JIPANYA 3
3
Ukumin Jirusalim am bayagon
1Aibui boo ra Jirusalim, bandar malaat ondo' masaga' gumuor ra Tuhan am ondo' mangimbolo' ra mamagun nano galama'. 2Bandar no kalo mampalio ra bilin ru Tuhan, am kalo noyo boo mangapu ra pangilaan Nano. Bandar no kalo malansan ra Tuhan am kalo makiindangan Riso. 3Tingganai-tingganai ru bandar no koson ra singa' ondo' mansasangal. Akim-akim no koson ra taani maitilan ondo' masuung kaga' saboi saputul bungul pana kolondo' ondo' natatang koson ra suabon no. 4Nabi-nabi ru bandar no kalo malansanan am kalo maintopot; imam-imam nampajamol ra atan ondo' pakayon ra tayar ru Tuhan ayuk am napatimpurok ra ukum ri Aki Kapuuno' koson ra kaatangan nilo galama'. 5Kaa' Tuhan lakat poyo giu' ra bandar no. Magail Io mambaal ra motopot am kalo igondo' nambaal ra ondo' sala. Moonong susuab ti maaru' mangani' Io ra katimpakan ra ulun Nano. Kaa' ulun ondo' kalo makaulig ra katimpakan giu' ra bandar no magulayun mambaal ra malaat ra kalo makaulig ra mauyu'.
6Indagu Tuhan, “Nampaluus Aku noyo ra masuang bansa'; nanutuk Aku ra bandar-bandar nilo, am nampasauk ra timbok am niayuk manara-manara nilono ra nalunsai. Bandar-bandar nilo masiluk kolondo' ulun namagun am ralan-ralan pana masiluk; kolondo' boo ulun minayan ra giu' no. 7Mangkara' Aku, ‘Raino maaru' ulun Kuno mangurumat Raki' am mangapu ra pangilaan Kuno. Maaru' masalok ilo mangkara' ra pangilaan ondo' pinataak Ku risilo.’ Kaa' ilain ra giminaai ilo poyo nambaal ra malaat intor ra buoi ti.”
8Indagu Tuhan, “Kaa' ilai' min! Inaani' ayuk orou ra Aku kumakat koson ra sasi' koson manguu' ra bansa'-bansa'. Namatas Aku noyo koson manimung ra bansa'-bansa' am pamarintaan-pamarintaan maa' raginio makalumpa' Ku sangit Kuno risilo. Titikop ru tana' ti pusoon ra apui ru sangit Kuno.
9Kaa' malupus raginio kulawon Ku guang ru bansa'-bansa' no, saboi makiasi' ilo Raki' ayuk am sala' ka tuhan-tuhan ra bokon. Ngaangai' bansa' no gumagaya' Raki'. 10Kaa' niayuk intor ra Itiopia ondo' maalur, ulun Kuno ondo' nantutuliar no matong am mampataak ra taak simbalui Raki'. 11Paat raginio, akau ulun Kuno, kalo boo pana mauyu' kau sabap giminuor kano Raki'. Impayin Ku moonong ulun malilimbau am minsawat ragu; akau kalo boo gumuor Raki' giu' ra bulur Kuno ondo' matulai. 12Ulun ondo' asabin am ondo' minggana' guang polosoon Ku mayan ra giu' no. Matong ilo makiindangan Raki'. 13 Ulun ru Israil ondo' maayag kalo lumaat ra osoi pana; kalo magabau ilo am kalo mamparuung. Lumangkaya' ilo am makakaansayan; kalo malaa' ilo ra osoi pana.”
Rimbai maansukan
14Akau ulun ru Israil,
pakaansuk kano am parimbai!
Akau mamagun ru Jirusalim,
pakaansuk kano ra totopot ru guang!
15Linanggaan noyo ru Tuhan mangukum ramuyun;
Pinagiru' No ngaangai' pantula' min.
Tuhan, raja' ru Israil, mabaya' ramuyun,
kolondo' boo ondo' mampakalalaa' ramuyun.
16Masaboi paat no ra ulun mindagu ra Jirusalim,
“Okou Bulur Sion, pai' kalaa' am pai' kalawo guang.
17 Tuhan, i Aki Kapuuno' min mabaya' ramuyun;
namanang kau sabap ra kuasa' Nano.
Naansukan Tuhan am naansayan sabap akau;
nangani' Io ramuyun ra kaayagan bagu
sabap ra motogom Io ramuyun.
Napabansuk kau ra guang Nano,
am Io pana marimbai ra maansukan,
18koson ra ulun ondo' tatanga' munsag.”
Indagu Tuhan,
“Kalo boo polosoon Takamin malumpa' ru karaat;
kalo boo polosoon Takamin asabin.
19Masaboi paat no;
ukumin Ku ulun nangimbolo' ramuyun.
Bayagon Ku ulun kimpo',
am ibiton muli' ulun ondo' pinatiran.
Mangkinibit Aku ra ulun mangurumat risilo,
saboi giu' ra titikop ru tana',
kalo boo asabin ilo.
20Masaboi paat no;
ibiton Ku muli' ulun ondo' nantutuliar;
pasaukon Takamin ra mauligan kaga' giu' ra titikop ru tana',
am pasaukon kau ra langkaya' igondo' poyo.”
Tuhan nakaindagu noyo.
Currently Selected:
JIPANYA 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.