Jenesis 12
12
Kindrei Aloh Abram
1Ano Laban tiye i ta Abram, “Ou au ta munyak tam ma ou au ta lowam oro hawe asiu ta tamam ya ou au ai, ala kon munyak jo kameh leheya tam. 2Jo kameh edeu lundriyem oro asahan solo-an ma i dah kameh oro asahan kon rakon buruwen. Ya i dah kameh, jo nyosowani ou ma nyaram kameh lau mari i tanan ma nyosowan kameh i tiri lau. 3Jo kameh nyosowani are aseken ou. Arile jo kameh edeu isi i tare lau aten ou. Na ou le kameh jo kameh edeu nyosowan i lau kon rakon rakon buruwen.”
4Eme na len Abram jaha tan asahan ndro tonoh limeh (75) iy edek udu Haran eme len i buku none Laban ndratiye tan, ma Lot i hawen ale. 5Eme Abram andrei udun Sarai hawe Lot, nadu uru nadu tinen Haran, ma hawe lakou tan mari hawe iri lohowan tan. Iri mene ado Haran au ala munyak Kenan. Len oro asahan Kenan badeh 6Abram edek ili eme bolo munyak doh, eme iy asahan ta kei ndrabun badu Moreh, kon ndrabun udu Sekem (na len doh badeh iri Kenan are aliy). 7Eme Laban asahan hawe Abram ma iy tiye i tan i buku doh, “I dah kon munyak kameh jo edeu i ta lundriyem oro ai.” Ano Abram tukumwi bek i ta Laban mene asahan hawen. 8Ano badeh iy edek ili loboho kum kon mandrei solo-an udu loboho lan eme loken kon tinan nyaran Betel, ano iy tahi asiu balei udu loboho an i andri ndrokowa Betel hawe Ai, udu loboho an eme loken. Ano iy tutuni bek ma iy aloh nyara Laban. 9Ano iy edek rakon i rakon loboho kum loboho kon Kenan.
Abram Udu Ijip
10Eme ya Kenan badeh nyamon bwe, eme iri akohok andra-i labai, eme badeh Abram iu i andri manyah sese udu loboho kum ta Ijip. 11Na len iy anya ki bilisiu ta kobek ta Ijip, iy tiye i ta udun, “Ou badeh ou badih konen labai. 12I buku none iri Ijip anyolom ou kameh iri anya ou kede-eh uduk ma i dah kameh iri kameh adai jo ya ou kameh ado. 13Ou kameh tiye tiri, ou badeh nadu tine, tasah na ou kameh iri kameh badai jo bwe, ma iri kameh tondrokei jo kameh udu mwasin.” 14Eme iy sakalawi kobek i bilisiu badeh iri Ijip anyolom udun badeh konen labai, 15eme iri lau ta lahou badu bolo asiu ta kabin anyolom iy badeh konen labai, eme iri ala asehek i ta kabin, eme ma iri andrei iy ili loboho ndrahu kabin. 16Na iy le badeh kabin tondrokei Abram udu mwasin, nyohonei iy iri katin haka aloh sipsip, nyohonei iy katin haka aloh me, nyohonei iy katin haka aloh bulumakau, nyohonei iy katin haka aloh donki hawe katin haka aloh kamel ma hawe iri bonyo-ou tan ale.
17Laban eme atehei sik i tan ma hawe iri lau are bahan, tasah iy mene andrei Sarai. 18Eme kabin tiye Abram eme ya iy lelen iy, “Ou amwekes sasah eme tek dah? 19I buku sah ou anya i dah nadu tinem, eme ya jo kandrei iy keme uduk. Udum doh, ou andrei iy ma ah ka-au!” 20Eme kabin tiye iri lau tan tiyani iy eme len ta kon munyak doh hawe udun ma iri lakou tan mari.
Actualmente seleccionado:
Jenesis 12: lidNTpo
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2001, Wycliffe Bible Translators, Inc. All rights reserved.