A Luk Sõng 4
4
A Zezi kʋɩɩbgo
(Mt 4,1-11; Mk 1,12-13)
1A Zezi ra pida ne Vʋʋsem Sõngo. B yii Zʋrdẽ kʋɩlgã n lɛɛg n wa. A Vʋʋsem Sõng waa n le kẽes-b la we-raoogẽ wã; 2b maana rasem pisnaas be la Sʋtãan kʋɩɩb-b lame. Dasem kãense, b pa rɩ fɩ; la dẽ me la kom waa n yõk-ba. 3Ad Sʋtãana sẽn leok-ba: «Yãmb sã n ya Wẽnnaam Biiga, bɩ y yeel kugr kãnga t'a lebg buri.» 4#Yao 8,3. La a Zezi leok-a lame: «B gʋlsame: ‹Ka bur bal n dɩlgd ninsaal vɩɩm ye.› »
5La Sʋtãan sẽn dʋʋs-b yĩngri bilfu, a wilg-b la vugr bala dũni wã rĩund zãnga, 6n yeel-ba: «M na kõ-f tẽn-bãmba fãa ne b pãng la b zɩɩri tɩ b yaa m soolem, la m kõt-b la m sẽn dat a soaba. 7Fo sã n wõgemd n waoog maam, f na soog-b zãnga.» 8#Yao 6,13. A Zezi leok-a lame: «B gʋlsame: ‹Pʋʋs Soaala, f Wẽnnaam, la f waoog bãmb bala.› »
9Sʋtãana le tɩ rʋʋs-b la Zerizalɛɛm wẽnd dooga zugu, zĩig ninga sẽn lug n yɩɩd a taabã, n yeel-ba: «Fo sã n ya Wẽnnaam Biiga, bɩ f yɩk ka n tiimd tẽnga, 10#Yɩ 91,11. tɩ b gʋlsame: ‹Wẽnnaam na n kõo malɛk rãmb noore n yeel-b tɩ b gũ fo.› 11#Yɩ 91,12. Woto me n le paase: ‹B na n kok-f-la b nusẽ, tɩ f naoor da wa lak kugr ye.› »
12 #
Yao 6,16. A Zezi leok-a lame: «B yeelame: ‹Da fɛɛs Soaala, f Wẽnnaam ye.› »
13Sʋtãana sẽn kʋɩɩb-b n sɛ, a bas-b lame n looge n gũud a zu-noog raar a to.
A Zezi tʋʋmd Galile
(Mt 4,12-17; Mk 1,14-15)
14A Vʋʋsem Sõng pãng taasa a Zezi Galile tẽnga; beelẽ b yʋʋr yii zĩig zãnga. 15B ra karemda neba pʋʋsg rotẽ la neba fãa ra pẽgd-b lame.
16B kẽnga Nazarɛt, b sẽn wub tẽng ninga; vʋʋsg daare, b kẽe pʋʋsg roogẽ wala b sẽn da yib n maanẽ; b yikame n na n karem, 17tɩ b kɩs-b bãngda, a Izayi sebre. B sẽn lak sebrã, sega sẽn gʋls woto:
18«Wẽnd Vʋʋsem bee m zugu,
tɩ b zɛɛ maam ne kaam sõngo,
tɩ m tɩ togs naong rãmba Koe-noogo;
b tʋm-m lame tɩ m moone
n wilg yemse tɩ b tɩlga ne yembdo,
la zoeense, tɩ b paama nini,
la b sẽn tar b rãmb toogã
tɩ b leb b zagsẽ ne laafi,
19 #
Iz 61,1-2. la b moon tɩ Soaala bark yʋʋmd vẽkame.»
20Dẽ poore b paga sebrã n lebs karen-saamba la b zĩndame. Dooga neba fãa ra tees n geta bãmba. 21Tɩ b na n sɩng goama, n yeele: «Sebr sõng gomdã yãmb sẽn wʋm mars-marsã taasa rũnna.» 22La b fãa ra kõta kaseto la b pẽgd goama sẽn da yit b noorẽ.
B ra yetame: «Ka yẽ la a Zozɛf biiga wɛɛ?» 23A Zezi yeel-b lame: «Mam mi tɩ yãmb na wẽ-m yelbũn kãnga: ‹Tɩɩm soaba, reng n sãoog f menga. Wẽnd makr dãmba fãa sẽn maan Kafarnaom tɩ d wʋmnẽ wã, bɩ f maan-b ka me, fo ba-yiri.› »
24 #
Zã 4,44. B tol n le paasame: «Sɩda, mam n togsd-y: bãngd buuda fãa zɩɩ n paam waoogr a ba-yir ye. 25#1Dĩm 17,1. Yaa sɩda la m sẽn togsd yãmbã, pʋg-kõapa ra waooga Israyɛl tẽnga, a Eli zamaanẽ, saag sẽn waa n pa tol n ni yʋʋm a tã la kiis a yoobe, 26#1Dĩm 17,8-16. b yaool n pa tʋm a Eli ned ba a ye nengẽ sã n pa pʋg-kõor a ye sẽn da be Sarepta, Sidõ soolmẽ. 27#2Dĩm 5,1-14. Wãooba me ra waooga Israyɛl tẽnga, bãngd a Elize wẽnnẽ, la baasgo bãmb ned ba a ye ka paam tɩ b sãoog-a, sã n ka Siri neda, a Naama bala.»
28Pʋʋsga roogẽ, b fãa sũur puuga al wʋsgo, b sẽn wʋm boto. 29B yikame n tus-ba tɩ b yi b tẽngẽ; b tẽnga da tii tãng zugu. Woto b tall-b lame n ta tãnga rĩ-sɩlengẽ n na n tus-ba n lub vɩʋʋgẽ. 30La a Zezi pɩʋʋga bãmb sʋk n looge.
Bãad-dãmb sãoogre
(Mk 1,21-28)
31A Zezi kẽnga Kafarnaom, Galile soolmẽ, la b ra karemda nebã vʋʋsg daare. 32#Mt 7,28-29. B karenga yɩka neba pɛlenga, tɩ b ra gomda wa ned sẽn tar naam la tõogo.
33Dao a ye n da be pʋʋsga roogẽ n tar Sʋtãan a pʋgẽ, a kelma ne pãnga: 34«Ey! Y bõe toog n be ne tõndo. Mam mii yãmb sẽn yaa a soaba: Wẽnnaam Nin-sõngo!» 35A Zezi tãs-a lame: «Sĩnd f noore, yi la f bas daoã!» La Sʋtãana tusa raoã n lub neba sʋka, n bas-a n yi la bũmb pa maan-a ye. 36Dabeem yõka neba fãa tɩ b ra tar ne taaba: «Yɛ ned n gomd woto? A kõta sʋtãan-yood noor ne tõog la pãnga la b yitame.» 37A Zezi yʋʋra sɩd yii zĩig zãnga.
38A Zezi yii pʋʋsga roogẽ n kẽng a Simo yiri. A Simo reem-poaka yĩns ra wɩnga bas-base la b yõka a Zezi sɛɛga tɩ b sõng-a. 39A Zezi zõondame n tãs yĩn-wɩngrã la a sigame. Paga yika zĩig pʋgẽ n segend-b.
40Wĩndg sẽn kẽ, b talla bãad-dãmb ka tɛka n wa a Zezi nengẽ. B tẽega b nus bãmb ned kam fãa zugu n sãoog-ba. 41Sʋtãamba ra yita neb wʋsg pʋsẽ n kelemdẽ la b moonẽ: «Yãmb yaa Wẽnnaam Biiga.» La a Zezi ra tãsd-b lame. B ra pa sakd tɩ b gome, tɩ sʋtãamba ra miime tɩ b yaa Wẽnd Nedã.
42Zĩig sẽn yẽege, b yii n kõsa weoogo. Zãma wã saame n bao-ba, n wa yãend-ba, n da rat n gõog-ba tɩ b ra loog n bas-b ye. 43La a Zezi yeel-b lame: «Yaa modgr tɩ m tɩ togs tẽns a taaba me, Wẽnd Rĩung Koe-noogã, tɩ b tʋm-m la rẽnd yĩnga.» 44B ra zãmsda neba Galile pʋʋsg rotẽ.
Actualmente seleccionado:
A Luk Sõng 4: SSDC98
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
SEBR SÕNGO © Alliance Biblique du Burkina Faso, 1998.