Ezekieli 34
34
Beembeli babeji mbubatapatilwa
1Lino ijwi lya-Jehova lyakandisikila, liti, 2#Ezk 33:24; Jer 23:1O mwana amuntu, sinsima akutapatila beembeli ba-Israyeli. Sinsimina beembeli, ukabaambile kuti, Mbuboobu mbwaamba Mwami Jehova. Maawe kubeembeli baIsrayeli ibakali kulisanina beni! Sa milimo yamweembeli tiiyeensi yakusanina imbelele? 3#Is 56:11; Mik 3:3Nywebo mulalya malili, mulasama boya, mulajaya zineneede, pele imbelele tamuzisanini pe, 4#Zek 11:16; 2 Tim 2:24; Lk 15:4; 1 Pet 5:3; Mt 9:36; Is 56:9Zilebulukide tamuna kuziyumya, indwazi tamuna kuzisilika, zityokede tamuna kuzyaanzya tusengele, ziswekede tamuna kuziboozya, azeezyo ziyanda kufwa tamuna kuziyandaula. Mwazyeendelezya canguzu acakusinikizya. 5#My 27:17; 1 Bam 22:17; Mt 9:36; Mk 6:34Zyakamwaika nkaambo kakubula mweembeli, nkabela zyakaba zilyo zyabanyama boonse bamusokwe. 6Imbelele zyangu zyakamwaika, zyakali kuya butuntulika azilundu zyoonse amalundu oonse malamfu. Imbelele zyangu zyakamwaisigwa munyika yoonse buyo, nkabela katakwe muntu iwakali kuziyandaula na kuzilangaula.
7Nkaambo kako amuswiilile ijwi lya-Jehova nobeembeli. 8Ncobeni mbundi muumi, mbwaamba Mwami Jehova, ndibwene kuti imbelele zyangu zyaba zisaalo, imbelele zyangu zyaba zilyo zyabanyama boonse bamusokwe, nkaambo kakubula mweembeli, nkaambo beembeli bangu tabana kuyandaula imbelele, alimwi beembeli balisanina beni, tabasanini imbelele. 9Nkaambo kako amuswiilile ijwi lya-Jehova, nobeembeli. 10#Ezk 3:18; 33:6-8; Heb 13:17Mbuboobu mbwaamba Mwami Jehova. Ncobeni ndaba sinkondonyina beembeli, njoobapa mulandu wambelele zyangu, njoobalesya kweembela imbelele, aboobo beembeli tabakooyoolisanina limbi. Njoovuna imbelele zyangu kumilimo yabo, kuti zitabi limbi zilyo zyabo.
Mweembeli mubotu
11Nkaambo mbuboobu mbwaamba Mwami Jehova. Ncobeni njoolangaula imbelele zyangu, njooziyandaula mebo ndemwini. 12#Jer 13:16; Ezk 30:3; Joel 2:2; Zef 1:15; Inc 2:19-21Mbubonya mbuli mweembeli mbwayandaula butanga bwakwe mubuzuba bwakusweekelwa imbelele zimwi, ambebo njooyandaula imbelele zyangu akuzivuna kuzwa kumasena conse nkuzyakamwaikilide mubuzuba bwamayoba aasia mbi. 13#Is 65:9,10; Jer 23:3; 36:24Njoozigwisya kulibamasi, njooziyobolola kuzwa kuzisi, njooziboozya kunyika yazyo, elyo njoozyeembela amalundu aa-Israyeli, kumbali lyatulonga amumakalilo oonse aamunyika. 14#Int 23:2; 34:8-10; Is 25:6; 30:23,24; Jer 31:12-14,25; Joh 10:9; Jer 33:12Njoozisanina mumeembelelo mabotu, Atala lyamalundu malamfu aa-Israyeli mpoziyoocelela, Ziyoobuta mpoonya awo mumacelelo mabotu, nkabela ziyoocela mani aalweela amalundu aaIsrayeli. 15Mebo njooembela imbelele zyangu akuzibutya, mbwaamba Mwami Jehova. 16#Is 40:11; 61:1-3; Mik 4:6,7; Mt 15:24; Mk 2:17Ziswekede njooziyandaula, zitandidwe njooziboozya, zityokede njoozyaanzya tusengele, zilebulukide njooziyumya, pele zineneede aziyumu njoozinyonyoona akuzisanizya lubeta,
17 #
Ezk 20:37; Zek 10:3; Mt 25:32 Anywebo nombelele zyangu, mbuboobu mbwaamba Mwami Jehova. Amubone! Nzoobeteka makani aambelele ambelelenyina, amakani aabagutu abajembwe, 18#Mt 23:13Sa tamulamwi kucela macelelo mabotu? Nkaambonzi nomulyataula macelelo amwi aasyede azituta zyanu? Sa tamulamwi kunywa maanzi aanjoloma P Nkaambonzi nomuvundaanya maanzi aasyede azituta zyanu? 19Sa imbelele zyangu zileelede kucela macelelo ngemwalyatauzya zituta zyanu akunywa maanzi ngemwavundaanya zituta zyanu?
20Nkaambo kako mbuboobu mbwaamba Mwami Jehova Leza. Ncobeni nzoobeteka makani aambelele zineneede ambelele ziketede. 21Mulaya butonta amakuko aanu amabazu aanu, mulatanda zilebulukide ameja aanu mane lumwi mwazimwaisya anze. 22Nkaambo kako njoofutula imbelele zyangu, kuti zitabi limbi cisaalo, nkabela njoobeteka makani aambelele ambelelenyina. 23#Is 40:11; Joh 10:11; Heb 13:20; Jer 30:9; Ezk 37:24Lino njoozibusizya mweembeli omwe, mulanda wangu Davida, Ngonguwe uyoozyeembela. Uyoozisanina akuba mweembeli wazyo. 24#Matl 17:7; Kul 29:45; Lk 1:32Ambebo nde-Jehova njooba Leza wabo, amulanda wangu Davida uyooba mweendelezi akati kabo, Ndime Jehova wacaamba.
25 #
Lev 26:6; Is 11:6; Jer 23:6 Lino njootangana abo cizuminano caluumuno, nkabela njoolesya banyama babi munyika, kuti bakakale cakuliiba munkanda akoona mucisaka. 26#Is 56:7; Matl 12:2; Lev 26:4; Int 68:9; Mal 3:10Njoocita kuti babe coolwe, balo amasena oonse aazyungulukide cilundu cangu, Alimwi njoowisya lusunsu kucindi ceelede; kuyooloka lusunsumina lwacoolwe. 27#Int 85:12; Jer 2:20; 25:14Ayalo misamu yamumyuunda iyoozyala micelo yayo, anyika iyookuzya zilyo, aboobo bayookala anyika yabo cakutayoowa. Lino bayooziba kuti ndime Jehova ninzootyola zikeyi zyajoko lyabo akubavuna kumaanza aabaabo ibakabanjizya mubuzike. 28#Ezk 36:4Tabakooyooba limbi lusaalo lwabamasi, abalo banyama baansi tabakooyoobalya. Bayookala caluumuno, taakwe naba omwe uuyoobayoosya. 29Njoobabusizya myuunda iizyalisya, aboobo tabakooyoopenzegwa limbi inzala munyika yabo nikuba kusampaulwa limbi kulibamasi. 30#2 Tim 1:12Lino bayooziba kuti mebo nde-Jehova Leza wabo ndi abo, abalo basiluzubo lwa-Israyeli mbantu bangu, mbwaamba Mwami Jehova. 31#Int 100:3Ndinywe imbelele zyangu, imbelele zyamacelelo aangu, ambebo ndime Leza wanu, mbwaamba Mwami Jehova.
Currently Selected:
Ezekieli 34: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.