Ezekieli 33
33
Milimo yamulindizi
1Lino ijwi lya-Jehova lyakandisikila, liti, 2#Ezk 3:11; 2 Sam 18:24O mwana amuntu, ambila bana babantu bako. Kobaambila kuti, Na ndaletela nyika ipanga, lino bantu banyika eyo balasala muntu omwe akati kabo akumubika kuti abe mulindizi wabo, 3elyo muntu oyo abona ipanga lileza anyika ulasiba mweembo akucenjezya bantu, 4#Lev 20:9,11; 2 Sam 1:16; Ezk 18:13; Inc 18:6kufumbwa muntu uuswiilila kulila kwamweembo, nekubaboobo tacenjeli aboobo ipanga lilasika akumutola, ngumulandu wakwe mwini. 5Waswiilila kulila kwamweembo pele tacenjeli, aboobo bulowa bwakwe ngumulandu wakwe mwini. Anukuti naakacenjela naakavuna buumi bwakwe. 6#Is 56:10Pele mulindizi abona ipanga lileza, na wabula kusiba mweembo aboobo bantu tabacenjeli, alimwi ipanga lilasika akutola muntu naba omwe akati kabo, oyo muntu watolwa muzibi zyakwe, pele bulowa bwakwe ngumulandu wamulindizi.
7 #
Ezk 3:17; Hab 2:1 Lino webo, O mwana amuntu, ndakubika kuti ubede luzubo lwa-Israyeli mulindizi. Uyooswiilila majwi aakumulomo wangu, lino uleelede kubacenjezya muzina lyangu. 8#Is 3:11; Tus 8:36Kufumbwa ciindi nendaambila sizibi kuti, O sizibi, ncobeni ulafwa-na wabula kwaamba ijwi lyakucenjezya oyo sizibi kuti aleke inzila zyakwe, lino oyo muntu sizibi ulafwa muzibi zyakwe, pele bulowa bwakwe ngumulandu wako. 9#Tus 29:1; Lk 12:47; Inc 13:46; Heb 2:2,3Pele na wamucenjezya sizibi kuti aleke inzila yakwe, nekubaboobo taleki inzila yakwe, oyo muntu ulafwa muzibi zyakwe, pele webo tojisi mulandu pe.
Muntu ulijisi mulandu wazibi zyakwe mwini
10 #
Ezk 24:23; Is 49:14 Lino webo, O mwana amuntu, ambila luzubo lwa-Israyeli kuti, Ndimvwide mbumwaamba. Mwaamba kuti, Milandu yesu azibi zyesu zyoonse zyatulemena. Tuli mukubola mulinzizyo, Tupone buti? 11#2 Sam 14:14; Malo 3:33; Hos 11:9; 1 Tim 2:4; Is 55:6,7; Ezk 18:31Kobaambila kuti, Mbubonya mbundi muumi, mbwaamba Mwami Jehova, nsiyandi abuniini kuti sizibi afwe pe, ndayanda kuti aleke bubi bwanzila zyakwe akulijanina buumi. Amupiluke, amupiluke, muleke inzila zyanu zyabubi. Nkaambonzi nomuyanda kufwa, O luzubo lwa-Israyeli?
12 #
Ezk 3:20; 2 Mak 7:14 Lino webo, O mwana amuntu, ambila bana babantu bako kuti, Bululami bwamululami tabukooyoomuvuna mubuzuba bwakubisya kwakwe, abwalo bubi bwasizibi tabukooyoomulebya mubuzuba bwakupiluka kwakwe. Mululami takonzyi kupona nkaambo kabululami bwakwe mubuzuba bwakubisya kwakwe. 13#Lk 18:9Ndaambila mululami kuti ncobeni uyoopona, nekuba-boobo na wasyoma bululami bwakwe akutalika kucita bubi, milimo iiluleme yoonse njaakacita tiikooyooyeeyegwa limbi pe; uyoofwa mububi bwakwe mbwaacita. 14Alimwi ndaambila sizibi kuti ncobeni ulafwa, nekubaboobo na waleka zibi zyakwe akutalika kubamba imbeta imbotu akucita bululami, 15#Ezk 18:7; 20:11; Kul 22:1; My 5:6,7; Lk 19:8; Lev 18:5; Mt 19:17na sizibi ulabweedezezya sizikoloto zisyomezyo zyakwe akupilusya ncaakanyanzya bantu akwenda mumilazyo yabuumi akutacita bubi, ncobeni uyoopona, takooyoofwa pe. 16#Ezk 18:22Zibi zyakwe zyoonse nzyaakacita tazikooyooyeeyegwa limbi pe. Mbwabamba imbeta imbotu akucita bululami, ncobeni uyoopona.
17Pele bantu bako balaamba kuti, Inzila ya-Mwami tiiluleme. Mal Ninzila yabo beni iitaluleme. 18Mululami naaleka bululami bwakwe akucita bubi ulafwa mulimbubo. 19Alakwe sizibi naaleka bubi bwakwe akubamba imbeta imbotu akucita bululami, uyoopona mulimbubo. 20#Ezk 18:25Mulaamba kuti inzila ya-Mwami tiiluleme. Ma! Njoomubeteka umwi aumwi mbuli inzila zyakwe, O luzubo lwa-Israyeli.
Ezekieli mbwaakasinsima naakamvwa impuwo yabuwe bwa-Jerusalemu
21 #
Is 1:31; 2 Bam 25:3-10; Jer 39:2-8; 52:4-14 #
Ezk 1:2; 24:26; 2 Bam 25:4 Lino mumwaka wakumi aibili wabuzike bwesu, mumwezi wakumi, mubuzuba bwasanu bwamumwezi, kwakandisikila umwi muntu iwakaloboka kuzwa ku-Jerusalemu, wati, Munzi wazundwa. 22#Ezk 1:3; 3:22Nkabela ciindi camangolezya, oyo mulobosi naakatalina kusika, ijanza lya-Jehova lyakali alindime, lyakajalula mulomo wangu mane oyo muntu wakasika cifumo. Mulomo wangu wakajaluka, teendakacili syataambi limbi.
23 #
Is 14:15
Lino ijwi lya-Jehova lyakandisikila, liti, 24#Jer 49:34#Ezk 34:2; 36:4; Is 51:2; Inc 7:5; Mik 3:11; Mt 3:9; Joh 8:39O mwana amuntu, bantu bakede mumatongo aamunyika ya-Israyeli balaamba kuti, Abrahamu kali muntu omwe buyo, nekubaboobo wakavuba nyika. Swebo tuli banji, ncobeni nyika ilaabwa mumaanza esu kuti twiivube. 25#Matl 9:4; Ezk 18:6; 22:6Nkaambo kako uleelede kubaambila kuti, Mbuboobu mbwaamba Mwami Jehova. Ma! Mulalya abulowa, mulatambya meso aanu kuzikozyano zyanu, mulatila bulowa! Sa mulakonzya kuvuba nyika? 26#Matl 10:2; Ezk 27:13Mulapona amapanga aanu, mulacita zisesemyo, mulasofwaazya umwi aumwi mukamweenzinyina. Sa mulakonzya kuvuba nyika? 27#Is 14:18#Ezk 39:4; Bab 6:2Mbuboobu mboelede kubaambila. Mbuboobu mbwaamba Mwami Jehova. Mbubonya mbundi muumi, ncobeni abo bali mumatongo bayoowisigwa apanga, abaabo bali musokwe njoobaaba mumeno aabanyama kuti babalye, abaabo bali mumampangala amumagombela bayoojazigwa malwazi. 28#2 Mak 36:21; Is 6:11; Jer 9:11; Ezk 36:34; 24:21; 6:2,3Njoocita kuti nyika ibe matongo aciyoosyo. Inguzu zyayo nziilikankaizizya ziyoomana, azilundu zya-Israyeli ziyoobula muntu naba omwe uuinda mulinzizyo. 29#Ezk 25:12Lino bayooziba kuti ndime Jehova ninjoocita kuti nyika ibe matongo aayoosya nkaambo kazisesemyo nzibakacita,
30 #
Ezk 38:6,15; 28:21 #
Is 29:13
Lino webo, O mwana amuntu, bantu bako balaambaula aanduwe kumbali amalambo amumilyango yamaanda, Balaamba umwi aumwi kumweenzinyina kuti, Amuboole, muswiilile makani aazwa kuli-Jehova. 31#Ezk 14:22#Ezk 20:1Lino balasika kulinduwe mbubasika bantu boonse, balakala kunembo lyako, balaswiilila majwi aako, pele kucita tabaaciti pe, Milomo yabo ilizwide luyando, pele myoyo yabo ilayanda impindu buyo. 32#Jak 1:22Mumeso aabo uli mbuli sikwiimba nyimbo zyaluyando, uujisi ijwi ibotu, uubwene kulizya kabotu kantimbwa. Balaswiilila majwi aako, pele kucita tabaaciti pe. 33Pele makani naazoozuzikizigwa, (ncobeni azoozuzikizigwa) elyo bayooziba kuti kwakali musinsimi akati kabo.
Currently Selected:
Ezekieli 33: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.