MATHI 3
3
Johan Baptikubouei Songlenbü
(Mk 1.1-8; Lk 3.1-18; Jn 1.19-28)
1Khübü chaloua Baptikubou Johan Jihuda yamlamanga ngekko loukei, 2“Maangpon se- peiashi, aishanga Khuthük Sangle nyangko loua. 3Isaia thuseibüei ao shanga hai laukei, kho han ki:
‘Müt cheei yamlamanga
ngekbü ngühlang,
Bunyubou lam lamleashi,
haoeibü lamnyu tangshaitham kümashi.’”
4Johanei uteibü wi neisimei lekei hoba phekhonei haoeibü shenjanga kaikei, hoba haoeibü shausiyung kho koksüng si yamkabü naodei kikei. 5Jerusalem kabü, Jihuda pendou hoba Jordan kaijembo kibü kaophei kabü mütshuong hao jungto haukei, 6hoba Jordan deia haoeneibü shabü thekuko haoei baptikukei.
7Farisibü si Sadukibü shuong juong hao jungto baptila shanga loubü hapan haoei haoen to laukei, “Kan pinyu shousi shuong, kan to aoei loulabü maangshat ka satenla shanga thungeijangeikei? 8Kaneibü the- chüh danko kan tükde maangpon sepeiakei dogo lenenashi; 9hoba kan lolo, ‘Abraham kho küneibü bou’ dogo laula tedam, aishanga ngei kan to lenda, Mühghaüei habü laang ka Abraham shanga shisi shousi longtila thükakei. 10Wou kho bunyu chungthema tenakei. Lang maibü ehekbü bunyu pendou aklabü hoba wan to jinlabü. 11Ngei maimaitham kan maangpon sepeibü tetsida che tegü deia baptikuda. Ao kü phainei louada hao kho kü to hau kibou hoba ngo haoeibü nguok sungenkula ongkei amukei. Haoei kan Soushou Saopobüa hoba wana baptikulabü. 12Haoeibü wansou hao ikmanga jungakei. Haoei haoeibü amshang maisho küpjemlabü hoba haoei haoeibü youshou bunga yoshailabü, lausikei haoei sho khoje anyetbü wana jikan aplabü.”
Jisu Baptibü
(Mk 1.9-11; Lk 3.21-22)
13Kheijinei Jisu Galil ka Jordan to Johan jungto hao la baptitila shanga loukei. 14Lausikei Johanei hai lauko hao shingekla haujembei, “Ngo aeiko nyi baptikujan. No bouje kü jungto louda si?” 15Jisuei hao to jongaikei, “Kü la tou shanga sakkuashi, aieilausi ho tegübü lama Mühghaüei mangsühbü pendou haüthüktilabü kho sen shanga janbü ki.” Kheijinei Johanei hao la sakkukei.
16Hobaje Jisu ladang baptikei, dei ka tongde longkei; kheijinei hao la khuthük ipbukei, hoba haoei Mühghaüeibü Soushou duk- utuk tegü hao thükto louyenko hapbei; 17hoba ngüh cheei khuthük ka lenkei, “Ho ngei maanghaibü ngeibü jayangshou ki.”
Currently Selected:
MATHI 3: CHANGBSI
Highlight
Share
Copy
Want to have your highlights saved across all your devices? Sign up or sign in
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.