Jeremiya 14
14
Mapenzi aaboola: cimpayuma, inkondo, inzala amalwazi
1Ngaaya majwi aa-Jehova aakasika kuli-Jeremiya aacimpayuma. 2#Is 3:26; 15:3,4; Kul 11:6; Tus 21:13Cisi ca-Juda cilalila, Mumilyango yaco bantu balatuntuma, balikede ansi, balisamine zisia, Kulila kwa-Jerusalemu kwamvwigwa. 3#Int 40:14; 2 Sam 15:30Basilutwe balatuma baniini babo kuti bateke maanzi, pele basika buyo kumikalo, tabajani maanzi pe, aboobo balapiluka antesyo zitakwe cintu. Balausa insoni, balausa bweeme, balalivumba kumutwe. 4Basikulima nyika bapengesya nkaambo kakutalokelwa imvula, basimapulazi bafwa insoni, balalivumba kumutwe. 5Insya yamusokwe ayalo ilatakata mwana nguyazyala nkaambo kakuti taakwe mweemvwe. 6#Jer 2:24Imbongolo zyamusokwe ziliimvwi atala lyabalubulansuki, zilafweketa mbuli bamwaaba; meso aazyo akataala kukuyandaula zyakucela.
7 #
Int 25:11
Nekuba kuti zibi zyesu zilatupa kaambo, kocita mbulyeelede izina lyako, Jehova, nkaambo indeyo zyesu nzinji, ncobeni twakubisizya. 8#Jer 17:13; Inc 28:20; 1 Tim 1:1; Int 46:1Nduwe olike Israyeli ngwalangila, nduwe mufutuli wakwe muciindi dunafwabi. Sa ncibotu kuti ube mbuli mweenzu mucisi, ambuli silweendo uuona busiku bomwe buyo? 9#Is 59:1; Kul 29:45Sa ncibotu kuti ube mbuli muntu uuzingidwe, mbuli silumamba uutakonzyi kufutula? Ncobeni uli akati kesu, O Jehova, Tulaambwa muzina lyako. Utatuleki.
10 #
1 Bam 17:18; Int 109:14; Hos 8:13; Heb 8:12 Mbuboobu Jehova mbwaamba aabantu aba, Bayandisya kutuntulika, tabana kukasya maulu aabo pe. Nkaambo kako Jehova tabotelwi mbabo, ulayeeya milandu yabo, ulababweedezya bulumbu bweelede bwazibi zyabo.
11 #
Kul 32:10
Lino Jehova wakandaambila kuti, Utakombeli bantu aba kuti bajane coolwe pe. 12#Tus 1:28; Is 1:15; Jer 11:11; Mik 3:4Nekuba kuti baliimya kulya, nsikooyooswiilila lukwiilo lwabo pe. Nekuba kuti batuula zipaizyo azituuzyo zyabusu, nsikooyoozitambula pe, Njoobamanya ipanga apamba amalwazi.
13Mpawo ndakati, Akaka, Mwami Jehova! Bona basinsimi mbubali mukubaambila kuti, Tamukooyoobona inkondo pe, alyalo ipamba talikooyoobonwa akati kanu, pele njoomupa luumuno lwakasimpe mubusena obuno. 14#Is 30:10; Jer 23:21; 2 Tes 2:9-11Lino Jehova wakandaambila kuti, Basinsimi balasinsima zyakubeja muzina lyangu, Teensi ndime ndakabatuma, teensi ndime ndakabalailila nikuba kubaambila pe. Balamusinsimina zilengano zyakubeja akusonda kwabuyo anjeeno zyamyoyo yabo beni. 15#Jer 23:15Lino mbuboobu Jehova mbwaamba aabasinsimi basinsima muzina lyangu nekuba kuti nsina kubatuma, baamba kuti takukooyooba inkondo niliba ipamba omuno munyika, Abo basinsimi bayoojazigwa zintu ezi nzizyonya, inkondo apamba. 16#Mt 15:14; Int 79:3Abalo bantu mbebasinsimina bayoosoowegwa mumigwagwa yamu-Jerusalemu nkaambo kapamba, ankondo, nkabela takukooyooba muntu wakubazika, balo abanakazi babo abana babo balombe abana babo basimbi, nkaambo njoobabweedezya bubi bwabo.
17 #
Malo 1:16; Jer 8:21 Lino uleelede kubaambila ijwi eli lyakuti, Meso aangu akunke misozi masiku asikati lyoonse cakutaleka, nkaambo mwana musimbi wabantu bangu waumwa luumo lupati, waciswa mubunda uuyoosya loko. 18#Ezk 7:15Na ndiya bweenda musokwe, baboneka bajayidwe kupanga, alimwi na ndanjila mumunzi, baboneka baciswa inzala, nkaambo basinsimi abapaizi boonse balaya busunza munyika njibatezi.
19 #
2 Bam 17:20; Int 78:59; Malo 5:22 Sa wasoowelela cisi ca-Juda? Sa moyo wako wacimwa Zioni? Nkaambonzi watuuma luumo lutasilikwi? Twakali kulangila luumuno, pele taakwe bubotu ibwakatusikila. Twakali kulindila ciindi cakuponesegwa pele kwasika makani aayoosya buyo. 20#Ezr 9:5; 1 Joh 1:9; Dan 9:8Tulizi bubi bwesu, O Jehova, amilandu yabamatateesu, nkaambo twakubisizya. 21#Jer 17:12Utatusampauli, nkaambo kazina lyako. Utaubyi cuuno cabulemu bwako. Kotuyeeya, utamwayi cizuminano ncotangene aswe. 22#Is 30:23Sa nkwali naba omwe akati kabaleza babuyo babamasi uukonzya kulosya imvula? Na ijulu lini sa lilapa muyoba? Sa teensi nduwe O Jehova Leza wesu? Myoyo yesu ili kulinduwe, nkaambo nduwe oocita zintu ezi zyoonse.
Currently Selected:
Jeremiya 14: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.