IPISUS 4
4
Rondo' inan
1Ginio sabap ra aku ti ondo' inaput sabap ra mangandoi ra Tuhan, makitaak toojo ramuyun ra kaayag kano maya' ra atan ondo' inaru' noyo ri Aki Kapuuno' paat ra Io nampiau ramuyun. 2 Paingganaa' noyo guang min, kolomoi am kasalok kano mataan guang. Pakitono' noyo kinotogom min ra mangindangan kau ra rondo' am bokon. 3Pirot kano pagalung ra pasimpungan mino, ondo' tinaakan ru Ambiluo ri Aki Kapuuno', ralalom pabansayan ondo' mampasimpung ramuyun. 4Rondo' ayuk inan am rondo' ayuk Ambiluo ri Aki Kapuuno', mogondo' niayuk ra rondo' kalansanan mino ra akau piniau ri Aki Kapuuno'. 5Rondo' ayuk Tuhan, pangintapatan am pamariwan. 6Rondo' ayuk i Aki Kapuuno', Ama' ru ngaangai' ulun. Io noyo maningganai am manguasa' ra ngaangai', am sumoroi niayuk ra ngaangai'.
7Itakau sigagama' inanian ra kapandayan maya' ra kataawan ri Kristus. 8 Koson tinulisan ra Buuk Kitab,
“Paat ra nagaloi Io giu' ra rasawat kaga',
nampaaya' Io po ra masuang ulun rinakop;
am nangani' Io ra ulun ra taak.”
9Arati' ru “nagaloi Io giu' ra rasawat kaga'”, ioginio, kasaa' no timinuun Io ra tana' ti, am nakasuku' Io poyo ra ragana' toojo. 10Io ondo' timinuun i, Io niayuk ondo' nagaloi giu' ra rasawat, ondo' masawat poyo intor ra ngaangai' limbowon, koson sumoroi Io ra ngaangai' no. 11Io no nangani' ra ulun ra taak; mokoondo' sinauk Nano ra rasul am bokon no nabi; mokoondo' poyo sinauk Nano ra ulun mampasaboi ra Tanou Moonsoi, am bokon no magagalung kapoam mangingila' ra pasimpungan ulun Kristian. 12Gitio binaal Nano koson momongo ra ngaangai' ulun ri Aki Kapuuno' mangandoi ra Tuhan, koson mapaikang ra inan ri Kristus. 13Koson raginio ra pangintapatan am kapandayan takau ngaangai' ra Anak ri Aki Kapuuno' no mogondo' ayuk. Masauk takau ra ulun maikang pangintapatan, ondo' buoi-kabuoi, makatilu ra paliso ri Kristus. 14Bagu no itakau kalo boo makapaliso koson ra lalaing, ondo' lilingganon ru kinulun am sisiabin ru angin, ioginio mangintopot ra mangingila' ondo' mapandai toojo mamparuung am mampalayau ra ulun. 15Sotopot no, kalo. Mindagu takau ra katapatan mabaya' ra togom, am koson raginio makatilu takau ra paliso ri Kristus, ondo' maningganai ritakau. 16 Maya' ra paningganayan Nano, moonong tayar ru inan mokoondo' noyo ra intok sigagama', am inan no matunggul toojo ru parangaban. Amon ru moonong tayar ti mambaal ra kandoi nano galama', ulun no sumukor boo, koson maikang takau boo ralalom ru togom.
Kaayagan bagu ralalom Kristus
17Sabap boo raginio, ralalom ru kuasa' ru Tuhan, balain takamin toojo koson ragitio: Pai' kano kaayag koson ra ulun ondo' kalo makaulig ri Aki Kapuuno', sabap ra ilo makapangkaraan ayuk ra atan ondo' kolondo' onong. 18Pangaratian nilo pana molondom. Kalo niayuk nakaliman ilo ra kaayagan ondo' taakin ri Aki Kapuuno', sabap ra kalo masaga' ilo mintutun am mokotog toojo ulu nilo. 19Kolondo' boo guang mauyu' nilo; saboi maya' ilo ayuk ra kasagaan ru inan nilo galama', io no mambaal ra atan ayuk kalaatan ondo' makauyuyu'.
20Kaa' i Kristus ondo' nauligan min, sala' ka koson raginio. 21Naining min noyo Io, am koson ra maamaya' Nano, inila' kano ra katapatan ri Jisus. 22 Sabap raginio, iruo' min noyo kaayagan ra nakalair i ondo' nangkinibit ramuyun ragili – ioginio kasagaan nakalair ondo' namuso ra paliso am nampalayau ramuyun i. 23Talimbagui' min noyo guang am pangkaraan mino. 24 Sauk kano ra ulun nakabagu ondo' saukon mansalu ri Aki Kapuuno', ioginio kaayagan motopot, ondo' mabanis ra pagilangan ri Aki Kapuuno'.
25 Pai' kano boo pagabau! Musiti' kau mindagu ra motopot ra rondo' am bokon, sabap ra itakau ngaangai' ti makatayar noyo ra inan ri Kristus. 26 Amon ru sumangit kau, pai' polosoo' sangit mino mangkinibit ramuyun makatula. Pai' bulii' sangit minti suku' ra talapan ru orou. 27Pai' min anii' Tingganai ru riwato no ra kaluagan mangkinam ramuyun. 28Osoi ayuk mantatakou, moonsoi langgain no am mangandoi koson maginakan io galama' am niayuk makapangindangan boo ra ulun musikin. 29Paat ra akau makimansunur, pai' raguo' ondo' makaruol ra guang. Indagu ayuk ra mokoonong, koson ra ragu mangila' am mangindangan, maa' raginio ondo' sinunur mino magibit ra kaansayan ra ulun ondo' mangkirongog. 30Pai' noyo pangiluko' Ambiluo ri Aki Kapuuno' no, sabap ra Io sumoroi ramuyun noyo tinatanduan kau ri Aki Kapuuno' ra akau ti Io no tatangan. Ambiluo raginio noyo ondo' mapakalansan ramuyun ra matong niayuk orou pampalabusan ramuyun ri Aki Kapuuno'. 31Langgai' noyo paliso ra mangusolon, guang ra malaat am masasangit. Pai' kau pakimansangor kapoam magasab ra ulun. Inggalur kano ra guang ra masisang. 32 Kaa' kataau am koonsoyo' noyo guang mino ra sangulun am bokon, am ampuno' noyo rondo' am bokon, mogondo' ri Aki Kapuuno' nangampun ramuyun ralalom ri Kristus.
Currently Selected:
IPISUS 4: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.