A Luk Sõng 7
7
Tãnsoab yem-daoog sãoogre
(Mt 8,5-13)
1B sẽn togs neba b koeesã, a Zezi yikame n kẽng Kafarnaom. 2Tãb-biis koabg tãnsoab n da tar a yem-daoogo la a ra nong-a-la wʋsgo. Yem-daooga yika pa-keem n dat n ki. 3A sẽn wʋm a Zezi yelle, tãnsoaba tʋma Zʋɩf rãmb nin-kẽems b nengẽ n dat tɩ b kudg kãntɩɩga tɩ b wa sãoog a nedã.
4B sẽn ta a Zezi nengẽ, b kos-b la ne b sũur fãa n yetẽ: «Togame tɩ y maan bũmb a yĩnga, 5t'a nonga tõnd buudu la a tol n me d pʋʋsg roogã n kõ-do.» 6La a Zezi tũ-b lame la b sẽn waa n kolg yiri, tãnsoaba tʋma a zo-rãmba tɩ b wa yeel-ba: «M zu-soaba, ra nams-y y meng woto ye, tɩ ka tog tɩ y wa kẽ m zakẽ ye. 7M tagsame tɩ m paooda ne m wa m toore n seg yãmba. Yeel-y gomd a ye bala la m yamba na n sãoogame. 8Mam menga tara zu-soaben-dãmba la m soo tãb-biisi. M yeel bãmb nin-yende: Kẽnge, a kẽndame. M yeel a to: Wa! A watame. M yeel m yambã: Maan woto! A maandame.» 9A Zezi sẽn wʋm woto, b pẽga tãnsoaba la b wẽnega b poorẽ n yeel zãma wã sẽn da pʋgdã: «Sɩda m yeta yãmba, al ba Israyɛl pʋgẽ, mam nan pa yãe tẽeb kãseng a woto ye.» 10Sẽn tʋm b rãmba sẽn ta zakẽ b mikame tɩ yamba bee laafi.
Nayim pʋg-kõor biig vʋʋgre
11Dẽn sẽn looge, a Zezi waa n dabda tẽng a ye sẽn boond tɩ Nayim, tɩ b karen-biisa la zãma kãseng ra pʋgd-ba. 12B sẽn ta tẽnga noore, segame tɩ b tʋka biig sẽn ki n dabd mumbu; biiga ra yaa a ma-bi-yende la ma wã da yaa pʋg-kõore; tẽnga neb wʋsg da yãagd-a lame. 13Soaala sẽn yãe pagã, b kũma a nimbãanega la b yeel-a lame: «Da yãb ye!» 14La b kolg n sɩɩsa kũuma; tɩ sẽn tʋk-ba yaase la a Zezi yeelame: «Biiga m kõt-f la noore, yiki!» 15Kũuma yikame n sɩng goama t'a Zezi lebs-a a ma. 16Dabeem kãseng yõka nebã tɩ b fãa pẽgd Wẽnnaam n yetẽ: «Bãngd kãseng lika tõnd sʋka la Wẽnnaam waa n gesa b buudu.» 17Pẽgra taa Zɩɩde soolmẽ la tẽn-kɩremsa fãa n sãage.
A Zã tʋmda a karen-biis a Zezi nengẽ
(Mt 11,2-19)
18A Zã karen-biisa tɩ wilg-a-la rẽ fãa. 19Dẽnd la a Zã bool a karen-biis a yiibu n tʋʋm-ba tɩ b tɩ sok a Zezi: «Yaa yãmb la b sẽn da gũud a soab waoongã bɩ yaa ned a to?» 20B sẽn ta a Zezi nengẽ, karen-biisa yeelame: «A Zã n tʋm tõndo tɩ d wa soke: yãmb la neba sẽn da gũud a soab waoongã bɩ yaa ned a to?» 21Wakat kãng t'a Zezi ra sãoogda bãad-dãmb wʋsgo la koms rãmba, la zĩn dãmba la b pukd zoeens nini. 22#Iz 35,5-6; 61,1. B yeelame: «Kẽng-y n tɩ togs a Zã y sẽn yãe la y sẽn wʋme: zoeens le paamda nini, wobs kẽndame, wãoob sãoogdame, kũum vʋʋgdame la b togsda naong rãmba Koe-noogã. 23Zu-noog soaba la sẽn ka na n lak-a maam wa bɛooga n lʋɩ.»
24A Zã sẽn tʋm b rãmba sẽn looge, a Zezi yeela zãma wã: «Bõe la yãmb kẽng n tɩ maag y meng n ges weoogẽ? Tãnwĩig sobg sẽn lengd bɩ? 25Yaa bõe la yãmb kẽng n tɩ gese? Ned sẽn yer fʋ-neeb bi? Sẽn yer-b fʋ-neeba la sẽn yãet-b naare bee nanams zagsẽ. 26Yaa bõe la yãmb tɩ gese? Bãngd bɩ? N-yẽe! Maam n yeele, la yɩɩda bãngda. 27#Ml 3,1. Yaa yẽ soab yelle la b sẽn gʋlse: Mam tʋmda n tʋʋm-tʋmda t'a reng taoore n segl f soya.
28Mam yeta yãmba tɩ pagba kamb fãa sʋka sẽn yɩɩd a Zã ka ye. La ade, sẽn yaa yao-zʋʋg Wẽnd Rĩungẽ wã yɩɩd-a lame. 29Zãma wã la fadga rɛɛsdba sẽn kelg a Zã koɛɛga n sak t'a ko-b soobã, bãmb manesma tũu Wẽnd sẽn date. 30#Mt 21,32; Lk 3,12. Farizẽ la noor karen-saam-dãmba sẽn zãgs a soobã, ad-y b kɩtame tɩ Wẽnnaam sẽn da tʋlg bũmb ninga vaale.
Zamaana sẽn wẽnd bũmb ning a Zezi yamẽ
31Mam makda zamaan kãnga kambã ne ãndãmba? 32B wẽnda kamb sẽn zĩ raagẽ n zabd taaba: ‹Tõnd peeba wɩɩse la yãmb pa sao warb ye, d pʋda kʋʋr yɩɩla la yãmb pa kũm ye.› 33A Zã waame n zãgs t'a kõn dɩ rɩɩbo la a kõn yu rãam ye tɩ yãmb yet t'a zug ka ye. 34Ned Biiga waame n dɩtẽ la a yũuda tɩ yãmb yet t'a yaa yão-be-neda la rã-yũuda, sẽn deesd-b fadgã la yel-wẽn-maandba zoa. 35La Wẽnd kamb naaga taab gilli n kõ kaseto tɩ tʋʋma tũu Wẽnd yam zulunga sẽn yalse.»
Pʋg-yoodr paamda a yel-wẽna sugri
36Farizẽ n bool a Zezi tɩ b wa rɩ ne yẽnda, t'a Zezi kẽ a zakẽ tɩ b sɩng rɩɩbo. 37La ade pag a ye n da ya tẽnga pʋg-yoaada; a bãngame t'a Zezi rɩta Farizẽ wã yiri, 38#Mt 26,7; Mk 14,3; Zã 12,3. t'a wa ne a yubl sẽn pid ne yũ-noog kaam, a yalsa poorẽ, a Zezi nao wã sẽn tẽesẽ. A ra yãbdame, n madgd a Zezi nao ne a nintãm, n yẽesd-b ne a zoobdo la a zɛɛd-b ne kaama.
39Farizẽ ninga sẽn bool a Zezi wã sẽn yãend rẽ, yeela a sũurẽ: «Yãoo sã n da yaẽ-la bãngda, paga sẽn sɩɩs-a wã, a na bãngẽ tɩ yaa yel-wẽn-maanda.» 40La a Zezi leok-a lame: «Simo, m dat n togsa yãmb koɛɛga.» T'a yeele: «Karen-saamba, togs-y.» 41Neb a yiibu n da tar ned a ye samde: pipi soaba yaa sãnem gil a nu, a to wã wakɩ koeems pisnu bala. 42B sẽn da pa tar n yaood b samda yĩnga, a bas-b la b yiiba fãa taale. Anna n na n nong-a n yɩɩda? 43A Simo leokame: «M tẽedame tɩ yaa ned ninga samd sẽn yɩɩd a to wã t'a bas taalã.» A Zezi yeel-b lame: «Yãmb togsa sɩda.»
44B wẽnega b poorẽ n ges pagã n yeel a Simo: «Yãmb yãee pagã? Mam kẽe yãmb zakẽ la y pa kõn-m koom tɩ m waas m nao ye la yẽ zãgsa m nao ne a nintãm n yẽes-b ne a zoobdo. 45Yãmb ka mok m yɛgd ye, la yẽ sẽn kẽ tɛka a mogsda m nao n ka basdẽ ye. 46Yãmb ka sõog m zug kaam ye la paga zɛɛ m nao ne yũ-noog kaam. 47Yaa rẽ yĩng la m yet yãmba t'a paama a yel-wẽna sẽn ya wʋsga sugri, a nonglem sẽn yɩ wʋsga yĩnga. B sẽn bas a soab bõn-bilfr taale, yẽ soab nonglma zemsame bala.» 48B yeela pagã: «Fo paama f yel-wẽna sugri.» 49Sẽn da rɩt-b ne bãmba yeela b sũuri: «Yãoo yaa ãnna, n kõt ba yel-wẽnd sugri?» 50La a Zezi yeela pagã: «Fo tẽeba fãag-f lame, kẽng ne laafi.»
Actualmente seleccionado:
A Luk Sõng 7: SSDC98
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
SEBR SÕNGO © Alliance Biblique du Burkina Faso, 1998.