Hpiˇliˇpiˆ li‸ 2
2
Yeˍsuˆ lehˬ awˬ ceˬ hpeh‸ la leh, awˬ hkʼaw‸ nawˉ Jawˇmawˇ hpeh‸ la ve
1Hkʼe te leh, Hkri‸ awˬ hkʼaw lo awˬ gʼaˇ gʼa ve teˇ ceuˬ maˇ kʼoˆ, ha‸ pehnˇ ve awˬ hkʼaˇ suh kʼai ve teˇ ceuˬ maˇ kʼoˆ, Awˬ ha hpu awˬ hkʼaw lo awˬ chawˇ te ve teˇ ceuˬ maˇ kʼoˆ, shu hta‸ dawˇ nyi leh ha kʼaˉ puiˉ ve teˇ ceuˬ maˇ kʼoˆ, chi teˇ hpaˍ nawˬ hui awˬ hkʼaw lo cawˬ ve kʼo, 2ngaˬ ha lehˬ tuˬ ve biˇ la tuˬ chi hkʼe te-o. Nawˬ hui nyi ma teˇ shiˍ tiˉ, ha‸ da‸ pehnˇ da‸ ve teˇ ceuˬ tiˉ leh, nyi ma dawˇ hkʼaˇ taˍ hkʼaˇ teˇ hkʼaˇ tiˉ cawˬ piˇ-oˆ. 3Hkʼaˬ ve teˇ ceuˬ htawˇ maˇ kʼoˆ, tawˇ gʼawˬ da‸ leh nyi ma uiˍ ve awˬ hkʼaw lo taˇ te. Ya‸ hkʼaˇ, nyi ma nuˇ nehˬ ve awˬ hkʼaw lo, teˇ gʼaˇ leh teˇ gʼaˇ a shu yawˇ awˬ to a‸ kehˉ shu hta‸ taˍ uiˍ taˍ mvuh piˇ-oˆ. 4A shu yawˇ awˬ to hta‸ caˉ da‸ ve awˬ lawn teˇ hpaˍ hta‸ ceh tiˉ taˇ dawˇ nyi. Ya‸ hkʼaˇ, shu hta‸ caˉ da‸ ve awˬ lawn teˇ hpaˍ hta‸ htawˇ dawˇ nyi-o. 5Yeˍsuˆ Hkri‸ nyi ma taˍ ve hkʼe, nawˬ hui htawˇ taˍ-o‸.
6Yawˇ lehˬ Gʼuiˬsha ve awˬ ho‸ awˬ han awˬ hkʼaw lo chehˇ ve htawˇ,
Gʼuiˬsha hkʼa shuˍ shuˍ hpeh‸ chehˇ ve teˇ ceuˬ hta‸ gʼaˇ hte‸ vawˆ taˍ cawˇ ve yoˬ teh‸ yawˇ maˇ dawˇ.
7Ya‸ hkʼaˇ, yawˇ ve awˬ me‸ awˬ hponˇ hta‸ kʼehˆ teh taˉ leh,
awˬ ceˬ ve awˬ ho‸ awˬ han hta‸
deh leh, chaw yaˇ hkʼa shuˍ shuˍ hpeh‸ la ve yoˬ.
8Chi hkʼoˆ ka‸, yawˇ chaw yaˇ hpeh‸ tehˬ ve hta‸ shu gʼa mawˬ ve yoˬ.
Yawˇ awˬ to hta‸ yawˇ taˍ nehˬ leh, suh htaˇ hkʼa gaˬ na yuˬ ve yoˬ. Suh ve oˇ ve lehˬ, la‸ ka hkʼoˆ lo hkanˍ suh ve teˇ ceuˬ yoˬ.
9Hkʼe te leh, Gʼuiˬsha lehˬ yawˇ hta‸ hkʼa peu-eˬ awˬ hkʼoˆ hta‸ yuˬ uiˍ yuˬ mvuh piˇ leh,
awˬ meh hkʼa peu-eˬ a‸ kehˉ uiˍ jaˇ da‸ jaˇ ve awˬ meh yawˇ hta‸ piˇ taˍ ve yoˬ.
10Awˬ lawn kʼo, mvuhˇ naw ma hkʼoˆ chehˇ ve maˇ kʼoˆ,
miˬguiˬ hkʼoˆ chehˇ ve maˇ kʼoˆ, miˬguiˬ awˬ hawˉ lo chehˇ ve maˇ kʼoˆ, hkʼa chehˇ ve hkʼa peu-eˬ
Yeˍsuˆ ve awˬ meh awˬ hawˉ lo hkui tcuhˉ gʼa teh tuˬ yoˬ.
11Chi hkʼoˆ ka‸, Awˬ pa Gʼuiˬsha awˬ me‸ awˬ hponˇ gʼa tuˬ
Yeˍsuˆ Hkri‸ lehˬ Jawˇmawˇ hpeh‸ ve yoˬ teh‸, maw‸ kʼaw teˇ maˬ le le shaˉ hkiˆ gʼa hkanˍ tuˬ yoˬ.
Miˬguiˬ hkʼoˆ lo awˬ gʼeuˆ ba chehˇ ve
12Hkʼe te leh, ngaˬ ha‸ ve chaw teˇ hpaˍ-oˬ, nawˬ hui hkʼaˬ htaˆ ka‸ ngaˬ ve hkawˇ hta‸ na yuˬ ve hkʼe, ngaˬ nawˬ hui geh chehˇ ve teˇ yanˇ ceh tiˉ maˇ heˆ, leuˉ leh chi beu‸ ngaˬ nawˬ hui geh maˇ chehˇ ve awˬ yanˇ awˬ hkʼaw lo htawˇ, nawˬ hui a shu yawˇ awˬ to htaiˍ hkʼaw‸ ve hta‸ gʼa tuˬ, kawˆ ve cheˇ ve awˬ hkʼaw lo gʼaˇ hte‸ te-o. 13Awˬ lawn kʼo, Gʼuiˬsha nyi ma cawˇ ve hta‸ nawˬ hui te gaˇ ve nyi ma cawˬ tuˬ leh te gʼa tuˬ, nawˬ hui awˬ hkʼaw lo yawˇ te chehˇ ve yoˬ.
14Nawˬ hui hkʼa te ve hkʼa peu-eˬ awˬ hkʼaw lo, hkʼanˇ ve leh tawˇ kʼaw‸ shaˬ ve teˇ ceuˬ taˇ te. 15Oˇ hkʼe maˇ te ve kʼo, nawˬ hui venˇbaˆ taˍ kuiˬ maˇ cawˬ leh, shu hta‸ maˇ ya‸ puiˉ ve chaw hpeh‸ tuˬ yoˬ. Nyi ma kʼaw‸ ve leh nyi ma hpfuhˆ puiˉ ve chaw chi teˇ co awˬ hkʼaw lo, nawˬ hui lehˬ ya‸ kuiˬ maˇ cawˬ ve, Gʼuiˬ sha ve awˬ yaˇ awˬ duˬ hpeh‸ tuˬ yoˬ. Co ha te‸ piˇ lawˬ ve tawˇ hkawˇ hta‸ nawˬ hui vawˆ taˍ leh, awˬ gʼeuˆ ba ve hkʼe miˬguiˬ hkʼoˆ lo chaw chi teˇ co hta‸ nawˬ hui ba piˇ chehˇ ve yoˬ. 16Hkʼe te leh, Hkri‸ ve awˬ nyi teˇ nyi gaˬ kʼo, ngaˬ nyi ma uiˍ kuiˬ chi hkʼe cawˬ tuˬ yoˬ. Ngaˬ gʼuiˇ ve lehˬ, hkʼe leˇ hpeh‸ ve maˇ heˆ. Ngaˬ kanˉ te hkeu‸ ve htawˇ, hkʼe leˇ hpeh‸ ve maˇ heˆ.
17Nawˬ hui ve yonˍ ve teˇ ceuˬ lehˬ, tanˇ tuˬ hkʼe hpeh‸ ve yoˬ. Tanˇ tuˬ oˇ ve awˬ hkʼoˆ lo ngaˬ hta‸ ngeuˍ baˬ ve htawˇ ngaˬ ha lehˬ jaˇ leh, nawˬ hui hkʼa peu-eˬ geh teˇ geh ha lehˬ ve yoˬ. 18Oˇ ve hkʼa shuˍ shuˍ nawˬ hui htawˇ ha lehˬ leh, ngaˬ geh teˇ geh ha lehˬ chehˇ-oˆ.
Tiˆmoˉseˍ leh Eˇpaˍhpawˍdiˆ awˬ lawn
19Nawˬ hui awˬ lawn ngaˬ gʼa shiˍ ve teˇ yanˇ ngaˬ gʼa ha lehˬ tuˬ, maˇ maw maw Tiˆmoˉseˍ hta‸ nawˬ hui geh peu laˇ tuˬ yoˬ teh‸, Jawˇmawˇ Yeˍsuˆ awˬ hkʼaw lo ngaˬ dawˇ law taˍ ve yoˬ. 20Awˬ lawn kʼo, yawˇ hkʼa shuˍ shuˍ nyi ma taˍ ve chaw teˇ gʼaˇ ka‸ ngaˬ geh maˇ cawˬ. Yawˇ lehˬ, nawˬ hui awˬ pon da‸ ve teˇ ceuˬ hta‸ awˬ tehˬ awˬ na dawˇ nyi puiˉ ve chaw teˇ gʼaˇ hpeh‸ ve yoˬ. 21Awˬ kaˍ awˬ nu chaw hkʼa peu-eˬ lehˬ, Yeˍsuˆ Hkri‸ awˬ pon da‸ ve teˇ ceuˬ hta‸ maˇ ca leh, a shu yawˇ awˬ to awˬ pon da‸ ve teˇ ceuˬ hta‸ ceh tiˉ ca ve yoˬ. 22Ya‸ hkʼaˇ, Tiˆmoˉseˍ lehˬ awˬ liˇ awˬ hkʼaˇ hkʼaˬ ma da‸ ve hta‸ nawˬ hui shiˍ ve yoˬ. Yaˇ paˍ teˇ gʼaˇ lehˬ, awˬ pa geh teˇ geh kanˉ te ve hkʼe, ha lehˬ ve bon hkawˇ bvuhˬ kʼai tuˬ yawˇ ngaˬ geh teˇ geh kanˉ te ve yoˬ. 23Hkʼe te leh, shu ngaˬ hta‸ hkʼaˬ hkʼe te laˇ tuˬ ve hta‸ ngaˬ gʼa shiˍ ve teˇ yanˇ, teˇ cawˬ haˉ yawˇ hta‸ nawˬ hui geh peu laˇ tuˬ yoˬ teh‸ ngaˬ dawˇ law taˍ ve yoˬ. 24Maˇ maw maw ngaˬ awˬ to nawˬ hui geh laˬ tuˬ yoˬ teh‸, Jawˇmawˇ Yeˍsuˆ awˬ hkʼaw lo ngaˬ hkʼa deh‸ yonˍ taˍ ve yoˬ.
25Ngaˬ ve awˬ viˉ awˬ nyi Eˇpaˍhpawˍdiˆ hta‸ nawˬ hui geh kʼaw‸ la tcuh cawˇ ve yoˬ teh‸ ngaˬ dawˇ taˍ ve yoˬ. Yawˇ lehˬ, ngaˬ geh teˇ geh kanˉ te leh ngaˬ geh teˇ geh bon hpawˇ ve ma‸ yaˇ hpeh‸ ve yoˬ. Nawˬ hui ve tcuh yaˇ ka‸ hpeh‸ leh, ngaˬ loˍ ve teˇ hpaˍ hta‸ ga laˇ shehˍ hpaˇ ka‸ hpeh‸ ve yoˬ. 26Yawˇ nawˬ hui hkʼa peu-eˬ hta‸ nyi ma haˍ jaˇ leh, yawˇ naˬ ve awˬ lawn nawˬ hui gʼa kaˇ ve pa taw, yawˇ maˇ maˇ dawˇ haˍ jaˇ ve yoˬ. Chi hta‸ pa taw, ngaˬ yawˇ hta‸ nawˬ hui geh kʼaw‸ la tcuh ve yoˬ. 27Suh paˇ neˇ htaˇ hkʼa gaˬ yawˇ naˬ jaˇ tehˬ ve yoˬ. Ya‸ hkʼaˇ, Gʼuiˬsha yawˇ hta‸ ha kʼaˉ ve yoˬ. Yawˇ hta‸ ceh tiˉ ha kʼaˉ ve maˇ heˆ. Ngaˬ dawˇ haˍ chehˇ ve awˬ hkʼoˆ leuˉ leh maˇ gʼa dawˇ haˍ tuˬ, ngaˬ hta‸ htawˇ Gʼuiˬsha ha kʼaˉ laˇ ve yoˬ. 28Hkʼe te leh, nawˬ hui yawˇ hta‸ gʼa mawˬ ve teˇ yanˇ nawˬ hui gʼa ha lehˬ tuˬ maˇ kʼoˆ, ngaˬ dawˇ haˍ ve a ciˉ hkehnˇ la tuˬ maˇ kʼoˆ, ngaˬ yawˇ hta‸ nawˬ hui geh haˆ haˆ kʼaw‸ la tcuh ve yoˬ. 29Jawˇmawˇ Yeˍsuˆ hta‸ pa taw, ha lehˬ ve hkʼa biˇ cawˬ ve awˬ hkʼaw lo yawˇ hta‸ ha‸ yuˬ-o‸. Chi hkʼe ve chaw teˇ hpaˍ hta‸ yawˆ yawˆ yan yan te-o. 30Awˬ lawn kʼo, nawˬ hui ngaˬ hta‸ ga laˇ ve awˬ hkʼaw lo loˍ ve cuˆ ve teˇ hpaˍ hta‸ te biˇ la tuˬ awˬ pon, yawˇ ve a sha‸ tanˇ leh, Hkri‸ ve kanˉ hta‸ te ve pa taw, yawˇ aˬ laˬ hkʼe suh ve yoˬ.
Currently Selected:
Hpiˇliˇpiˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.