Luké 7
7
1PEA kuo ‘osi ‘ene ngaahi tala kotoa pē kae fanongo ‘a e kakai, pea ne toki ‘alu ‘o hū ki Kāpaneume. 2Pea na‘e ai ha senituliō ‘e taha, kuo puke ‘o tei mate ‘ene pōpula, ‘a ia na‘a ne mahu‘inga‘ia ai. 3Pea kuo fanongo ia ko Sīsū, na‘a ne fakafai ‘i ha mātu‘a ni‘ihi ‘o e kakai Siu ‘ene kole kiate ia, ke ha‘u ‘o faito‘o ‘ene pōpula. 4Pea nau omi kia Sīsū, ‘o nau kole fakamātoato kiate ia, ‘o pehē, Ko e tangata ‘eni ‘oku taau ke ke fai ki ai ‘a e me‘a: 5he ‘oku ne ‘ofa‘i hotau kakai, pea na‘a ne langa ‘e ia pē hotau falelotu.
6Pea ‘alu ‘a Sīsū mo kinautolu. Pea kuo ne mei a‘u ki he fale, mo e fekau ange ‘e he senituliō ha kāinga ni‘ihi ke lea kiate ia, ‘o pehē, ‘Eiki, ‘oua na‘a ke ongosia me‘a mai: he ‘oku ‘ikai te u taau ke ke hū ki hoku poko‘i fale: 7pea ko ia foki na‘a ku pehē ai ‘oku ou ta‘etaau ke ‘alu atu kiate koe: ka ke fai pē ha fo‘i folofola, pea ‘e mo‘ui ‘a ‘eku tamaio‘eiki. 8He ko au foki ko e tangata ‘oku fakaongo ki ha pule, pea ‘oku ai ha kau sōtia ‘oku fakaongo kiate au; pea u pehē ki ha taha, ‘alu, pea ‘alu ia; pea ki ha taha, Ha‘u, pea ne ha‘u; pea u pehē ki he‘eku pōpula, Fai ē, pea ‘oku ne fai.
9Pea ‘i he fanongo ‘e Sīsū ki he me‘a ko ia, na‘a ne ofo ‘i he tangata; pea tafoki ia ki he fu‘u kakai na‘e muimui mai, ‘o ne pehē, ‘Oku ou tala atu, Na‘a mo ‘Isileli, na‘e ‘ikai te u ‘ilo ai ki ha tui ‘oku pehē fau.
10Pea ‘i he foki ki he fale ‘a e kakai na‘e fekau, na‘a nau ‘ilo ‘a e pōpula, kuo mo‘ui.
Ko e Tamasi‘i ‘a e Fefine Uitou
11Pea ko e ‘aho na‘a na feholoi,#7.11 ko e ‘aho… feholoi: ‘Oku pehē ‘i hono ngaahi hiki fuoloa ‘e ni‘ihi: fuoloa si‘i mei ai. na‘a ne ‘alu ki he kolo ‘oku hingoa ko Neini; pea na‘e fononga mai ‘ene kau ako, pea mo ha fu‘u kakai. 12Pea ‘i he‘ene ofi ki he matanikolo, ‘iloange, na‘e fata mai kitua‘ā ha pekia, ko e tama pē toko taha ia ‘a ‘ene fa‘ē, pea ko e fefine uitou ia: pea na‘e ‘iate ia ha kakai tokolahi ‘o e kolo. 13Pea ‘i he mamata ‘e Sīsū ki he fefine, na‘e langa hono fatu ‘i he ‘ofa ki ai, ‘o ne pehē kiate ia, ‘Oua ‘e tangi. 14Pea ne ‘alu atu ‘o ala ki he fata; pea tu‘u pē ‘a e kau fata. Pea ne pehē, Tama, ‘oku ou tala atu, ke ke tu‘u. 15Pea nofo hake ‘a e ‘anga‘anga, ‘o kamata lea, pea ne tuku ia ki he‘ene fa‘ē.
16Pea mo‘u ilifia ‘a e kakai kotoa pē: ‘o nau fakamālō‘ia ‘a e ‘Otua, ‘o nau pehē, Kuo tupu ‘i hotau lotolotonga ha palōfita lahi: mo ‘eni, Kuo ‘a‘ahi ‘a e ‘Eiki ki hono kakai.
17Pea pavake ‘a hono ongoongo ko ia ‘i Siutea kātoa, kae‘uma‘ā ‘a e feitu‘u kotoa ko ia.
Ko Sione Papitaiso
(Māt 11.1-19)
18Pea talanoa kia Sione ‘e he‘ene kau ako ‘a e ngaahi me‘a ko ia kotoa pē. 19Pea ui ange ‘e Sione ha tokoua ‘o ‘ene kau ako, ‘o ne fekau ‘a kinaua ki he ‘Eiki ke pehē kiate ia, Ko koe ia na‘e pehē ke ha‘u? Pe te tau ‘amanaki ki ha taha?
20Pea ‘i he a‘u mai ‘a e ongo me‘a kiate ia, na‘a na pehē, Ko Sione Papitaiso kuo ne fekau mai kimaua kiate koe; pea ko ‘ene me‘a mai, pe ko koe ia na‘e pehē ke ha‘u, pe te tau ‘amanaki ki ha taha?
21Ko e feitu‘ula‘ā ko ia na‘a ne fakamo‘ui ‘a e tokolahi mei he ngaahi mahaki, pea mo e ngaahi me‘a fakamamahi, mo e ngaahi fa‘ahikehe, ‘o ne ‘ofa ki ha ni‘ihi kui, ‘o faka‘ā. 22Pea tali ‘e ia ‘o ne pehē ki he ongo me‘a, Mo ō, ‘o fakahā kia Sione ‘a e ngaahi me‘a ‘oku mo mamata mo fanongo ki ai; ‘oku ‘ā ‘a e kui, ‘eve‘eva ‘a e heke, fakama‘a ‘a e kilia,#7.22 fakama‘a ‘a e kilia; Vakai ki he 5.12. ongo ‘a e tuli, fokotu‘u ‘a e pekia, pea ‘oku malanga‘aki ‘a e ongoongolelei ki he masiva.#‘Ais 35.5-6; 61.1 23Pea monū‘ia ā ka ko ia ‘oku ‘ikai tūkia ‘iate au.
24Pea kuo ō ‘a e ongo talafekau ‘a Sione, pea hanga ‘e Sīsū ‘o lea ki he kakai ‘ia Sione, ‘o pehē, Ko ho‘omou ‘alu atu ki he toafa ke siofi ‘a e hā? Ko ha kaho ‘apē, ‘oku lulu‘i ‘e he matangi, ‘ō? 25Ka ko e hā nai na‘a mou ‘alu atu ke mātā? Ko ha tangata ‘apē, ‘oku kofu silika fakatafu‘ufu‘u, ‘o? ‘ē, ko e fa‘ahinga ‘oku kofu fakalaukau, mo mo‘ui fakananivi, ‘oku nofo palasi. 26Ka ko ho‘omou ‘alu atu ke mamata ki he hā? Ki ha palōfita? ‘āua! tala atu, ‘oku lahi ia ‘i ha palōfita. 27Ko eni ia na‘e kau ki ai ‘a e folofola, Vakai, ‘oku ou fekau atu hoku fakamelomelo ke mu‘omu‘a kiate koe, ‘a ia te ne teuteu ho hala mo‘ou.#Mal 3.1 28‘Oku ou tala atu, ‘i he kakai kotoa kuo fanau‘i ‘e he fefine, ‘oku ‘ikai ha taha ‘oku lahi ‘ia Sione; ka neongo pe ko hai ‘oku faka‘ange‘ange ‘i he Pule‘anga ‘o e ‘Otua, ‘oku lahi ia ‘ia Sione.
29(Pea ko e kau ‘Isileli kotoa na‘e fanongo, pea mo e kau pōpilikane, na‘a nau fakatonuhia‘ia ‘a e ‘Otua, he‘enau papitaiso ‘i he papitaiso ‘a Sione.#Māt 21.32; Luk 3.12 30Ka ko e kau Fālesi mo e kau tufunga lao, ko e ‘ikai te nau papitaiso ‘iate ia, ko ‘enau le‘ei ia ‘a e tu‘utu‘uni ‘a e ‘Otua ‘o nau kovi ai.)
31Ka te u fakatatau ki he hā ‘a e kakai ‘o e to‘utangata ni? ‘io, ‘oku nau hangē nai ko e hā? 32‘Oku nau hangē ko ha tu‘unga tamaiki ‘oku nofo ‘i ha mala‘e, ‘o nau fekalanga‘aki, ‘o pehē, Ne mau tā nafa atu, kae ‘ikai te mou me‘e; ne mau hua ‘a e ‘oiauē, kae ‘ikai te mou fetāngihi. 33He kuo ha‘u ‘a Sione Papitaiso, ‘o ‘ikai kai mā, pe inu kava; pea mou pehē, 34‘Oku ‘iate ia ha tēvolo. Kuo ha‘u ‘a e Fanautama ‘a Tangata, ‘o keinanga mo faikava; pea mou pehē, ‘Isa! Ko e tama fa‘a kai mo inu kava, ko e kaume‘a ‘o e pōpilikane mo e kau angahala! 35Ka na‘e fakatonuhia ‘a Poto ‘e he fānau kotoa pē ‘a‘ana.
Ko e Fālesi ko Saimone
36Pea na‘e fakaafe ia ‘e ha Fālesi ‘e taha ke na kai, pea hū ia ki he fale ‘o e Fālesi, ‘o tokoto fakaloloa ‘i he nofo‘a. 37Pea ‘iloange ko ha fefine–pea ko e toko taha ia ‘i he kau fe‘auaki ‘o e kolo-‘i he‘ene ‘ilo pau ‘oku keinanga ‘a Sīsū ‘i he fale ‘o e Fālesi, na‘a ne ha‘u mo ia ha hina ‘alapasita na‘e fonu ‘i he lolo tākai;#Māt 26.7; Ma‘ake 14.3; Sioné 12.3 38‘o ne tu‘u mei hono tu‘a ‘o ofi ki hono va‘e, ‘o tangi; pea ‘i he viku leva hono va‘e ‘i he lo‘imata na‘a ne hanga ‘o holoholo ‘aki hono lou‘ulu, mo ne toutou ‘uma ki hono va‘e, ‘o ne tākai ‘aki ‘a e lolo. 39Pea ‘i he vakai ki ai ‘e he Fālesi ‘a ia na‘a ne fakaafe ia, na‘a ne pehē ‘i hono loto, Ka ne ko ha palōfita ‘eni, pehē kuo ne ‘ilo ‘a e fefine ni ‘oku ala kiate ia, mo ‘ene anga; he ko e angahala ia.
40Pea tali ‘e Sīsū ‘o ne pehē ki ai, ‘E Saimone, ‘oku ‘i ai ha‘aku lea ke fai atu.
Pea pehē ‘e ia, Fai pē, Tangata‘eiki.
41Na‘e ai ha ongo tangata na‘e mo‘ua ki hā matāpule tali-nō-pa‘anga: ko e mo‘ua ‘o e taha ko e tēnali ‘e nimangeau, ko e taha ko e tēnali ‘e nimangofulu. 42Pea ‘i he ‘ikai ha‘ana me‘a ke totongi ‘aki, na‘a ne fakamolemole fakatou‘osi. Ko e fē nai ‘iate kinaua ‘e lahi ‘ene ‘ofa ki he matāpule?
43Pea tali ‘e Saimone ‘o ne pehē, ‘oku ou pehē, ko e toko taha na‘e lahi ‘ene fakamolemole ki ai. Pea pehē ‘e Sīsū kiate ia, Totonu pē ho‘o lau.
44Pea tafoki ia ki he fefine, mo ne pehē kia Saimone, ‘Oku ke vakai ‘a e fefine ni? Ne u hū mai ki ho fale, pea hono ke ‘omi ha vai ki hoku va‘e? ka ko e fefine ni kuo ne fakaviviku hoku va‘e ‘aki hono lo‘imata, pea holoholo ‘aki hono lau, 45Hoke ki‘i ‘uma kiate au? Ka ko e fefine ni, talu ‘eku hū mai mo e ‘ikai tuku ‘ene ‘uma lolomi ki hoku va‘e. 46Hoke pani lolo hoku ‘ulu? ka ko e fefine ni kuo ne pani ‘aki ‘a e lolo tākai ‘a hoku va‘e. 47Ko ia ‘oku ou tala atu, Ko ha‘ana angahala ne hulu atu, pea kuo fakamolemole; he vakai kuo lahi ‘ene ‘ofa: ka ko ia ‘oku si‘i ‘a e fakamolemole ki ai pea si‘i ha‘ana ‘ofa.
48Pea pehē ‘e ia ki he fefine, Kuo fakamolemole ho‘o ngaahi angahala.
49Pea ko kinautolu na‘a nau keinanga mo ia, na‘a nau kamata lea ‘i honau loto, ‘o pehē, Ko hai ‘eni, ‘a ia ‘oku fakamolemole angahala foki?
50Pea pehē ‘e Sīsū ki he fefine, Kuo fakamo‘ui koe ‘e ho‘o tui; ‘alu, ‘o fiemālie pē ā.
Actualmente seleccionado:
Luké 7: TMB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Tongan Moulton Bible © Bible Society of the South Pacific, 2011.