Génesis 8
8
Na pꞌekꞌau eujã ũu–ũu bapꞌeda, pꞌooda
1Mãpai Tachi Akꞌõrepa chupɨria kꞌawaaji Noé ichideerã ome mãikꞌaapa ne–animalaarã barcode pꞌanadapꞌedaa. Nãu eujã ɨ̃rɨ pꞌuapiji pania pꞌoomerã. Mãgá pꞌoo wãji. 2Ewaraa kꞌobɨ edaikꞌa eerepema pania mãikꞌaapa aɨ ɨtꞌaikꞌa eerepema pania waa uchia–e paji. Ma awara Tachi Akꞌõrepa waa kꞌoi chepi–e paji. 3Piakꞌãa pꞌoo wãpa, pꞌoo wãji. Kꞌãima ciento cincuenta wãyaakꞌãri, pꞌoodachi. 4Atane sietede ewari diecisiete ma barco pꞌoo beeji Ararat ee ɨtꞌɨa bɨ ɨ̃rɨ. 5Pꞌoo wãpa, pꞌoo wãpa atane diez parumaa ee nokꞌo unujida.
6Kꞌãima cuarenta parumaa Noepa chi ventana ewatꞌaaji. 7Mãpai pëiji cuervo aba. Mãgɨ́ pariatua wãabaiji, eujã pꞌooru misa. 8Ma tꞌẽepai Noepa pëiji paloma kꞌawaaitꞌee eujã pꞌoo bɨ maa–e pɨrã pꞌoo–e bɨ. 9Mamĩda mãgɨ́ barcodee cheji, eujã unu–e pada perã sãma su–akꞌɨ beeitꞌee. Mapa Noepa juade batau atapꞌeda, barcode tꞌĩupiji. 10Mapa Noepa kꞌãima siete nɨji mãikꞌaapa waya paloma pëiji. 11Mata pꞌãriupodopa ichi kꞌidade olivo pakꞌuru kꞌiru aneeji. Mãgá Noepa kꞌawaji eujã pꞌoo wã. 12Awaraa kꞌãima siete pakꞌãri, ma paloma waya pëiji. Mamĩda waa che–e paji.
13Noé seiscientos un años iru bakꞌãri, eujã pꞌoodachi. Naapema atanede naarapema ewaride Noepa ma barco techo ewatꞌaaji mãikꞌaapa eujã pꞌoo bɨ unuji. 14Atane omeede ewari veintisietede eujã pia pꞌoo beeji.
15Mãpai Tachi Akꞌõrepa Noemaa mãgaji:
16—Uchiapáde aji, barcodeepa pɨ wẽra, pɨ warrarã pɨ ãiguurã ome. 17Ichiaba uchiapíji jõmaweda ne–animalaarã parã ome barcode pꞌanadapꞌedaa; ipanaarã, ne–animalaarã taunomaa, tausaaree mãikꞌaapa eujãde bipa urtꞌĩu nĩuteepata paara. Ichiakꞌau bɨpáde aji, mãgɨɨrã wãdamerã na pꞌekꞌau eujã jõmaade mãikꞌaapa warrarã chokꞌara oodamerã.
18Mãpai Noé, chi wẽra, chi warrarã chi ãiguurã ome ma barcodeepa uchiajida. 19Ichiaba ne–animalaarã taunomaa, tausaaree, eujãde bipa urtꞌĩu nĩuteepata mãikꞌaapa ipanaarã aukꞌa uchiajida.
20Aɨ tꞌẽepai Noepa altar mãudee ooji Tachi Akꞌõre–itꞌee. Mãpai ataji ne–animalaarã mãikꞌaapa ipanaarã Tachi Akꞌõre–itꞌee paapatadepema; mãgee kꞌĩra chaadepema aba. Mãpai ma ne–animalaarã peepꞌeda, paa jõji ma altar ɨ̃rɨ Tachi Akꞌõre–itꞌee. 21Tachi Akꞌõrepa ma nari ɨ̃kꞌãri, tꞌãri o–ĩa beeji mãikꞌaapa ichi tꞌãridepai kꞌĩsiaji: “Waa eujã ũupi–e paitꞌee. Eperãarã kꞌũtrãaweda ne–inaa kꞌachia ooi awaa pꞌanɨ mĩda, waa mãgá jõpi–e paitꞌee. Aukꞌa ne–animalaarã waa mãgá jõpi–e paitꞌee. 22Na pꞌekꞌau eujã bɨ misa, ne–uudaitꞌee mãikꞌaapa ewadaitꞌee; jĩsua oodaitꞌee mãikꞌaapa jɨa chedaitꞌee; paraaitꞌee kꞌoijara mãikꞌaapa pꞌoojara; ãstaawa, pꞌãrikꞌua paara.”
Actualmente seleccionado:
Génesis 8: sjaB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2005, 2010, 2015 Wycliffe Bible Translators, Inc. All rights reserved.