KAINGKUALAN 31
31
Ulun manambaloi ondo' mambaal ra Kim ru Tuhan
(Kai. 35:30—36:1)
1Indagu Tuhan ri Musa, 2“Nampili' Aku ri Bijalil anak ri Uri, akupu ri Gur, intor ra bansa' ru Jiuda. 3Nanaak Aku ri Bijalil ra kuasa' Kuno. Nanaak Aku riso ra pangaratian, katasikan am kapandayan ralalom ngaangai' salinut ru kandoi seni: 4Koson mangatang ra baal matuyu' ondo' mompogogot ra katasikan mambaal raginio mampakai ra mas, pirok am gangsa'; 5koson mamutul ra batu parmata ondo' tuyuon; koson mangukir ra tataun am koson mambaal ra ngaangai' salinut ru kandoi seni ra bokon. 6Nampili' Aku niayuk ri Ogoliab anak ri Agisamak intor ra bansa' ru Dan, koson mangandoi ri Bijalil. Nanaak Aku noyo ra kapandayan ondo' matuyu' ru ngaangai' ondo' mangatasik, maa' raginio ngaangai' susuban Kuno mabaal nilo: 7Kim ru Tuhan, Kaban Nabantuan am panaub no, ngaangai' kuliamos ru Kim ru Tuhan, 8mija' am kuliamos no, tampakan ra lampung intor ra mas kopoyo am kuliamos no, altar ru panalaban ra kaminyan, 9altar ru taak simbalui koson mapabansuk ra guang ru Tuhan am ngaangai' kuliamos no, bisin am antulan no, 10bayang ru sambayang ru imam, ondo' bayangon ri Arun am anak-anak nano paat ra ilo mangandoi koson ra imam, 11umau upacara am kaminyan ondo' maamis owou tayar ru Lamin Pansunuran. Musiti' baalon nilo ngaangai' no topot koson ra susuban Kuno rirun.”
Sabat, orou tangusan
12Nanusub Tuhan ri Musa 13koson mambala' ra ulun ru Israil, “Iantakon orou Sabat, orou ondo' inaru' Kuno koson orou tangusan, sabap ra orou raginio iono rondo' tatandu' ru Aku am akau ra sabuoi-buoi no, koson manulu' ra Aku, Tuhan napasauk ramuyun ra ulun Kuno galama'. 14Musiti' min iantakon orou tangusan no, sabap ra orou raginio mapasau. Osoi ondo' kalo mangiantak ra orou raginio, am mangandoi ra orou raginio musiti' ukumin potoyo'. 15 Pongondoyon kau buoi kaanaman, kaa' orou katulu' iono orou tangusan ondo' matulai, ondo' patimpokon Raki'. Osoi mangandoi ra orou raginio musiti' ukumin potoyo'. 16Musiti' ulun ru Israil mangiantak ra orou no koson tatandu' nabantuan. 17 Orou raginio rondo' tatandu' ondo' mantilayun ru Aku am ulun ru Israil, sabap ra Aku, Tuhan napasauk ra limbowon am tana' ti buoi kaanaman; paat ra orou ra katulu' minuog Aku mangandoi, am tangus Aku.”
18Kopongo Tuhan minindagu ri Musa giu' ra Gunung Sinai, panaak i Aki Kapuuno' riso ruo batu pamatikan ondo' tinulisan ri Aki Kapuuno' galama' ra susuban Nano.
Currently Selected:
KAINGKUALAN 31: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.