Gênesis 18
18
Abraão Sara bake bimashanaikiri Deusũ yubanikiaki, na hãtxarã
1Abraão Manre ni shukua merã hawẽ tari hiwe nitxĩshina hiwea ma bari mananãbikẽ hawẽ shui hikiti utanu tsaukẽ Senhor Deus haki nukuyuaya 2Abraão bewenikitã ha bebũ huni dabe inũ besti mapuabu hatu betxitã hatu inũ ika beni kushikaini hatuki nukutã hawẽ beya txibaĩ dãti iki beti itã 3Abraão hatu yuikĩ:
—Shanẽ ibuũ, mĩ huai?— hatu wa dami yura kayabitã ha meranua Deus hãtxai:
—Ẽ huaii— ikaya Abraão nemakĩ yuikĩ:
—Ẽ mĩ tsumarã, ea betxipaikinã, ea binũbaini hawaira kayamawe. 4Mã haska betxipaiairã, mã hutxukinũ ũpash matu bishũtãpa? Haskatã ha hi utapã namã tsauyukãwẽ, huĩrukuinã. 5Ẽ hiwe anu mã ma hushuki. Earã, ẽ matũ tsumaki. Mã ana punu kushinũ piti bishũ matu pimayunũ manakãwẽ, hanua huĩrukũtã ana butãkãshunã— hatu wa
—Haska mĩ nuku wairã, peki— akabu 6hawaira hawẽ hiwetã hikitã hawẽ aĩ Sara yunukĩ yuikĩ:
—Menã hawaira 20 quilo shekiwã duru pepa bitã misi ea washũwẽ— aka 7hanua hawaira ina awa mapua anu kushikaini kashũ hawẽ bake pepa babupa betxitã atxitã beshũ hawẽ tsumabu yuikĩ:
—Hawaira bawakãwẽ— iwanã hatu inã 8hawaira bawashunabu awa txutxu inũ, misi inũ, nami beshũ hatu tsaushũtã hi utapã namã nishũ hatu uiã pikĩ menetã 9Abraão yukakĩ:
—Mĩ aĩ Sararã, hanimẽ?— akabu
—Tari hiwe uke merãki— hatu wa 10ana betsã yuikĩ:
—Txanima ana bari betsa binutã hushũ ẽ mia merabewaya mĩ aĩ kayabi Sarã huni bake bishanikiki— aka
11-12Abraão mestebuhaira inũ hawẽ aĩ Sara yushabuhaira ana himi ikamawẽ taea uke merã tari hiwe meranua dayakĩ hãtxaibu Sarã nĩkatã hawẽ huĩti merãs hawẽ shinanẽ usaĩ:
—Ẽ bene mestebuhairaki. Earã, ẽ yushabuki. Haska dabe ana benimai txutanamekĩ nũ bake bitirumẽ?— ikaya 13-14hanushũ haska Sarã shinaĩ Senhor Deusũ unãkĩ Abraão yuikĩ:
—Haskai Sarã nuku ikũwãma usãmẽkaĩ: “Ẽ yushabubia ẽ bake bitã kaĩshanai?” ikirã? Earã, ẽ habia matũ mekenika Deuski. Earã, Senhor Deus kushipahairatũ hamapai sharabu ẽ atiruki. Txanima mia ashũtiruki. Ana bari betsatiã ana hushũ ẽ matu uĩyuaya ẽ kushipawẽ Sarã huni bake bitã hayashanikiki— aka 15Sara datekĩ parãtiru dabanẽ yuikĩ:
—Ẽ usãmarukaĩ!— ikaya hanushũ Senhor Deusũ ana kemakĩ:
—Haskamaki. Ẽ unaiĩ. Mĩ usãshuki— akĩ Sara yuinikiaki.
Abraão Sodoma nawabuwẽ nuikĩ Deus hatu yukashunikiaki, na hãtxarã
16Hanua ha hunibu benitã Sodomakiri uĩ bui hariri buaibu hatu uĩmanũ ika Abraão hatube kai bai putxinĩshũ buaibu hatu nitxĩ kaya 17-18hanua Senhor Deusũ shinãkĩ: “Abraão enabu pa wakĩ ẽ hatu itxapa washanaii. Abraãowẽ taeshũ yura shukuabu dasibi ẽ hatu pepawashanaii. Haskawẽ taeshũ haska Sodoma inũ Gomorra anu ẽ aki kai ẽ Abraão hunetirumaki. 19Ẽ Abraão katuawẽ taeshũ txipu hatũri hawenaburi ẽ yunua txibãkĩ hatu yunua pepakĩ kaneama txibaĩbu haska ẽ hãtxashu eãri Abraãowẽ taeshũ ẽ hatu merabewakĩ ashũpakeshanaii”, itã 20hanushũ Senhor Deusũ Abraão yuikĩ:
—Txanima Sodoma nawabu inũ Gomorra nawabu txakabuhairamisbuki. Habu itxakanikanamei kũyã iki sinatanamemisbukiaki. 21Haskamisbu ẽ nĩkamis ẽ hari uĩ kaii. Hatũ txakabu txanimamẽkaĩ ẽ uĩshanaii— aka
22-24huni dabe besti Sodomakiri buaibũ Senhor Deusũ besuuri Abraão nishũ hatukiri nemakĩ yukakĩ:
—Txakabubu inũ pepabu husia mĩ habiati hatu kupi keyushanai? 50 huni pepabu besti Sodoma anu hayatirubuki. Hati pepabu hayabiakẽ dasibi habuya mĩ hatube kupikĩ yama wai kai? 25Mĩ hatu haska wayarã, txakabubu inũ pepabu habiaskas txakabu wamisbu keska wakĩ mĩ hatu tenã keyushanai? Mianã, mĩ hatu haska watirumaki, huni txakabubu inũ pepabu habiaskas kupi keyukinã. Mĩ mai hirabi anu uinikaki. Mĩ pewanikawẽ taeshũ mĩ hatu haska yunuismaki— aka 26Senhor Deusũ yuikĩ:
—Peki. Sodoma anu 50 huni pepabu hayakẽ habuwẽ taeshũ dasibi ẽ hatu tenã keyuama ishanaii— aka 27Abraão ana yuikĩ:
—Uiã. Mĩ ẽ Shanẽ Ibukẽ ẽ hawaumahairabia hatuwẽ nui ẽ ana mibe hãtxaii. 2850 huni pepabu hayama hakia 45 besti hayakẽ dasibi mĩ hatu yamawashanai?— aka ana kemakĩ:
—Peki. 45 yura pepabu hayakẽ Sodoma nawabu habuwẽ taeshũ ẽ hatu kupiama ishanaii— aka 29shinãkubaĩkĩ Abraão ana yuikĩ:
—40 huni pepabu besti hayamẽkaĩ— aka ana Senhor Deusũ kemakĩ:
—Peki. 40 huni pepabu hayakẽ habuwẽ taeshũ ẽ hatu kupiama ishanaii— aka 30nĩkamas ana ea akĩ:
—Eki sinatayamawe. Ana ea akĩ ẽ mia ana yukairã, 30 pepabu besti hayakẽ habuwẽ taeshũ dasibi mĩ hatu kupiriashanai?— aka Senhor Deusũ ana kemakĩ:
—Peki. 30 pepabu hayakẽ ẽ hatu akamaki, kupikinã— aka 31ana ea akĩ:
—Uĩwẽ. Ẽ Shanẽ Ibuũ, mia txikishwabiakĩ ẽ mia ana ea akaii. 20 pepabu besti hayakẽ mĩ hatu haska washanai?— aka Senhor Deusũ ana kemakĩ:
—Peki. 20 pepabu hayakẽ hatuwẽ taeshũ Sodoma ẽ kupiama ishanaii— aka 32ana ea akĩ:
—Eki sinatayamayuwe. Ana bestiwakĩ ea akĩ ẽ mia yukaii. 10 pepabu besti hayakẽ haskara mĩ hatu wai kai?— aka Senhor Deusũ ana kemakĩ:
—Peki. 10 pepabuwẽ taea habuwẽ taeshũ Sodoma nawabu ẽ hatu yamawama iki kaii— atã 33Senhor Deus Abraãobe hãtxa menetã kakẽ hawẽ tari hiwe anu Abraão txĩtũkiranikiaki.
Actualmente seleccionado:
Gênesis 18: cbsBR
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.