Luké 19
19
Ko Sākeasi
1PEA ‘i he‘ene a‘u ki Selikō, na‘a ne ‘alu atu ‘i he loto kolo. 2Pea tā na‘e ‘i ai ha tangata na‘e hingoa ko Sākeasi; pea ko e toko taha ko ia ko e Pōpilikane lahi, pea ko e toko taha ia na‘e koloa‘ia. 3Pea na‘a ne feinga ke mamata kia Sīsū, pe ko hai nai ia; ka na‘e ‘ikai te ne lava koe‘uhi ko e fu‘u kakai, he na‘e pukupuku. 4Pea lele tāimu‘a ia, ‘o kaka ‘i ha fu‘u sukamino, koe‘uhi ke ne mamata kiate ia: he na‘e hu‘u ‘ene fononga ki he feitu‘u ko ia. 5Pea ‘i he a‘u ‘a Sīsū ki he potu, na‘a ne me‘a hake, ‘o ne pehē kiate ia, ‘E Sākeasi, fai vave, pea ‘alu hifo; he kuo pau ke u ‘apitanga ‘i ho fale he ‘aho ni.
6Pea ne fai vave, ‘o ‘alu hifo, ‘o ne tali fiefia ia. 7Pea lāunga kotoa pē ‘a e kakai ‘i he‘enau mamata ki ai, he‘enau pehē, ‘ā, kuo ne ‘alu ke nofo mo ha fu‘u angahala.
8Pea tu‘u ai ‘a Sākeasi, ‘o ne pehē ki he ‘Eiki; ‘Eiki, ko eni te u ‘atu ni hono vaeua ‘o ‘eku nga‘oto‘ota ki he masiva; pea kapau kuo u ma‘u ha me‘a ‘i he lohiaki‘i ha taha, te u toe totongi ni, ‘o liunga fā.
9Pea pehē ‘e Sīsū kiate ia, Ko e ‘aho ni kuo hoko mai ‘a e fakamo‘ui ki he fale ni, kae‘uma‘ā ko e hako foki ia ‘o ‘Epalahame. 10He na‘e ha‘u ‘a e Fanautama ‘a Tangata ke kumi mo fakamo‘ui ‘a ia kuo mole.#Māt 18.11
Ko e Talanoa ki ha Kau Ngāue ‘e Toko Hongofulu
(Māt 25.14-30)
11Pea lolotonga ‘enau fakafanongo ki he me‘a ko ia, na‘a ne fokotu‘u atu mo ha fakatātā; ko hono ‘uhinga, he ‘oku ne ofi ki Selusalema, pea ‘oku ‘amanaki ‘a e kakai, ‘oku panaki ‘aupito ‘a e fakahā mai ‘o e Pule‘anga ‘o e ‘Otua. 12Ko ia, na‘a ne lea ‘o pehē, Tokua na‘e ai ha tangata, ko e fo‘i ‘eiki, na‘a ne ‘alu ki ha fonua mama‘o ke ma‘u mo‘ona ha pule‘anga, pea toki foki mai. 13Pea ne ui ha toko hongofulu ‘o ‘ene kau tamaio‘eiki, ‘o ne tuku kiate kinautolu ha mina pa‘anga ‘e hongofulu, ‘o ne pehē kiate kinautolu, Fai fakatau ‘aki ia lolotonga ‘eku mama‘o. 14Ka ko e kakai ‘o hono fonua na‘a nau fehi‘a kiate ia, ‘o nau fekau atu ha tu‘unga fakafofonga ke fakatale‘i ia, pea ke fakahā, ‘Oku ‘ikai te mau loto ke ke fakanofo ‘a e siana ni ke tu‘i kiate kimautolu.
15Pea faifai pea ne foki mai, kuo ‘o‘ona ‘a e pule‘anga; pea ne fekau ke ui mai ‘a e tu‘unga tamaio‘eiki ko ia, ‘a ia na‘a ne tuku ki ai ‘a e pa‘anga, koe‘uhi ke ne mea‘i pe kuo fēfē ‘enau fakatau. 16Pea tu‘u mai ‘a e ‘uluaki, ‘o ne pehē; ‘Eiki ko ho‘o mina kuo ne ma‘u mai mo ha mina ‘e hongofulu.
17Pea me‘a mai ia, ‘Oi seuke! mālō, si‘i tamaio‘eiki lelei! pea ko e me‘a ‘i ho‘o lototō ‘i ha ki‘i momo‘i me‘a pehē, ke ke nofo ko e pule ‘o ha kolo ‘e hongofulu.
18Pea ha‘u mo hono ua, ‘o ne pehē, ‘Eiki, ko ho‘o mina kuo ne fakatupu ha mina ‘e nima.
19Pea ki he toko taha ko ia foki na‘a ne me‘a mai, Mo koe, foki, ke ke hoko ko e pule ‘o e ngaahi kolo ‘e nima.
20Pea toki ha‘u ‘a e taha na‘e kehe, ‘o ne pehē ‘Eiki, ko ena ho‘o mina, ‘a ia kuo u mo‘u tauhia, kuo kofu ‘i ha holoholo: 21he ne u manavahē kiate koe, koe‘uhi ko e tangata fakata‘ehuohuesia koe: he ko ho‘o anga ke ‘eke ‘a e me‘a na‘e ‘ikai te ke ‘ange, pea ke utu ‘a e me‘a na‘e ‘ikai te ke tō. 22Pea folofola mai ia, ‘a e tamaio‘eiki pau‘u! te u fakamaau koe mei ho‘o lea ‘a‘au. Na‘a ke ‘ilo koā ko e tangata faingata‘a au, ‘oku ou ‘eke ‘a e me‘a na‘e ‘ikai te u ‘ange, mo utu ‘a e me‘a na‘e ‘ikai te u tō, ‘ō? 23Pea ko e hā ai na‘e ‘ikai te ke tuku ‘eku pa‘anga ki he pangikē, pehē kuo u ma‘u ai ia mo hono fua foki ‘i he‘eku ha‘u ni? 24Pea me‘a ia kiate kinautolu na‘e ha‘ofia ia, Mou to‘o ‘a e mina meiate ia, ‘o tuku kiate ia ‘oku ma‘u ‘a e hongofulu. 25(Pea nau pehē ange, ‘Eiki, ka ‘oku hongofulu ‘ene mina ‘a‘ana.) 26Tala atu, ‘ilonga ha taha ‘oku ma‘u ha me‘a ‘e ‘ange ki ai mo ha me‘a; ka ko ia ‘oku ‘ikai ke ma‘u, na‘a mo e me‘a ‘oku ne ma‘u ‘e to‘o meiate ia.#Māt 13.12; Ma‘ake 4.25; Luk 8.18 27Ka ko hoku ngaahi fili ko ia na‘e ‘ikai loto ke u tu‘i kiate kinautolu, taki mai ki heni, pea tāmate‘i ‘i hoku ‘ao.
Ko e A‘u ‘a Sīsū ki Selusalema
(Māt 21.1-11; Ma‘ake 11.1-11; Sioné 12.12-19)
28Pea ‘i he‘ene fai ‘a e ngaahi lea ko ia, na‘a ne laka atu ‘i honau ‘ao, ko ‘ene ‘alu hake ki Selusalema. 29Pea ‘i he faifai ‘o ne ofi ki Petefesi, mo Pētani, ki he mo‘unga ‘oku ui ko ‘ōlive, na‘a ne fekau atu ha toko ua ‘o e kau ako, 30‘o ne pehē, Mole pē ki he vilisi ‘oku hanga mai; pea ‘i ho‘omo a‘u atu, te mo ‘ilo ha ki‘i ‘asi ‘oku no‘otaki ai, ‘a ia kuo te‘eki si‘i ha tangata ‘e heka ai: pea mo vete ia, ‘o taki mai. 31Pea ka ai ha taha te ne fehu‘i atu, Ko e hā ‘oku mo vete ai? pea mo lea ‘o pehē, ‘oku fiema‘u ia ‘e he ‘Eiki.#19.31: ‘Eikí; pe tokotaha ‘oku ‘o‘oná.
32Pea ō atu ‘a e ongo me‘a na‘e fekau, ‘o na ‘ilo pē ‘o hangē ko ‘ene me‘a kiate kinaua. 33Pea lolotonga ‘ena vete ‘a e ki‘i ‘asi, mo e lea mai ‘a e kakai na‘e ‘anautolu ia, Ko e hā ‘oku mo vete ai ‘a e ki‘i ‘asi?
34Pea na pehē, ‘oku fiema‘u ia ‘e he ‘Eiki.#19.34: ‘Eikí; pe tokotaha ‘oku ‘o‘oná. 35Pea na taki ia kia Sīsū: pea nau laku honau pulupulu ki he ‘asi, ‘o nau fakaheka ai ‘a Sīsū. 36Pea ‘i he‘ene kamata me‘a atu, na‘a nau falikiliki ‘a e hala ‘aki honau ngaahi pulupulu.
37Pea ‘i he‘ene fakaofiofi atu, ‘o ne fai ke hifo ‘i he mo‘unga ko ‘ōlive, pea pā mavava ‘a e fu‘u fakataha kātoa ‘o e kau ako, ‘o nau vīkiviki ki he ‘Otua, ‘o lau le‘o lahi ki he ngaahi ngāue fakaofo kuo nau mamata ki ai. 38‘O nau pehē,
Hoto‘ofa ki he Tu‘i
‘Oku hoko mai ‘i he huafa ‘o e ‘Eiki!
Ke ai ha melino ‘i Langi,
Mo ha kolōlia ‘i Langi Taupotu!#Saame 118.26
39Pea ko e ni‘ihi ‘o e kau Fālesi na‘e ‘i he kakai, na‘a nau lea kiate ia, Tangata‘eiki, lolomi ho‘o kau ako.
40Ka ka tali ‘e ia ‘o ne pehē, Tala atu, kapau te nau fakalongo ‘e kinautolu, ‘e kalakalanga ‘e he ngaahi maka.
41Pea ‘i he‘ene ofi atu, ‘o hā mai ‘a e kolo, na‘a ne tēngihia ia, 42‘o ne pehē, ‘ē, taumaiā ne ke lavea–kehe ā ho taimi ko eni–‘io, ‘o lavea ‘e koe foki ‘a e ngaahi me‘a ‘oku tu‘u ai ho‘o lelei! ka kuo fufū ‘eni meiate koe. 43He tokaange hao taimi ‘e ‘ākolo‘i koe ‘e ho ngaahi fili, pea te nau kapui koe, mo punipuni mei he potu kotoa pē, pea te nau laiki koe mo ho‘o fānau foki. 44Pea ‘e ‘ikai te nau fakatoe hao maka ‘o ta‘eholoki; koe‘uhiā na‘e ‘ikai te ke lavea ‘a e kuonga ‘o ho ‘a‘ahi.
Ko Sīsū ‘i he Temipalé
(Māt 21.12-17; Ma‘ake 11.15-19; Sioné 2.13-22)
45Pea ne hū ki he Temipale, ‘o ne hanga ‘o kapusi ‘a kinautolu na‘e fai fakatau ai; 46‘o ne pehē kiate kinautolu, Kuo tohi, Pea ‘e tu‘u hoku fale ko e falelotu; ka ko kimoutolu kuo mou ngaohi ia ko e ‘ananga ‘o ha kaiha‘akau.#‘Ais 56.7; Sel 7.11
47Pea na‘a ne ‘i he Temipale ‘i he ‘aho kotoa pē, ‘o faiako. Pea ko e hou‘eiki taula‘eiki mo e kau sikalaipe na‘a nau feinga ke tāmate‘i ia; pehē foki mo e kau tu‘ukimu‘a ‘o e kakai:#Luk 21.37 48ka nau fiu‘a fili pe ko e hā ‘anautolu ai ‘e fai; he ko e kakai kātoa na‘e mātu‘aki tukutukutāupe honau loto kiate ia ‘i he‘enau fanongo ki ai.
Actualmente seleccionado:
Luké 19: TMB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Tongan Moulton Bible © Bible Society of the South Pacific, 2011.