Dyénésis 2
2
1Ani gine i kfagu Dwata di kgimoan i langit, i klamang banwe na i dad kdee i fkahan di mgimoan ani.
2Na di kakel i gfitun duh, tatlag Dwata mimò, du tafnge i kdee mgimoan. 3Taman nun kafye gmanan gablà di gfitun duh, manan, “Nimògu duh ani too mabtas.” Gmanan ani, du i duh ani tatlag di kdee nimoan.
4Én sa i santulen gablà di kgimò Dwata i langit na i banwe.
Adam na Iba
Di kimò Dwata i Amu, i langit na banwe, 5landè fa fule tmabò di tanà, du là fa fulen Dwata i Amu, na landè fa to mimò di tanà. 6Kabay balù landè ulen, tanun yéél tambul di lam i tanà du fye fafê i klamang tanà. 7Kafnge én, mwè Dwata i Amu tanà, du nimoan to mdà di tanà ani. Kafnge én, nyufan i ilung i to ani, na gasil lamnawa, na tamto.
8Kafnge én, tanun tukay banwe i gunun dad kayu, i nimò Dwata i Amu, gsen di gusut i duh dnagit Idén. Na ditù gufnean i to tanimoan. 9Na falnok Dwata i Amu, dee bung kayu déén. Too fye baweh dad kayu ani na i dad bungela too fye knaan. Na di gutngà i dad fule, tafule Dwata lwe kayu, satu kayu én, mlé nawa landè sen, na i satu, mlé gnadè gablà ku tan i fye na tan i sasè.
10Na nun satu yéél di Idén ani, maloh na myéél i dad fule déén. Mdà di Idén, yéél ani dee syatan, du masatngà di fat, na mbaling fat yéél. 11I tnanin yéél dnagit Fison, na maloh salu di klamang banwe Habila. 12Dini di banwe ani gumite i too glut blawen, na i fye bun litak di kayu, na dad batu mabtas. 13Dagit i galwe yéél dunan Gihon, na maloh di klamang banwe dnagit Kus. 14Na i gatlu yéél, dunan Tigris, maloh salu di gsen di gusut i duh di banwe dnagit Asirya. Na Yufratis i dagit i gfat yéél.
15Na dini di tukay banwe gunun kayu nimò Dwata, dnagit Idén, gufnean i to tamgimoan, du fye mimò kenen di tanà na mifat i dad fule déén. 16Na flalò Dwata i Amu i to ani, manan, “Fakay ge kmaan i bunge kdee dad kayu di gumneam ani, 17bay nang ge kmaan i bunge i kayu mlé gnadé gablà ku tan i fye na tan i sasè. Du ku kmaan ge i bungen, too ge mati.”
18Na lêman talù Dwata i Amu, manan, “Là sa fye ku i to aloan satu mnè. Taman mimò agu i demen salngad kenen, du fye nun tmabeng kenen.”
19Kafnge én, nebe Dwata i Amu di to tamgimoan i kdee dad lmanaf, i kdee dad anuk di bnas, na i kdee dad tamgimoan mdà di tanà, du fimoan kenen dagitla. Na balù tan i dagitan i kat satu dad mto ani, én i dagitan. 20Na i to ani i mimò dagit i kdee bung lmanaf, na dad anuk di bnas.
Kabay landè di dale blà kenen du nimò demen. 21Taman fkudang Dwata i Amu, i to ani, na too fye kakudangan laan falus tamwan, na klon kudang nwè Dwata i satu lohokan. Na kafngen sansuléan i ungad di gumwean i lohok to ani. 22Na mdà di lohokan ani, nimò Dwata i Amu satu libun, na neben i libun ani di lagi. 23Na man i lagi,
“Kenen tagablà demegu du i tulanan fdu di deg tulan,
na i ungadan fdu di deg ungad,
dnagitgu kenen libun,
du mgimò mdà di lagi.”
24Na ani i duen i lagi tmagak i maan na yéan, na mbaling satu di yaanan, na i lwe ani mgimò satu.
25Balù flaweh i lagi na libun ani, là ale sa myà.
Actualmente seleccionado:
Dyénésis 2: ITD
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2014, Wycliffe Bible Translators, Inc. All rights reserved.