Gɔwɔ tɔɔi 12
12
Abramə maa mɛ̨nį
Yálá ə Abramə təli
1Yai-Laa yɛ Abramə ɓa:
«Həɠə ə́ pɔ lɔi, ə́ pɔ taai, ə́ kulɔ ə́ nąn ɲəi bɛlɛ́n ə́ li ɓɛi gáá pai nąą lɛi yɛ́.
2«Gáá pai ə́ kɛi a hį́i tamąą di nąn.
Gáá pai lúwɔ́ tooi yɛ́, ŋą́ ə́ kɛnɛ̨,
ə́ kaa pai kɛi a nu takpɛliɠaa di wɔ lúwɔ́ don.
3Nui a lúwɔ́ too yɛ́, ŋą́ lúwɔ́ too mą,
nui a ə́ nɛ̨ŋɛ̨n nąą, ŋą́ mąą nu nɛ̨ŋɛ̨n nąą.
Hį́i kəlee kaa pai lúwɔ́ hɔlɔɓoi ə́ haalai.»
4Abramə kaa kwɛlan ə kɛ a kwɛlan bow mɛ̨ihveelɛ gɔw lɔɔli, ə hvaa mą, pələi ŋɛ̨i Yai-Laa ə mo la mą, ə muhəɠə lɔ tii, ə kulɔ Haran lɔi hu. 5Abramə ə nɛ̨ą Sarai həɠə, ə bɛlɛ mąnįn Lɔtə ɓa da hɛn gɔw kpɔ kɛ ɲəi, ə mą kɛ huwɔɠaai ə di ya Haran lɔi hu, ə li a gəlee. Ə muhəɠə, ə ɲɛ̨i haŋą Kanaan lɔi hu pələ.
Abramə kɛɛ kɛa Kanaan lɔi hu
Ɓɛlɔwai Abramə ə li la Kanaan lɔi hu, 6Abramə ə nɔi tii hu ɓɔ, ə li ɓɛi ŋɛ̨i a More ɲeeɠaa ɓa, Sisɛmə daai. Kanaan nuą ɓə ni kɛ heeni nɔi tii hu. 7Yai-Laa ə gbɔwɔ lɛ laa Abramə ɓa, yɛ mą: «Kanaan lɔi ŋɛ̨i ɓə gáá pai dɛɛi ə́ huwuhu nuą pɔ a di wɔɔ.» Abramə ə nɛɛ mą, ɓɛi tii di mɛ̨nį ɓo laa mą, ə haláá kulɔi pɛli laa Yai-Laa ɓa. 8Ə həɠə laa ə li Betɛlə taa voló həɠəi pələ, ɓɛ pələi tii yeeɠaa tamąą la, ə haláá kulɔi pɛli ə Yálá hvɛli, yɛ kɛ Yálá laa baa: Yai-Laa. Gɛɛnąąi tii ɓə ə nwɔ taai pu laa, Betɛlə taa da Ai taa di lɔwai. 9Yili pulu, Abramə ə kɛi tɛɛ ɲɛa kɔ́ɔɠaa hu, yɛ li Negɛvə pələ.
10Pulu kɛnɛ̨ ə too nɔi tii hu, bului tii kpɔlu pələ, Abramə ə həɠə yɛ li Eziptə lɔi hu, bulu mąą kilɛi. 11Ɓɛlɔwai ə kɛi lɔ la nɔi tii hu, yɛ nɛ̨ą Sarai ɓa: «Sarai, ə́ wəli tɔɔ! 12Gílí kaa ɉu gɛ́ diɛ ə́ lɛlɛɛi, gwa lɔ Eziptə lɔi hu, nąą nuą da gɔlɔn diɛ nɛ̨ą ɓaa yɛ́, di kaa pai báái, ə gɛ, ə́ lɛɛ di yəi. 13Yili ɓa gwa li, ya kɛ diɛ ə́ ka a mą́ą́ Halá, ə gɛ, di ɉón a nɛlɛɛ ə́ mąą mɛ̨nį ɓa.»
14Ɓɛlɔwai Abramə ə lɔ la Eziptə lɔi hu, nąą nuą di nɛ̨ą kaa nɛlɛɛ. 15Nɔi tii hu tɔɔmun yee mu nuą di nɛ̨ɛ̨nui ti lɛlɛ mɛ̨nį bələ ɓo tɔɔmun ma. Di Abramə nɛ̨ą hon, di paa la dɔɔ kwəlii. 16Nɛ̨ɛ̨nui tii mąą mɛ̨nį ɓa, tɔɔmun ə ɲɛ̨i lɛlɛɛ hee Abramə ɓa. Ə taatɛlɛɛɠaa tɛɛ bɔ: ɓɛlaa, ɓolu da nįŋɛ̨, ə mą kɛ luwɔ hinąą da luwɔ nɛ̨ąą, ə bɛlɛ nwɔ̨nɔ̨ hoohvaalən ɉilɛɠaa da ɉaaɠaa diɛ, da ɲɔ̨nwɔ̨mɛ̨ɛ̨ɠaa. 17Kɛlaa, Abramə nɛ̨ą Sarai mąą mɛ̨nį ɓa, Yai-Laa ə mɛ̨nį nwąnąą laa tɔɔmun ɲəi bɛlɛ́n nuą diɛ. 18Tɔɔmun ə Abramə təli, ə mąąnikɛ, yɛ mą:
«Lə mɛ̨nį ɓə ɲɛ̨i ə́ gɛ a ɲą́ą́i? Lə mɛ̨nį ɓa hvo kɛ gílaa pɔ̨nɔ̨ li yɛ́ kɛ mą́ą́ ə́ nɛ̨ą ɓaa Sarai? 19Lə mɛ̨nį ɓa ə́ kɛ mą́ą́ ə́ mąąhala ɓaa Sarai? Yɛ́ gɛ gɛ́ ɉəɠə a nɛ̨́ą? Yili ɓa, ə́i, ə́ nɛ̨ą ka, ɉəɠə ka yaa ka li.»
20Tɔɔmun ə mo nwɔ kɛlaɠaai diɛ, yɛ diɛ: «Ka li ka ɉulɔnui ŋɛ̨i da nɛ̨ą di laa lɛ ɲɛ̨n bələ ɓa, da di yəi hɛnŋaa kəlee.»
Actualmente seleccionado:
Gɔwɔ tɔɔi 12: BKPG
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión