Tawˆ kʼai ve li‸ 40
40
Bon yehˬ te leh chiˇ a‸ ve
1Oˇ ve hkʼaw‸ nawˉ, Gʼuiˬsha Moˉseˍ hta‸ chi hkʼe kʼoˆ piˇ ve yoˬ. 2Awˉ lawˉ peuˇ ve teˇ ha pa, awˉ lawˉ peuˇ ve teˇ nyi htaˇ, nawˬ lehˬ aˉ po kʼo bon yehˬ hta‸ gʼa te ve yoˬ. 3Awˬliˇtawˇhkawˇ teˇ chi hkawˇ keu taˍ ve ka ti‸ shaˉ caˆ ta kʼoˍ hta‸ nawˬ oˇ kaˬ lo gʼa keu taˍ leh hpa hkʼa deh‸ gʼa ko taˍ ve yoˬ. 4Hpui lawˇ hta‸ htawˇ yuˬ laˬ leh, oˇ kaˬ gʼa keu taˍ ve yoˬ. Oˇ ve hkʼaw‸ nawˉ, aˬ miˍ kawˆ faiˇ hta‸ htawˇ yuˬ laˬ leh, aˬ miˍ gʼa tuˉ taˍ ve yoˬ. 5Sha hawnˉ tuˉ tanˇ kuiˬ hta‸ ka ti‸ shaˉ caˆ ta kʼoˍ gʼuˇ suhˍ gʼa teh taˍ leh, aˉ po kʼo bon yehˬ yehˬmiˉhpe‸ lo hpa gʼa ko taˍ ve yoˬ. 6To nuˇ to shaˆ tuˉ tanˇ kuiˬ hta‸ aˉ po kʼo bon yehˬ gʼuˇ suhˍ lo gʼa teh taˍ ve yoˬ. 7Hkehˇ pe le hkʼaw iˉ kaˆ hkʼa biˇ keu leh, bon yehˬ leh tuˉ tanˇ kuiˬ awˬ kaˍ lo gʼa teh taˍ ve yoˬ. 8Aˉ po kʼo bon yehˬ hta‸ vanˇ gʼa ko leh, taˍ meu‸ hpe‸ hta‸ hpa gʼa ko taˍ ve yoˬ.
9Naˍ manˇ pfuhˍ piˇ tuˬ ve naˍ manˇ hta‸ yuˬ leh aˉ po kʼo bon yehˬ leh oˇ ve hkʼaw hkʼa cawˬ ve mawˇ hkʼa peu-eˬ hta‸ gʼa pfuhˍ piˇ ve yoˬ. Oˇ hkʼe te ve kʼo, awˬ ceuˬ oˇ ve teˇ hpaˍ da‸ kehˬ la tuˬ yoˬ. 10Oˇ ve hkʼaw‸ nawˉ, tuˉ tanˇ kuiˬ leh oˇ ve hta‸ caˉ da‸ ve awˬ hkʼeun hkʼa peu-eˬ hta‸ nawˬ naˍ manˇ gʼa pfuhˍ piˇ ve yoˬ. Oˇ hkʼe te ve kʼo, awˬ ceuˬ oˇ ve teˇ hpaˍ awˬ tehˬ awˬ na da‸ kehˬ la tuˬ yoˬ 11Hkehˇ taˍ kuiˬ leh hkehˇ pe le hta‸ htawˇ, nawˬ oˇ hkʼe gʼa te piˇ ve yoˬ.
12Aˍronˍ leh yawˇ ve yaˇ teˇ hpaˍ hta‸ nawˬ aˉ po kʼo bon yehˬ yehˬmiˉhpe‸ lo shiˍ laˬ leh, yawˇ hui hta‸ iˉ kaˆ gʼa tsuhˇ piˇ ve yoˬ. 13Aˍronˍ lehˬ, ngaˬ ve paw hkuˇ hpeh‸ la tuˬ, yawˇ hta‸ da‸ kehˬ ve veu‸ kʼaˇ feuˉ piˇ leh naˍ manˇ pfuhˍ piˇ-oˆ. Nawˬ yawˇ hta‸ chi hkʼe gʼa te chiˇ a‸ ve yoˬ. 14Yawˇ ve yaˇ teˇ hpaˍ hta‸ htawˇ shiˍ laˬ leh, aˉ po‸ deh piˇ-oˆ. 15Yawˇ hui htawˇ ngaˬ ve paw hkuˇ hpeh‸ la tuˬ, yawˇ hui ve awˬ pa hta‸ te piˇ ve hkʼe, yawˇ hui hta‸ htawˇ naˍ manˇ pfuhˍ piˇ-oˆ. Oˇ hkʼe te ve kʼo, awˬ hkʼaw‸ nawˉ teˇ co peuˬ teˇ co yawˇ hui ngaˬ ve paw hkuˇ hpeh‸ tuˬ yoˬ, teh‸ Moˉseˍ hta‸ kʼoˆ piˇ ve yoˬ.
16Gʼuiˬsha kʼoˆ piˇ taˍve hkʼa peu-eˬ hta‸ Moˉseˍ na yuˬ leh te ve yoˬ. 17Yawˇ hui Eˇjiˇtu‸ mvuhˇmiˬ hkʼaw tawˆ la peuˬ hkʼaw‸ nawˉ, nyiˇ hkʼaw‸ teˇ hkʼaw‸ awˉ lawˉ peuˇ ve teˇ ha pa awˉ lawˉ peuˇ ve teˇ nyi htaˇ, aˉ po kʼo bon yehˬ hta‸ tanˬ te ve yoˬ. 18Moˉseˍ lehˬ, la‸ kawˬ teˇ hpaˍ, suhˆ baˉ teˇ hpaˍ, awˬ hkaˆ teˇ hpaˍ, leh yehˬ hkuiˉ daw teˇ hpaˍ hta‸ a shu yawˇ ve chehˇ kuiˬ lo hkʼa deh‸ keu taˍ ve yoˬ. 19Aˉ po kʼo bon yehˬ awˬ hkʼoˆ lo, Gʼuiˬsha kʼoˆ piˇ taˍ ve hkʼe hkʼa deh‸ beh taˍ ve yoˬ. 20Awˬliˇtawˇhkawˇ bvuh‸ taˍ ve haˉ pui baˉ nyiˇ maˬ hta‸ ta kʼoˍ hkʼaw keu leh, suhˆ taˬ teˇ hpaˍ hta‸ htawˇ hkʼa deh‸ shi keu taˍ ve yoˬ. Peuˬ hkʼaw‸ nawˉ, ta kʼoˍ hta‸ hoˆ taˍ ve yoˬ. 21Ta kʼoˍ hta‸ aˉ po kʼo bon yehˬ hkʼaw keu taˍ leh, Gʼuiˬsha yawˇ hta‸ kʼoˆ piˇ taˍ ve hkʼe, hpa yuˬ leh hkʼa deh‸ ko taˍ ve yoˬ.
22Hpui lawˇ hta‸ aˉ po kʼo bon yehˬ awˬ na hpawˇ, ko taˍ ve hpa awˬ baˬ lo teh taˍ leh, 23Gʼuiˬsha yawˇ hta‸ kʼoˆ piˇ taˍ ve hkʼe, oˇ ve awˬ hkʼoˆ lo Gʼuiˬsha hta‸ tanˇ taˍ ve hkaoˍmonˇ teh taˍ ve yoˬ. 24Gʼuiˬsha kʼoˆ piˇ taˍ ve hkʼe, aˬ miˍ kawˆ faiˇ hta‸ yuˬ laˬ leh hpui lawˇ teˇ hkʼaˇ hteˇ lehˍ aˉ po kʼo bon yehˬ awˬ hawˉ hpawˇ teˇ tawn lo teh taˍ ve yoˬ. 25Gʼuiˬsha mehˆ gʼuˇ suhˍ kawˆ faiˇ hta‸ tuˉ teh taˍ ve yoˬ. 26Gʼuiˬsha yawˇ hta‸ kʼoˆ piˇ taˍ ve hkʼe, shi te taˍ ve tuˉ tanˇ kuiˬ hta‸ htawˇ, aˉ po kʼo bon yehˬ hkʼaw ko taˍ ve hpa awˬ gʼuˇ suhˍ lo teh taˍ ve yoˬ. 27Oˇ ve awˬ hkʼoˆ lo yawˇ sha hawnˉ tuˉ tanˇ piˇ ve yoˬ. 28Aˉ po kʼo bon yehˬ yehˬmiˉhpe‸ lo htawˇ, hpa hkʼa deh‸ ko taˍ ve yoˬ. 29Gʼuiˬsha yawˇ hta‸ kʼoˆ piˇ taˍ ve hkʼe, aˬ miˍ tuˉ tanˇ kuiˬ hta‸ htawˇ, aˉ po kʼo bon yehˬ yehˬmiˉhpe‸ lo teh taˍ leh, tanˇ kui oˇ ve awˬ hkʼoˆ lo to nuˇ to shaˆ leh caˇ tuˬ teˇ hpaˍ tuˉ tanˇ piˇ ve yoˬ. 30Hkehˇ pe le hta‸ htawˇ, aˉ po kʼo bon yehˬ leh tuˉ tanˇ kuiˬ awˬ kaˍ lo teh taˍ leh, iˉ kaˆ keu taˍ ve yoˬ. 31Gʼuiˬsha Moˉseˍ hta‸ kʼoˆ piˇ taˍ ve hkʼe, Moˉseˍ, Aˍronˍ leh yawˇ ve yaˇ teˇ hpaˍ aˉ po kʼo bon yehˬ hkʼaw lo‸-e htaˇ maˇ kʼoˆ, tuˉ tanˇ kuiˬ lo kʼai htaˇ maˇ kʼoˆ, 32iˉ kaˆ oˇ ve hta‸ yuˬ leh hkui sheh la‸ sheh tsuhˇ ve yoˬ. 33Aˉ po kʼo bon yehˬ leh tuˉ tanˇ kuiˬ hkʼa caw zuhˇ lo vanˇ ko taˍ leh, vanˇ taˍ meu‸ hpe‸ lo hpa ko taˍ ve yoˬ. Oˇ hkʼe te leh Moˉseˍ lehˬ, kanˉ hkʼa peu-eˬ hta‸ te peuˬ ve yoˬ.
Aˉ po kʼo bon yehˬ hta‸ moˬ hoˆ beh taˍ ve
34Oˇ htaˇ, aˉ po kʼo bon yehˬ hta‸ mo‸ hoˆ beh taˍ leh, Gʼuiˬsha ve awˬ me‸ awˬ hponˇ biˇ chehˇ taˍ ve yoˬ. 35Chi hta‸ pa taw, Moˉseˍ lehˬ aˉ po kʼo bon yehˬ hkʼaw lo‸-e maˇ hpeh‸ ve yoˬ. 36Iˉsaˍreˍlaˆ chaw teˇ hpaˍ lehˬ, aˉ po kʼo bon yehˬ awˬ hkʼoˆ lo moˬ tu kʼai peuˬ htaˇ heh‸, yawˇ hui awˬ gʼuˇ suhˍ kʼaw‸ caˉ kʼai ve yoˬ. 37Aˉ po kʼo bon yehˬ awˬ hkʼoˆ lo moˬ maˇ tu kʼai sheˍ ve ceh ceh, yawˇ hui chehˇ taˍ ve yoˬ. 38Iˉsaˍreˍlaˆ chaw hui awˬ gʼuˇ suhˍ kʼai chehˇ ve teˇ yanˇ, Gʼuiˬsha lehˬ mvuhˇ law‸ kʼaw htaˇ aˉ po kʼo bon yehˬ awˬ hkʼoˆ, moˬ hkʼaw chehˇ taˍ leh, mvuhˇ hpeu‸ htaˇ moˬ awˬ hkʼaw lo aˬ miˍ awˬ gʼeuˆ ba chehˇ ve hta‸ yawˇ hui gʼa mawˬ ve yoˬ.
Currently Selected:
Tawˆ kʼai ve li‸ 40: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.