Incito 20
20
Paulo mbwaakatalika kubweeda ku-Jerusalemu
1Nokwakamana lupyopyongano, Paulo naakaita basikwiiya akukalika myoyo yabo, wakabasia wainka ku-Makedoniya. 2Aakwaandulula mu zisi ezyo akubayumya bantu amajwi manjimanji, wakanjila mucisi caba-Giriki, 3oko wakaakumana myeezi yotatwe, Nati kainke abwaato ku-Suriya, ba-Juda bakavwiyana aanguwe, nkabela wakakanza kwiinda ku-Makedoniya kukubweeda. 4Wakasindikilwa mane kusikila ku-Asiya, Sopatero wakuBereya, mwana a-Puro, aba-Aristarko a-Sekundu baku-Tesalonika, a-Gayo waku-Derbe, a-Timoteo, aba-Tukiko a-Trofimo baku-Asiya, 5Pele abo abakainkide kumbele, baakutulindila ku-Trowa, 6Swebo twakainka abwaato kuzwa ku-Filipi naakamana mazuba aamukamu uutakwe mimena, twasika kulimbabo ku-Trowa mumazuba osanwe, twaakukala oko mazuba aali musanu mwaabili.
Mbwaakabusya Utiko
7Eno kubuzuba butaanzi bwensondo, notwakabungene kukomona mukamu, Paulo wakabakambaukila, wali kukanza kwiinka bwaca. Nkabela wakakambauka mane akati kamasiku, 8Eno kwakali malambe manjimanji muŋanda yamujulu motwakali kubungene, 9Acipulo cacimboni kwali kukede mulombe uutegwa Utiko, ulafukula eŋonzi mpati. Eno Paulo mbwaakatola ciindi kukambauka, oyo mbwaakazundwa ŋonzi mpati, wakawida ansi kuzwa kuŋanda yatatu yamujulu, wakabwezwa ulifwide. 10Mpoonya Paulo wakaseluka, wawida alinguwe, wamubukata wati, Mutalili, nkaambo muuya wakwe mpuucili. 11Nkabela wakabweeda mujulu, wakomona mukamu, walya, waambaula abo ciindi cilamfu mane bwaca, ndilyonya wakainka. 12Bakakaleta kalombe ako kalapona, bakabotelwa kapati.
Mbwaakasika ku-Melito
13Pele swebo twakasolola kuya kubwaato mbotwakainka ambubo ku-Aso, nkotwakakanza kucinzya Paulo, nkaambo mbombuboobo mbwaakaamba, walo wali kuyeeya kweenda amaulu, 14Naakatuswaana ku-Aso, twakamunjizya, twakasika ku-Mitilene. 15Twakazwa oko abwaato, buce twakasika kubambene a-Kiyo, nobwakaca twakazubukila ku-Samo, alimwi nobwakaca twakasika ku-Melito. 16Nkaambo Paulo wakakanzide kwiindilila buyo baakusika ku-Efese, kuti atamuki mu-Asiya, nkaambo wakalibindide kut kwaakukonzeka, akabe mu-Jerusalemu kubuzuba bwa-Pentekoste.
Mbwaakalazya bapati bembungano yamu-Efeso
17Naakali mu-Melito wakatumina ku-Efeso, kuyooita bapati bembungano. 18Nobakasika wakabaambila kuti:
Nywebo nobeni mulizi mbokwali kubede kweenda kwangu akati kanu ciindi coonse, kuzwida kubuzuba mbwendakatalika kusika mu-Asiya, 19Ndakabelekela Mwami akulyeetezya kwamoyo woonse, amisozi, amasunko aakandisikila nkaambo kamakanze aaba-Juda. 20Nsikamusisilide akaniini kumwaambila aamweelede, ndakamwiisya mukati kabantu akunjilauka mumaanda. 21Ndakali kulungulwida ba-Juda aba-Helene kuti basandukile kuli-Leza, basyome Mwami wesu Jesu Kristo, 22Eno ndiya ku-Jerusalemu ndyaangidwe mumuuya, nkentezi zintu iziti kandisikile oko, 23pele muminzi yoonse Muuya Uusalala ulandilungulwida kuti kulindilindilide kwaangwa amapenzi, 24Kwalo nsilikataazyi neciba comwe azeezi zintu, nsiyeeyi kuti buumi bwangu ncintu pe, ndiyandisisya buyo kuti ndimanizye lweendo lwangu, amulimo oyo ngwendakapegwa ku-Mwami Jesu, kuti ndilungulule Makani Mabotu aaluzyalo lwa-Leza, 25Eno ndilizi kuti nywebo nyoonse, mwendakali kweendeenda kuya bukambauka Bwami bwaLeza, tamukabuboni limbi busyu bwangu, 26Nkaako ndalilungulula kulindinywe buzuba buno, kuti ndasalala kubulowa bwabantu boonse, 27nkaambo nsikasiside cintu pe, ndakamwaambila luyando loonse lwa-Leza, 28Amujatisye, lwanu nobeni, abutanga boonse mbuumubika Muuya Uusalala kuti mube balinguzi bambubo, mulele mbungano ya-Mwami njakaula abulowa bwakwe mwini, 29Ndilizi kuti, munsi lyakwiinka kwangu, kulanjila akati kanu baumpe babutambo, tabakoobuleka butanga, 30Alimwi akati kanu nobeni bayoobuka bantu abaamba zintu zyakulengawida kuti balikwelele basikwiiya. 31Aboobo amulinde, muyeeye kuti eno kwaba myaaka yotatwe, nkentalekede kulaya umwi umwi wanu, masiku esikati, ndilalila emisozi, 32Eno nobakwesu, ndamubika ku-Mwami, akujwi lyaluzyalo lwakwe, ilikonzya kumuyaka, akumupa lukono akati kabo boonse abasalazigwa. 33Nsikalikumbuzizye nsiliva yamuntu, niiba ngolida, naaba masani pe, 34pele nywebo nobeni mulizi kuti aya maanza ngaakabelekela kubula kwangu, akwabaabo mbotwakali abo. 35Muzintu zyoonse ndakaba citondezyo kulindinywe kuti kukoonda mulimo muleelede kugwasya abatajisi nguzu, muyeeye ijwi ndyaakaamba Mwami Jesu mwini kuti, Kupa kuli coolwe kwiinda kupegwa.
36Naakamana kwaamba abo wakafugama amazwi, wakomba abo boonse. 37Bakalilisya boonse, bawida ansingo ya-Paulo, bamumyonta, 38bakapenga kapati nkaambo kejwi ndyaakaamba lyakuti tabakabuboni limbi busyu bwakwe, Nkabela bakamusindikila kuya kubwaato.
Currently Selected:
Incito 20: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.