2 RAJA'-RAJA' 24
24
1 Paat ra pamarintaan ru Raja' Joyakim, Raja' Nibukadnijar intor ra Babilonia namulunsar ra Jiuda. Buoi talu ngambilor Raja' Joyakim kiminuku' kalalaat ra Raja' Nibukadnijar, kaa' tauli no giminuor Raja' Joyakim. 2Nangator Tuhan ra pulalai ru ulun malaat makakinandoi intor ra Babilonia, Siria, Moab am Amon koson manggal ra Raja' Joyakim am niayuk namuso ra Jiuda. Baal raginio noyo ondo' rinagu ru Tuhan ondo' pinabala' galing ra nabi-nabi Nano. 3Kasaukan raginio nasauk sumugut ra susuban ru Tuhan, koson mamatir ra mamagun ru Jiuda intor ra pagun ondo' pinataak No risilo, sabap ra ngaangai' ru tula ru Raja' Manasi, 4mulu' poyo ra namatayan ra ngaangai' ru ulun ondo' kolondo' tula. Kalo makapangampun Tuhan ra Raja' Manasi sabap ra binaal nano.
5Ngaangai' binaal ru Raja' Joyakim tinulisan ra ralalom ru buuk Sejarah ru Raja'-Raja' ru Jiuda. 6Patoi Raja' Joyakim, am i Joyakin, anak ungkuyon nano minalit riso koson ra raja'.
7Intor ragili raja' ru Misir am saujor nano kalo boo miningkual intor ra Misir koson mamulunsar, sabap ra paat raginio raja' ru Babilonia nanguasa' ra titikop ru wilayah ondo' ragili kinuasa' ru Misir, intor ra Sungoi Iprat saboi ra balitan ralayo ru pagun ru Misir.
Raja' Joyakim, raja' ru Jiuda
(2 Tun. 36:9-10)
8Umur ru Raja' Joyakin mopor am balu' ngambilor paat ra io nasauk ra raja' giu' ra Jiuda. Namarinta io ra Jirusalim buoi talu ngansila'. Ina' nano ininggalanan ri Nigusta anak ri Ilnatan intor ra Jirusalim. 9Makatula niayuk Raja' Joyakin ra Tuhan, koson ra binaal ru ama' nali.
10Paat ra pamarintaan ru Raja' Joyakin, saujor ru Babilonia ondo' tiningganai ru pagawai-pagawai ru Raja' Nibukadnijar namulunsar ra Jirusalim am nagawang ra bandar no. 11Raja' Nibukadnijar galama' minatong ra Jirusalim paat ra nagawangan no, 12 am nababaya' Raja' Joyakin am ina' nano, anak-anak ungkuyon am ruandu' nano, pagawai-pagawai nano, pagawai-pagawai ru istana nano nakirakop ra ulun Babilonia, Raja' Joyakin pana rinakop. Kasaukan ragitio nasauk ra bilor kabalu' ru pamarintaan ru Raja' Nibukadnijar. 13Kuliamos giu' ra Baloi ru Tuhan am istana inibit ru Raja' Nibukadnijar ra Babil. Koson ra ondo' rinagu noyo ru Tuhan, inumok ru Raja' Nibukadnijar ngaangai' kuliamos mas ondo' binaal ru Raja' Salomo ondo' pinakai giu' ra Baloi ru Tuhan. 14Mamagun ru Jirusalim inaut ru Raja' Nibukadnijar, nakaaya' anak-anak ru raja' am tingganai-tingganai ru mamagun koson ra ulun rinakop pinoongoi ra pamatiran – 10,000 ngaulun ringai'. Inaut niayuk ru Raja' Nibukadnijar ngaangai' ulun manukang ra maturasik am manukang ra basi', kaa' nanatang ra mamagun ondo' musikin kaga' giu' ra Jiuda.
15 Inibit ru Raja' Nibukadnijar Raja' Joyakin, ina' nano, andu'-andu' nano, pagawai-pagawai nano, am ngaangai' ulun nauligan toojo giu' ra Jiuda, sinauk ra ulun rinakop pinoongoi ra Babil. 16Namatir Raja' Nibukadnijar ra ngaangai' ulun ondo' mapanggol ra Babilonia, suang no 7,000 ngaulun; am niayuk 1,000 ngaulun manukang ondo' mapandai kaga', nakaaya' manukang ra basi'. Ilo ngaangai' ondo' maikang am makapangayou.
17 Napalantik Raja' Nibukadnijar ri Matanya, kamaman ru Raja' Joyakin, nasauk ra raja' ru Jiuda, am nangalig ra inggalan nano nasauk ri Jidikia.
Raja' Jidikia, raja' ru Jiuda
(2 Tun. 36:11-12; Jir. 52:1-3a)
18 Umur ru Raja' Jidikia ruo ngoopor am rondo' ngambilor paat ra io nasauk ra raja' ru Jiuda. Namarinta io ra Jirusalim buoi mopor am rondo' ngambilor. Ina' nano ininggalanan ri Gamutal anak ri Jirimia intor ra bandar Libna. 19Makatula Raja' Jidikia ra Tuhan koson ra Raja' Joyakim ragili. 20 Siminangit kaga' Tuhan ra mamagun ru Jirusalim am Jiuda saboi ra kalo boo mampalio Io risilo.
Currently Selected:
2 RAJA'-RAJA' 24: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.