Incito 19
19
Basikwiiya ba-Johane
1Eno Apolo naakacili ku-Korinto, Paulo wakaandulula mucisi icitabambene alwizi, wasika ku-Efese, waakujana basikwiiya bamwi oko. 2Nkabela wakababuzya kuti, Sena mwakatambula Muuya Uusalala nomwakasyoma? Balo bakamuvuwa bakati, Totwakalina akumvwa kuti a-Muuya Uusalala mpuuli. 3Wakati, Ino ndubapatizyonzi lwanu? Bakavuwa kuti, Ndubapatizyo lwa-Johane. 4Paulo wakateeti, Ena, Johane wakabapatizya alubapatizyo lwakusanduka, wali kwaambila bantu kuti basyome kulooyo uuza munsi lyakwe, nkokuti nguwenya Jesu, 5Elyo nobakamvwa obo, bakabapatizigwa muzina lya-Mwami Jesu. 6Nkabela Paulo naakabika maanza alimbabo, Muuya Uusalala wakabaselukila bakaamba emilaka, basinsima. 7Eno abo boonse bati kabe baalumi abali kumi mubabili.
Paulo mbwaakacita mu-Efese
8Elyo wakanjila mucikombelo, wakakambauka ecamba myeezi yotatwe, ulasandulana akukombelela makani aa-Bwami bwa-Leza. 9Pele bamwi nobakaliyumya-yumya, akukaka, akusampaula nzila eyo kumbele lyabantu, wakabasia, watola basikwiiya, mazuba oonse wali kwaambaula mucikolo ca-Turano. 10Kwakacitwa obo myaaka yobile, aboobo boonse abakakede mn-Asiya bakamvwa makani aa-Mwami, ba-Juda aba-Helene, 11Eno Leza wakacita malele mapati amaanza aa-Paulo, 12kwakatolwa kubalwazi tusila utwali kuzwa amubili wakwe, nkabela zilwazi zyabo zyakapona, emyuuya iisofweede yakazwa. 13Kwalo bamwi ba-Juda abeendeenda, basikutanda basikazwa, bakalibwezela kwaamba zina lya-Mwami Jesu atala lyabaabo abakali amyuuya mibi bakati, Ndamulailila muli-Jesu ngwakambauka Paulo. 14Eno kwakali baalumi abali musanu mubabili, bana ba-Skeva, mu-Juda, mupaizi mupati, abakali kucita obo. 15Pele muuya mubi wakavuwa wakati, Jesu ndilimuzi a-Paulo ndimuzi, pele nywebo ndinywe bani ino? 16Ndilyonya mwaalumi oyo uwakanjidwe muuya mubi wakabasotokela, wakaba anguzu kwiinda boonse bobile, wabazunda, batija kuŋanda eyo, bali ezinswe eziliciso. 17Makani ayo akazibwa kulimbabo boonse abakakede mu-Efese, ba-Juda aba-Helene, Boonse bakayoowa, izina lya-Mwami Jesu lyakalemekwa. 18Abanjibanji abakasyomede bakaboola, balazumina akutondezya milimo yabo. 19Alimwi banjibanji abakali basonzi bakabungika mabbuku aabo, bakaatenta kumbele lyabo boonse. Kwakabalwa mali aabukwebo bwao, kwakajanwa kuti mbwamasiliva aali myaanda yosanwe yemyaanda. 20Mbombubo obo makani aa-Mwami mbwaakakomena akuzunda enguzu.
21Nozyakamana ezi zintu Paulo wakakanza mumoyo wakwe kuti, aakwiinda mu-Makedoniya amu-Akaya, uyooinka ku-Jerusalemu wakati, Ndaakusika oko, ndileelede kuyoobona aku-Roma. 22Nkabela wakatuma bobile babagwasyi bakwe, Timoteo a-Erasto, kuya ku-Makedoniya, walo wakacili kukede mu-Asiya kaindi.
Lupyopyongano lwamu-Efeso
23Eno kuciindi eco kwakaba lupyopyongano lupati nkaambo kenzila ya-Mwami, 24Kwakali muntu uutegwa Demetriyo, mufuzi wensiliva, uwakacita tukombelo twensiliva twa-Diana, akuvubya basimilimo mali manji. 25Wakababunganya balo, antoomwe abaabo abakali kubeleka mulimo uukozyene ayooyo wakati, Nobaalumi, mulizi kuti kumulimo oyu nkotujana buvubi bwesu. 26Alimwi mwabona akumvwa kuti Paulo ulya ulakombelezya akufutamuna bantu banjibanji, abatali baku-Efeso kulike, pele kuti kukabe amu-Asiya moonse, ulati abacitwa amaanza tabali baleza pe. 27Eno tuuli mulimo wesu walo uti zululwe, pele ecalo cikombelo camuzimo mupati Diana cilaba cintu buyo, mane awalo ugwisigwe kubulemu bwakwe, ngobakomba bamu-Asiya boonse abamunyika yoonse. 28Nobakamvwa obo, bakazula bukali, bakoompolola bakati, Diana waba-Efeso mupati, 29Ndilyonya munzi woonse wakazyula lupyopyongano, bakazuzaana amoyo omwe kuya kucibunganino, bajata Gayo a-Aristarko, baalumi baku-Makedoniya, abakasindikide Paulo. 30Elyo Paulo nati kanjile kubantu, basikwiiya tabakamuzuminide. 31Abalo bamwi bapati bamu-Asiya, beenzinyina Paulo, bakatuma kulinguwe kuyoomukumbila kuti atalibonyi mucibunganino. 32Aboobo bamwi bakoompolola cimwi, abamwi icimbi, nkaambo imbungano yakalipyopyongene, banjibanji tabakalizi ncobakali kubunganine. 33Eno bakagwisya Alesandro kubantu, aba-Juda bamutonkela kumbele. Nkabela Alesandro wakatambika janza, wati kalyaambilile kubantu. 34Pele nobakaziba kuti mu-Juda, boonse bakaba ciwi lyomwe, baloompolola mane ati kainde maola obile balati, Diana waba-Efeso mupati! 35Elyo simagwalo wamumunzi naakabaumuzya bantu wakateeti, Nobaalumi bamu-Efeso, nguni muntu uutezi kuti munzi waba-Efeso ngonguwo uubamba cikombelo ca-Diana mupati, ecikozyano icakawa kuzwa kujulu? 36Eno mbwaataka-zigwa makani aya, nywebo mweelede kuumuna, mutaciti cakufwanzya-fwanzya, 37nkaambo mwaleta baalumi aba, abatabbi muzikombelo, nobaba abasampaula muzimo wesu. 38Nkaako na ba-Demetriyo abasimilimo mbali abo banoojisi makani aamuntu, mazuba mpaali aakubeteka mulandu, ababetesi mpobali, kabazangana lwabo beni. 39Pele mwanoojisi makani amwi ngomubuzya, ayookosolwa mumbungano iielede, 40nkaambo ncobeni twati bikwe mulandu walupyopyongano lwabuzuba buno nkaambo taakwe ncolweelede pe, alimwi taakwe ncotukonzya kuvuwa akubungana oku. 41Naakamana kwaamba obo wakamwaisya mbungano.
Currently Selected:
Incito 19: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.