuikĩ:
—Haskakĩ mã ea parãkatsis ikanai? 24Hawẽ governo imposto pakati pei heshe betsa ea uĩmakãwẽ— hatu wa beshuãbu uĩkĩ Jesusũ hatu yukakĩ: —Narã, tsuã besu inũ tsuã kena neamẽ? Ea yuikãwẽ— hatu wa habũ yuikĩ:
—Romano shanẽ ibu Césarnaki— akabu 25Jesusũ hatu yuikĩ:
—Césarnawẽ taeshũ matũ shanẽ ibu César duawakĩ hawẽ governo dayashũmisbu pei hatu inãshũkubaĩkãwẽ. Hakia Deusri duawakĩ hawẽ yusĩa txibãkĩ hawara abuai ashũriakubaĩkãwẽ— hatu waya 26yurã kaiãnẽ nĩkaya habũ atxikatsis ikĩ unãti wabiabu haska washũ parãkĩ kanematima nawabũ nĩkatã mĩ atirumaya Jesusũ hãtxawẽ e itã haska watima pes mapuabũ
Ana bestẽshanaibukiri saduceubũ Jesus yukanibukiaki, na hãtxarã
(Mt 22.23-33; Mc 12.18-27)
27hanua saduceubu judeubu pashka betsa: “Ha mawabu hawẽ yura tsua ana besteĩsmaki”, imisbu Jesus anu haburi beshũ yukakĩ:
28—Yusĩnaã, Moisés nuku keneshũtanã, eska nuku baxishũbainiki: “Huni betsa aĩyãtã huni bakeyariama mawakẽ hanua hawẽ betsã aĩ hanubi aĩwãtã huni bakewashũtiki, hawẽ betsa mawaimatũ kena dabikinã”, nuku waniki. 29Haskakiri ha hawẽ sete betsabukiri mia yuinũ nĩkawe. Ha dukũ iuwatũ aĩbu betsa aĩwãshũ huni bakewariama mawakẽ 30ha katxukeatũ hawẽ betsã habias aĩbu aĩwãshũ huni bake wariamari mawakẽ 31ana ha katxukeatũ hawẽ betsã aĩ habiari aĩwãriatã huni bake wariamari mawakẽ hanua ha sete hawẽ henekĩ habias aĩburi bishũ habu tibibũ hawa huni bake bawabuma mawai keyuabũ 32hanua hawẽ henei aĩbu huni bake biamas mawarianiki. 33Ha haskaniburã, mawabu ana besteaĩbutianã, ha aĩbu bestitxai ha huni setebũ aĩwaniburã, haratutũ kaya ana ha aĩbu bishanimẽkaĩ?— akabu
34Jesusũ hatu kemakĩ:
—Na habiatiã beneyai inũ aĩyaĩ mã hiweabuki. 35Hakia Deusunabu kayabi ana hatu unãti wakĩ bestẽwaĩtianã, habe hiwei hau benimai hiwenũbũ Deusũ hunibu inũ aĩbu hatu bestẽwanã, haria ana aĩyaĩ inũ beneyama ishãkanikiki. 36Hanua Deusunabu kayabi ana besteãbuwẽ taea Deusũ nai tsumabu keska beneuma inũ aĩyuma hiweshãkanikiki, ana mawamarã.
37Mawakubainaibu ana bestẽshanaibukiri Moisés yusĩni matu yuinũ nĩkakãwẽ. Hi mashu kua here hi ikai anushũ mawanibu ana hatu bestẽwaĩ kakatsi ikĩ Deusũ Moisés yuia kenekinã, eska waniki: “Earã, natiã ẽ Abraãonẽ mekenikaki. Ẽ Isaquẽ mekenikaki. Ẽ Jacõ mekenikariki”, ikai nĩkayamashũ Moisés kenenirã, mã uĩkĩ yuismamẽ? 38Deusrã, mawabunamaki. Hakia hiweabunaki. Haskakẽ Abraão inũ Isaque inũ Jacó hatũ yushĩ hiweabuki. Txipu ana yura bena Deusũ hatu inãshanai xinãma mã kanehairamiski— hatu waya
39hanua Deusũ hãtxa Moisés yusĩa keneni yusĩnanãmis betsabũ Jesus yuikĩ:
—Yusĩnaã, mĩ pe hatu yuishuki— akaya 40hanushũ tsuã ana hawa betsa yukabumakẽ
Messiaskiri Jesusũ hatu yukanikiaki, na hãtxarã
(Mt 22.41-46; Mc 12.35-37)
41ha unãnepabu habu mapuabu Jesusũ hatu bepushumakĩ yukakĩ:
—Deusũ hãtxa kenenibu yusĩnanãmisbũ matu yusĩkĩ yuikĩ: “Messias Cristorã, Davĩ baba ishanikiki”, ikĩ haskakĩ matu haska yusĩmisbumẽ? 42-43Nukũ shenipabu pepa Davĩ Salmos anu keneni matu yuinũ nĩkakãwẽ:
‘Deus kuxipa dasibi binuatũ ẽ shanẽ ibu Messias yuikĩ:
Miki sinataibu ẽ hatu maemariama manai ẽ yusiuri tsauyuwe’,
aniki. 44“Messias ẽ shanẽ ibuki”, Davĩ abianikẽ haskatã hawẽ shanẽ ibu hanubi hawẽ baba itirumẽ? Ea yuikãwẽ— hatu wa hawa yuiabumakẽ
Deusũ hãtxa kenenibu yusĩnanãmisbu Jesusũ hatu txitenikiaki, na hãtxarã
(Mt 23.1-36; Mc 12.38-40; Lc 11.37-54)
45yurã kaiãnẽ Jesus nĩkariaibũ hawẽ tsumabu Jesusũ yuikĩ:
46—Deusũ hãtxa kenenibu yusĩnanãmisburã, hatu uĩrakãwẽ. Hatũ tari txaipa hawẽrua sawea mae hemaĩtĩ ewapa praça anu ẽ kawanai ea abukĩ ea kẽwãkĩ hau hãtxa pewẽ ea duawanũbũ ika mapumisbuki. Haska inũ, hanu itxati hiwe anu hikikaĩ haki tsauti pepa hanu dasibibũ hatu uĩtirubu anu tsaukatsis imisbuki. Ha inũ, itxatã pinũ, iwanã, hanu shanẽ ibubu dakai bashti ishũ pimisbu benariamisbuki. 47Haska inũ, aĩbu hawẽ benẽ shũnunitũ hawẽ hiwe bianũ, ishũ, aĩbu paraĩ beparani Deusbe hãtxai txaipahairakubaĩmisbuki. Haskamisbuwẽ taeshũ habu Deusũ hatu kupihairashanikiki— itã
Actualmente seleccionado:
Lucas 20: cbsBR
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.