PILIPI 1
1
1 Aku i Paulus mabaya' ri Timotius, ondo' ulipon akai ti ri Jisus Kristus. Pabukat kau ngaangai' giu' ra bandar Pilipi, ulun ri Aki Kapuuno' ondo' nakasimpung noyo ri Kristus am tingganai mino am poyo ilo ondo' mangindangan risilo no.
2Gama' ru i Aki Kapuuno', Ama' takau am Tuhan Jisus Kristus mangani' ramuyun ra barakat am kaansayan.
Pakiasian ri Paulus ra ulun Kristian
3Moonong aku mangkara' ramuyun, paringkuanangan paraguon kuno ri Aki Kapuuno'. 4Am moonong aku makiasi' ri Aki Kapuuno' ramuyun, pakiasian kuno mabaya' ra guang makaansuk. 5Paringkuanangan kuno ri Aki Kapuuno' sabap ra intor ra talimpuun ra aku nangandoi suku' raino minaya' kau pangindangan nampasaboi ra Tanou Moonsoi ri Aki Kapuuno'. 6I Aki Kapuuno' noyo galama' nanalimpuun ra kandoi moonsoi ralalom ru kaayagan min. Am makakalansanan aku toojo ra Io po niayuk mamparayus ra kandoi ragitio saboi mopongo, suku' ri Jisus Kristus matong saguli'. 7Moonsoi noyo ra aku maansukan ramuyun, sabap ra kabalu' pana maalur ayuk ra mato, mamaar kau ayuk ra guang kuno. Am itakau ngaangai' nakapagagapu poyo ra kataawan ri Aki Kapuuno', iou pana raino, ra aku inaput ra lamin pangaputan, kapoam paat ra aku nakapampainono' am nampapiot poyo ra Tanou Moonsoi no ra ulun masuang no. 8I Aki Kapuuno' noyo sasi' ra totopot moondom aku toojo ramuyun mabaya' ra togom ru guang ri Jisus Kristus galama'.
9Gitio noyo pakiasian kuno ri Aki Kapuuno' ra gama' ru mulu' poyo togom mino ri Aki Kapuuno', mogondo' niayuk ra mulu' poyo kapandayan min ra katapatan am kaintutunan no. 10Maa' raginio mapandai kau magilong ra ati kia moonsoi toojo. Am makainggalur kau boo intor ra kalaatan kapoam nansalinut panguwan ondo' mampakasala ramuyun, ioginio paat ri Kristus matong saguli'. 11Intor raginio, kaayagan mino mauli' ra baal topot-topot moonsoi ondo' kondoyon ri Jisus Kristus, am bagu raginio katulayon am omporon boo i Aki Kapuuno'.
Kaintutunan galama' ri Paulus
12Pabukat ra Kristian kau, masaga' aku mapaintutun ramuyun ra atan ondo' nasauk raki' ti, sotopot no nangindangan poyo raki' ra papasabayan ra Tanou Moonsoi no. 13 Intor ra baal raginii, ngaangai' saujor ru istana no am ulun-ulun ru bandar ti pana nakapandai ra inaput aku sabap ra kandoi kuno ri Kristus. 14Am sabap ra kinibit ra aku inaput ti, masuang boo ulun Kristian intor ra bandar ragitio mangintopot poyo toojo ra Tuhan, saboi mulu' ilo poyo makakau' mampasaboi ra bala' Nano ra kolondo' kalaanan nilo.
15Iou pana ginio, mokoondo' niayuk ulun mampabala' ra tanou ri Kristus sabap ra tanou ri Kristus mabaya' ra guang motopot. 16Ilo napabala' ra tanou ri Kristus sabap ra togom nilo ri Aki Kapuuno' am aku. Nakapandai ilo ra i Aki Kapuuno' noyo nanusub raki' mampakito ra Tanou Moonsoi no motopot. 17Kaa' ulun ra bokon no mampabala' ra pangilaan ri Kristus no koson maguyum ayuk ra ampos nilo galama', pai' ru mabaya' ra guang motopot. Am intor ra ginio indos nilo ra mulu' poyo bagat ru kapaganan kuno ra aku inaput ti.
18Polosoon noyo ginio, sabap raginio kalo niayuk mantipagon raki'. Mabaya' ra guang nilo ra motopot kapoam malaat kia, pinatanou nilo niayuk pangilaan ri Kristus i; am gitio noyo kaansukan kutu. 19Makapandai aku ra mansail ra pakiasian min ri Aki Kapuuno' am ra kaindanganan Nano mansail ra Ambiluo ri Jisus Kristus makalabus aku boo. 20Sabap ragitio noyo kaandaman am kalansanan ru guang kuno ra kolondo' rondo' pana kandoi kuno mampakauyu' raki'. Masalok aku niayuk moondom, am mulu' poyo raino, makakau' toojo mapatulai ri Kristus ralalom kiralan ru kaayagan kuno – iou ra maayag aku kapoam matoi. 21Sabap ra koson raki', pangkaraan kuno am mintutun toojo ri Kristus ayuk! Am matoi aku pana, mulu' poyo kinoonsoi ru ampos no. 22Kaa' amon ru posoroyon aku poyo ra tana' ti koson mokoowot poyo ra ampos ru kandoi kuno, kalo noyo makapampili' aku ra ati kia rondo' bayaan kuno. 23Karuo-ruo ti mampakabunduk ra guang kutu. Masaga' aku niayuk mangiruan ra painawo kutu am makasimpung ri Kristus, sabap ra ginio noyo moonsoi no. 24Kaa' mulu' poyo kinaatang no ru soroi aku po giti ra tana' ti koson makapangindangan poyo ramuyun. 25Am gitio noyo kapandayan am kalansanan kutu ra lakat aku po niayuk sumoroi mabaya' ramuyun, maa' raginio pangintapatan min maikang boo mabaya' ra kaansukan. 26Am koson boo raginio, paat ra aku mongoi poyo ramuyun, mulu' poyo kinasuang ru paringkuanangan min sabap ra indangan kutu, ondo' nagibit noyo ramuyun makasimpung ri Jisus Kristus.
27Raino ondo' maatang toojo, kaayag kano sumugut ra Tanou Moonsoi ri Kristus. Maa' raginio, maampon ru moongoi takamin kailai' kapoam kalo, morongog takamin niayuk ra mingkotog kau poyo koson rondo' ayuk pangintapatan am niayuk rondo' guang min. Maa' raginio, makakau' kau mampabala' ra pangintapatan ondo' inimpuun ra Tanou Moonsoi no. 28Pakakau' kano; pai' kalaa' risilo ondo' mangimbolo' ramuyun. Intor ra ginio mampakito kau ra ilo ti maala am akau makagula', sabap ri Aki Kapuuno' galama' intor ru indangan minti. 29Sabap ra akau inanian ra kaluagan manguma' ra kaimbalaan sabap ri Kristus am sala' ka mangintopot ayuk Riso. 30 Raino, akau pana mabaya' niayuk raki' mampakito ra katapatan ru Tanou Moonsoi ti: Am kandoi ti nogondo' ra pangayawan ondo' nauma' kuno am nakito min noyo ragili am ondo' maining min ra lakat poyo.
Currently Selected:
PILIPI 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.