KAINGKUALAN 39
39
Mambaal ra bayang ru imam
(Kai. 28:1-14)
1Pambaal ilo ra bayang moonsoi tayar ru imam-imam no intor ra konoon makabatik motomou, matanggilung am malia'. Bayangon ru imam-imam bayang no paat ra ilo mangandoi giu' ra Lamin Matulai. Mambaal ilo ra bayang imam ri Arun koson ra nanusuban ru Tuhan ri Musa.
2Pambaal ilo ra efod intor ra konoon linon molomos, konoon bulu makabatik motomou, matanggilung am malia' am banang mas. 3Tinukul nilo pila' ru mas am sauko' no ra kokoson ra banang malilis am patakinon ra konoon linon molomos am konoon bulu makabatik motomou, matanggilung am malia' ondo' binungaan ra sulaman. 4Kopongo ginio pambaal ilo ruo tali ru limbawo pamangkos ra efod, ondo' pinapikit ra kiing no. 5Abot ondo' binaal kalumiso' intor ra bahan nogondo' no, pinapikit ra efod no saboi nasauk rondo' tayar, koson ra nanusuban ru Tuhan ri Musa. 6Asaa' nilo batu sardis am kiniingan ra bingkai mas. Ra katasikan toojo, ukiro' nilo inggalan ru mopor am ruo ngaulun anak ri Jakub ra batu-batu parmata no. 7Patakino' boo batu-batu parmata no ra tali ru limbawo ru efod koson tatandu' pangkaraan ra koopor am ruo bansa' ru Israil, koson ra nanusuban ru Tuhan ri Musa.
Mambaal ra utau
(Kai. 28:15-30)
8Pambaal ilo ra utau intor ra bahan raginio niayuk, nogondo' ra pinakai ra efod, am sulaman no pana nogondo'. 9Baal no apat persegi am pinurun ruo, gawar no 22 ngasintimito am pila' no 22 ngasintimito. 10Takini' nilo ra apat ngambaris batu parmata ra utau no. Baris kasaa' tinakinan ra batu dalima', batu topaj am batu garnit; 11baris karuo tinakinan ra jamrud, batu nilam am batu berlian; 12baris katalu tinakinan ra batu pirus, batu akik, am batu kasubung; 13baris kaapat tinakinan ra batu biril, batu sardis am batu jaspir. Ngaangai' batu parmata no kiniingan ra bingkai mas. 14Moonong batu parmata no inukir rondo'-rondo' inggalan ru anak-anak ri Jakub no koson tatandu' pangkaraan ra mopor am ruo bansa' ru Israil. 15Pambaal ilo ra rantai intor ra mas kopoyo ondo' pinitol koson ra tali ru utau no. 16Pambaal ilo ruo bingkai mas am ruo golong mas, am patakino' ruo golong mas no ra pisuk tampilon rasawat ru utau. 17Pobongkoso' nilo ruo rantai mas no ra ruo golong mas, 18am pobongkoso' pompor ru rantai mas ra rondo' poyo ra karuo-ruo bingkai. Koson raginio makatunggul utau no ra tampilon saang ru tali ru limbawo ru efod. 19Pambaal ilo ruo golong mas am patakino' ra utau, pisuk tampilon ragana', tampilon ralalom no makatiu' ra efod. 20Pambaal ilo ruo golong mas poyo, am patakino' tampilon ragana' ra saang ru ruo tali ru limbawo ru efod, maar ra tunggul ru pikit am tampilon rasawat ru abot ondo' binaal kalumiso'. 21Maaya' ra susuban ru Tuhan ri Musa, pobongkoso' nilo golong ru utau no ra golong ru efod ra tali motomou, maa' raginio soroi utau no rasawat ru abot am kalo malakas.
Mambaal ra bayang ra bokon tayar ru imam-imam
(Kai. 28:31-43)
22Bayang ondo' bayangon porolomon ra efod, ngaangai' no binaal intor ra konoon bulu makabatik motomou. 23Luang ru liog no piniot ra konoon malilis maa' raginio kalo maluoi marilak. 24-26Giu' ra liput ru kiing tampilon ragana' ru sukub no, pambaal ilo ra bunga' koson kawa' ru dalima' intor ra konoon linon molomos am konoon bulu makabatik motomou, matanggilung am malia' pinangkilolot ra lunsing intor ra mas kopoyo, sumugut ra susuban ru Tuhan ri Musa.
27Pambaal ilo ra sukub intor ra konoon linon molomos bayangon ri Arun am anak-anak nano, 28am niayuk serban, sigal, saluar mariwa' intor ra konoon linon, 29abot intor ra konoon linon molomos, am konoon bulu makabatik motomou, matanggilung am malia', binungaan ra sulaman, koson ra nanusuban ru Tuhan ri Musa. 30Pambaal ilo rondo' pamunga' intor ra mas kopoyo, rondo' tatandu' ondo' matulai ra patimpokon ilo noyo. Ginio ra pamunga' no inukir nilo ragu ragitio: “Patimpokon ra Tuhan”. 31Pamunga' no pinabangkos ra serban ra tali motomou, koson ra nanusuban ru Tuhan ri Musa.
Pinongo kandoi
(Kai. 35:10-19)
32Ngaangai' kandoi mambaal ra Kim ru Tuhan nopongo noyo. Binaal ngaangai' no ru ulun ru Israil koson ra nanusuban ru Tuhan ri Musa. 33Ibito' nilo Kim ru Tuhan am ngaangai' kuliamos no ri Musa, sangutan, rangka, baak, lugu' am antulan ru lugu'; 34panaub intor ra kungkung ru domba gawayan ondo' kinalia'; panaub intor ra kungkung molomos; tabir; 35Kaban Nabantuan ondo' makasuang ruo batu pamatikan, am niayuk tataun bandasan no am niayuk panaub no; 36mija' am ngaangai' kuliamos no, ruti' ondo' pataakon ri Aki Kapuuno'; 37tampakan ra lampung intor ra mas kopoyo, lampung no, ngaangai' kuliamos no am umau ru lampung; 38altar mas; umau upacara, kaminyan ondo' maamis owou; tabir ru kulobon ru Kim ru Tuhan; 39altar gangsa' am kekisi no, tataun bandasan no am ngaangai' kuliamos no; bisin am antulan no; 40tabir ru insor, lugu' ru insor am antulan ru lugu'; tabir ru kulobon ru insor am tali-tali no; paku' tataun ru Kim ru Tuhan; ngaangai' kuliamos ondo' pakayon ralalom Kim ru Tuhan; 41am bayang moonsoi tayar ru imam-imam, ondo' bayangon paat ra ilo mangandoi giu' ra Lamin Matulai, am bayang timpok ra Imam Arun am anak-anak nano. 42Nopongo ru ulun ru Israil ngaangai' kandoi koson ra nanusuban ru Tuhan ri Musa. 43Inilayan ri Musa ngaangai' no, am ilai' no ra binaal nilo totopot koson ra nanusuban ru Tuhan. Ginio ra barakato' ilo ri Musa.
Currently Selected:
KAINGKUALAN 39: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.