A Luk Sõng 9
9
A Zezi tʋmda piig la a yiibã
(Mt 10,1-9, 11-14; Mk 6,6-13)
1A Zezi boola b Tʋʋm-tʋmdb piig la a yiibã n kõ-b pãng la tõogo tɩ b rig sʋtãamba la b sãoog bãad-dãmba fãa. 2B tʋm-b lame tɩ b sa n moon Wẽnd Rĩungã la b yols bãad-dãmba. 3B yeel-b lame: «Da zɩ-y bũmb sor zug yĩng ye. Da zɩ-y dasaare bɩ korgo la rɩɩbo bɩ ligd ye. Ned ba a ye ra zɩ fu-yord a yiib ye. 4Y sẽn kẽ yir ninga bɩ y kell n pa be n tãag y loogre. 5#Lk 10,4-11; Tv 13,51. B sẽn pa reeg yãmb zĩig ning fãa, y sã n yit b tẽngẽ bɩ y pĩng y gãndalsa tom tɩ rẽ n yɩ zood kaoob kaseto la taal ningri.» 6Tʋʋm-tʋʋmdba kẽngame, b saaga tẽnsa fãa n moon Koe-noogã la b sãoogd bãad-dãmb zĩis fãa.
Naab a Erod ne a Zezi
(Mt 14,1-12; Mk 6,14-29)
7A Erod wʋma a Zezi sẽn maan fãa la a ra ka mi a sẽn na n tags bũmb ning ye tɩ kẽer da gomdame: «Yaa a Zã n vʋʋg kɩɩms sʋka.» 8#Mt 16,14; Mk 8,28; Lk 9,19. Kẽere: «A Eli n le wa.» Kẽere: «Tẽn-kʋdem-wẽnnẽ bãngd a ye n vʋʋge.» 9La a Erod da yetame: «Sã n ya a Zã, mam n kɩt tɩ b fiuug a zugu. B sẽn gomd rao ning yelle tɩ m wʋmnẽ wã marsã, yẽ la ãnna?» Dẽ la a ra baood n na n yãend a Zezi.
A Zezi rɩlgda zãma ne bur a nu
(Mt 14,13-21; Mk 6,30-44)
10Tʋʋm-tʋmdba sẽn lɛɛg n wa, b togsa a Zezi bãmb sẽn maan fãa. A Zezi peeg-b lame n yi kɛɛnga; b teesa tẽng sẽn boond tɩ Bɛtsayid. 11Zãma wã bãngame la b rɩka b nao. A Zezi sakame n gom ne-ba, Wẽnd Rĩunga yelle; b sãooga sẽn da tʋl-b laafi wã fãa.
12Wĩndg sẽn waa n dat n kẽ, piig la a yiibã kolg n yeela a Zezi: «Kuls-y neba tɩ b leb Bɛtsayid la pʋtẽ wã n bao gãag zĩiga la b paam dɩɩb n dɩ tɩ d sẽn be ka wã yaa weoogo.» 13A Zezi yeel-b lame: «Yãmb meng n tog n kõ-b rɩɩb tɩ b rɩ.» Dẽ la b leok yã: «Bur a nu la kʋɩl-zẽed a yiib bal la d tara. Woto wã d na n kẽnga tẽnga pʋgẽ d toore n tɩ ra rɩɩb n wa, tɩ ka rẽ zãma wã labsa.» 14Daopa sẽn da be be sõor da tõe n taa tus a nu. B yeela b karen-biisã: «Zĩndg-y neba pisnu-nu.» 15B reega noore, n kɩt tɩ neba zĩndi. 16A Zezi reega bur a nu wã ne kʋɩl-zẽed a yiibã n zẽk b neng n tees yĩngri n pʋʋs bark pʋʋsgo. B yaoolame n wes burã n kõ b karen-biisã tɩ b pʋɩ zãma wã. 17B fãa rɩɩme n tɩge n tol zɩ pet piig la a yi, n kuli, pet sẽn pid ne bura girs sẽn kellã.
A Piyɛr tẽeb wilgri
(Mt 16,13-21; Mk 8,27-31)
18A Zezi ra yii kɛɛng, raar a ye, n pʋʋsdẽ. B karen-biisa bal n da be ne ba. B sok-b lame: «Zãma wã yetame tɩ maam la a bõe?» 19#Mt 14,1-2; Mk 6,14-15; Lk 9,7-8. Tɩ b leoke: «Kẽer yetame t'a Zã, kẽer t'a Eli. Kẽer tɩ tẽn-kʋdem-wẽnnẽ bãngd a ye sẽn vʋʋge.» T'a Zezi yeel-ba: 20#Zã 6,68-69. «La yãmb yẽ, yãmb yetame tɩ m yaa ãnna.» A Piyɛr n leoke: «Krista, Wẽnd Nedã!» 21A Zezi kõ-b la noore tɩ b ra saag n togs ned ye.
A Zezi gomda b namsg yelle
22B yeelame: «Yaa pakr ne Ned Biiga tɩ b nams wʋsgo, tɩ nin-kẽemba, maan-kʋʋdba kãsem-dãmb la sɛb-mitba yiis-b buudẽ la b kʋ-ba; la b na n vʋʋga dasem a tãab daare.»
A Zezi tũudem sẽn dat bũmb ninga
(Mt 16,24-28; Mk 8,34—9,1)
23 #
Mt 10,38; Lk 14,27. B yaool n yeela b fãa: «Ned sã n dat n dɩk mam nao, bɩ a bas a meng yamleoogo la a tʋk a pika, beoog sẽn vẽeg fãa, n tũ maam. 24#Mt 10,39; Lk 7,33; Zã 12,25. Sɩd me sẽn tʋll-a n fãag a meng vɩɩm na n menes-a lame la sẽn menesd-a a meng vɩɩm mam yĩnga, na n fãag-a lame. 25Bõe yõod la ned rokda a sã n paam dũni wã zãng fãa n sooge, n yaool n kẽ moogo la a sãam a meng yelle? 26Sẽn yeela tɩ maam ne m goama yãnd tar-a lame, Ned Biig me na yeel yẽ soaba t'a yãnd tar-b lame, b sã n lɛɛg n wa ne zɩɩri, ne b Ba la malɛgs sõma pẽgre. 27Sɩd ne sɩda, mam yeta yãmba tɩ kẽer n be ka n ka na n wʋm kũum yũugu tɩ b pa reng n yãe Wẽnd Rĩunga ye.»
Krista neng tedgre
(Mt 17,1-8; Mk 9,2-8)
28Dẽ loogr poore, sẽn maan dasm a nii, a Zezi peega a Piyɛr la a Zak, la a Zã. B tɩ rʋʋ tãng n pʋʋsdẽ. 29Pʋʋsga wakato, a Zezi neng tedgame. B futa lebga peelse n pɩnda. 30Ade, neb a yiibu n da sõsd ne bãmba: da yaa a Moyiiz la a Eli n lik ne zɩɩri. 31B da gomda b kũuma sẽn na n yɩ a soab Zerizalɛɛm. 32#2P 1,17-18. Dẽ t'a Piyɛr ne a tũud-n-taasa ra zuka gõeem tɩ gõeema ra tar-b la wʋsgo. B sẽn neke b yãenda a Zezi zɩɩrã ne rapa yiibã sẽn da be-b ne bãmbã. 33Nin-bãmb sẽn waa n loogdẽ, a Piyɛr yeelame: «Karen-saamba, tõnd sẽn be ka wã, d sũur yaa noogo. D tilg zãn a tãabo, a ye yãmb yĩnga, a to a Moyiiz yĩnga, a tãab soaba a Eli yĩnga.» A ra ka tar a goama nao ye. 34La a sẽn waa n gomdã, sawadg n waa n lud bãmba tɩ lebg likã, tɩ b yɛɛsdẽ. 35#Iz 42,1; Mt 3,17; 12,18; Mk 1,11; Lk 3,22. La koɛɛg n yi sawadga pʋgẽ n yetẽ: «Bãmb yaa mam Bi-nongre, kelg-y-ba!» 36B wʋma koɛɛgã la dẽ pore b mikame t'a Zezi lebga b yembre. Karen-biisa me tõoga b noore wakat kãng n pa togs ned ba a ye b sẽn yãend bũmb ninga ye.
Sʋtãan yiisg yɛsa
(Mt 17,14-18; Mk 9,14-27)
37Vẽkembeoogo, b sẽn sig tãngã la zãma wã sẽn pooge. 38Ade, dao a ye n zĩnd zãma wã sʋka n kelme: «Karen-saamba, m yõkd-y-la sɛɛga, ges-y m biiga yelle tɩ yaa m bi-yende. 39Sʋtãan a ye n mii n yõk-a t'a tar kɛlenga. Wakat ninga sʋtãana lubd-a la tẽnga t'a yĩnga vɩgda, t'a noor lasd tãntãnpuudu; a pa yit n bas-a naana ye. A rengd n sɛɛsa a pãnga zãnga. 40Mam kosa y karen-biisa tɩ b rig-a la b pa tõog ye.» 41A Zezi yeelame: «Kɩɩsdb la bi-bees buudu, mam na n kaoosa ne yãmb la m tõog m sũurã n ta da-bʋre? Tall f biigã n wa ka.» 42Biiga sẽn wa n kolgdẽ, sʋtãana lub-a-la tẽnga t'a gãe n vigd ne pãnga. A Zezi tãsa sʋtãan dẽgda, n sãoog biigã n lebs-a a ba. 43B fãa yãenda Wẽnnaam pãngã tɩ b pɛleng yɩke.
Namsga wilgr a yiib soaba
(Mt 17,22-23; Mk 9,30-32)
Ned kam sẽn da pẽgd a Zezi sẽn maana yĩnga, bãmb yeela b karen-biisi: 44«Yok-y y tʋbre n kelg m goama: B na n yõka Ned Biiga n ning ninsaalb nusẽ.» 45La karen-biisa pa wʋmd gomda sẽn lebdẽ ye, t'a Zezi pa tʋlg tɩ yɩ vẽenega tɩ b wʋma võor ye; la soka Zezi b gomda võor da yaa rabeem ne-ba.
Ãnd n yɩɩd a to no-koeemde
(Mt 18,1-5; Mk 9,33-37)
46 #
Lk 22,24. B yika no-koeemd ne taaba n na n bãng, bãmb sʋka, ãnna n yɩɩd a taaba. 47A Zezi sẽn da mi b sũur tagsgo, b zĩndga bi-bilf b sɛɛgẽ n yeel-ba: 48#Mt 10,40; Lk 10,16; Zã 13,20. «Sẽn deeg-a bi-bilfã reega mam menga, sẽn deeg-a maam deega sẽn tʋmeb maama. La sẽn yaa yao-zʋʋg yãmb sʋka yẽ n yɩɩd a taaba.»
49A Zã yeelame: «Karen-saamba, tõnd yãee dao a yembre sẽn digd sʋtãan yãmb yʋʋr yĩnga la tõnd gɩdg-a lame t'a pa lagem ne tõnd n tũud yãmb ye.» 50A Zezi yeel-b lame: «Bɩ y ra rig-a ye! Sẽn pa zabd-a ne yãmba bee yãmb poorẽ.»
A Zezi tata Samari tẽnga
51B daara sẽn waa n kolge tɩ b na n yi dũni kãnga, a Zezi kenga b pɛlga n dɩk Zerizalɛɛm sore. 52Neb la b tʋm tɩ b reng taoore. B rɩka sore la b tɩ kẽe Samari tẽng a ye n na segl b waoongo. 53B sẽn ta, be rãmb pa reeg-b neer ye, tɩ b yãeeme tɩ yaa Zerizalɛɛm la b da rabda. 54#2Dĩm 1,9-16. A Zak ne a Zã sẽn yãend woto b yeelame: «Yãmb datame tɩ d kõ noor tɩ saag bugum sig n yõog bãmba bɩ?»
55A Zezi wẽneg n ges-lame m sãbs-ba. 56La b yiime n kẽ tẽng a to.
A Zezi tũudem yelle
(Mt 8,19-22)
57B sẽn waa n be sorẽ, ned n yeel bãmba: «Mam na n tũu yãmba, y sẽn na n kẽng tẽng ning fãa.» 58A Zezi leoka yẽ soaba: «Waas tara b bogdo tɩ yĩngr luiili tar b tʋgdo. Ned Biiga yẽ pa tar zĩig n gãnegd b zug ye.»
59B yeela ned a to: «Tũ maam!» T'a soab leoke: «Kõ-y maam sore tɩ m deng n tɩ mum m ba.» 60La a Zezi yeel-a lame: «Bas kɩɩmsa tɩ b mum taaba; la foom, kẽng n tɩ moon Wẽnd Rĩungu.»
61 #
1Dĩm 19,20. Ned a to me n yeel-ba: «M na n pʋga yãmba, Soaala, la bɩ y kõ sore tɩ m deng n tɩ pʋʋs m neba wẽnd na taas la m yaool n wa.» 62T'a Zezi leok-a: «Ned sã n gãd wãka n zõond n na n ko, n wẽneg n ges a poorẽ, a soab ka tog ne Wẽnd Rĩung ye.»
Actualmente seleccionado:
A Luk Sõng 9: SSDC98
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
SEBR SÕNGO © Alliance Biblique du Burkina Faso, 1998.