Tawˆ kʼai ve li‸ 38
38
To nuˇ to shaˆ tuˉ tanˇ kuiˬ
1Yawˇ lehˬ aˍhkeˇshaˍ suhˆ yuˬ leh tuˉ tanˇ kuiˬ te ve yoˬ. Oˇ ve lehˬ, awˇ ceˍ awˇ hpawˇ hkʼa shuˍ hpeh‸ leh, zuhˬ hpawˇ 5 shaw‸, kʼehˬ hpawˇ 5 shaw‸, mvuh hpawˇ 3 shaw‸ cawˬ ve yoˬ. 2Tuˉ tanˇ kuiˬ chi awˬ hkʼoˆ, awˇ ceˍ awˇ hpawˇ lo awˬ hkaw awˇ maˬ te tcuhˉ naw‸ piˇ taˍ leh, kuiˇ oˍ taˍ ve yoˬ. 3Yawˇ lehˬ hkʼaw‸ laˉ keu kuiˬ mu‸ hkʼu, hkʼaw‸ laˉ toˆ yuˬ tuˬ hkehˇ pe le, kawˆ hkehˇ, luˉ kʼu, iˉ kaˆ keu tsuhˇ kuiˬ hkehˇ, chi ve hkʼa peu-eˬ hta‸ kuiˇ yuˬ te taˍ ve yoˬ. 4Tuˇ tanˇ kuiˬ chi awˬ ceˍ awˇ ceˍ lo kuiˇ yuˬ leh awˬ hkʼeh‸ te peuˬ hkʼaw‸ nawˉ, 5suhˆ taˬ keu taˆ hpeh‸ tuˬ kuiˇ la‸ kawˬ awˇ maˬ te tcuhˉ naw‸ piˇ taˍ ve yoˬ. 6Aˍhkeˇshaˍ suhˆ yuˬ leh keu taˆ tuˬ ve suhˆ taˬ teˇ hpaˍ te taˍ ve yoˬ. Suhˆ taˬ oˇ ve teˇ hpaˍ hta‸ kuiˇ hkʼa deh‸ oˍ taˍ ve yoˬ. 7Suhˆ taˬ chi teˇ hpaˍ hta‸ la‸ kawˬ oˇ ve teˇ hpaˍ hkʼaw shi keu taˍ ve yoˬ. Tuˉ tanˇ kuiˬ oˇ ve lehˬ, awˬ hkʼaw hpawˇ lo awˬ kʼoˍ cawˬ ve yoˬ.
8Yawˇ lehˬ aˉ po kʼo bon yehˬ yehˬmiˉhpe‸ lo kanˉ te chehˇ ve yaˇ miˇ teˇ hpaˍ ve kuiˇ mehˆ gʼeuˆ hta‸ yuˬ leh hkehˇ pe le leh hkehˇ taˍ kuiˬ te ve yoˬ.
Bon yehˬ vanˇ ko ve
9Yawˇ lehˬ bon yehˬ hta‸ ko tuˬ awˬ pon bon yehˬ awˬ hawˉ hpawˇ lo hpa 100 shaw‸ yuˬ leh ko taˍ ve yoˬ. 10Hpa oˇ ve ko tuˬ awˬ pon, kuiˇ la‸ kawˬ nyiˇ chi maˬ cawˬ ve yehˬ hkuiˉ daw nyiˇ chi maˬ duˇ ti taˍ leh, kʼuˉ kʼaweh‸ leh suhˆ taˬ teˇ hpaˍ hta‸ hpu yuˬ te taˍ ve yoˬ. 11Bon yehˬ awˬ na hpawˇ lo htawˇ oˇ ve hkʼa shuˍ 100 shaw‸ cawˬ ve hpa yuˬ ko taˍ ve yoˬ. 12Bon yehˬ awˬ hkʼaw‸ nawˉ hpawˇ lo lehˬ, 50 shaw‸ zuhˬ ve hpa yuˬ ko taˍ ve yoˬ. Oˇ kaˬ lo la‸ kawˬ teˇ chi maˬ cawˬ ve yehˬ hkuiˉ daw teˇ chi maˬ duˇ ti taˍ ve yoˬ. Kʼuˉ kʼaweh‸ leh kuiˍ taˬ teˇ hpaˍ hta‸ hpu ceh tiˉ yuˬ te taˍ ve yoˬ. 13Mvuhˇ nyi tawˆ hpawˇ lo htawˇ 50 shaw‸ cawˬ ve hpa yuˬ ko taˍ ve yoˬ. 14Yehˬ miˉ hta‸ te leh la‸ mehˍ hpawˇ lo kuiˇ la‸ kawˬ shehˆ maˬ cawˬ ve yehˬ hkuiˉ daw shehˆ maˬ duˇ ti leh, 15 shaw‸ zuhˬ ve hpa yuˬ ko taˍ ve yoˬ. 15Yehˬ miˉ hta‸ te leh la‸ sha hpawˇ teˇ ceˍ lo htawˇ, oˇ ve hkʼa shuˍ te taˍ ve yoˬ. 16Bon yehˬ hkʼa caw zuhˇ lo ko taˍ ve hpa teˇ hpaˍ lehˬ, da‸ jaˇ ve hpa deˇ deˇ hpeh‸ ve yoˬ. 17La‸ kawˬ teˇ hpaˍ hta‸ kuiˇ yuˬ te taˍ leh kʼuˉ kʼaweh‸ leh kuiˍ taˬ teˇ hpaˍ hta‸ hpu yuˬ te taˍ ve yoˬ. Yehˬ hkuiˉ daw oˇ ve teˇ hpaˍ hta‸ hpu caˆ yuˬ dawˆ nehˉ taˍ ve yoˬ. 18Taˍ meu‸ hpe‸ hta‸ lehˬ, awˬ sheuˉ laiˉ ceuˬ cawˬ leh zuhˬ hpawˇ 20 shaw‸, kʼehˬ hpawˇ 5 shaw‸ cawˬ ve nyi sha jaˇ ve hpa yuˬ ko taˍ ve yoˬ. 19Oˇ kaˬ lo kuiˇ la‸ kawˬ awˇ maˬ cawˬ ve yehˬ hkuiˉ daw 4 maˬ duˇ ti taˍ leh, kʼuˉ kʼaweh‸ teˇ hpaˍ leh suhˆ taˬ teˇ hpaˍ lehˬ, hpu yuˬ te taˍ ve yoˬ. 20Aˉ po kʼo bon yehˬ leh vanˇ ko tuˬ awˬ pon loˍ cawˇ ve juˇ hkʼa peu-eˬ hta‸ kuiˇ ceh tiˉ yuˬ te taˍ ve yoˬ.
Bon yehˬ awˬ pon yehˇ peuˬ ve mawˇ teˇ hpaˍ
21Chi lehˬ, Moˉseˍ kʼoˆ taˍ ve hkʼe paw hkuˇ Aˍronˍ ve yaˇ Iˉtaˍmaˍ awˬ hoˉ te leh, ka ti‸ shaˉ caˆ ta kʼoˍ keu taˍ ve aˉ po kʼo bon yehˬ te htaˇ, Leˍviˆ chaw hui gʼawˆ yuˬ taˍ ve caˇ lanˇ hpeh‸ ve yoˬ.
22Moˉseˍ hta‸ Gʼuiˬsha kʼoˆ piˇ taˍ ve awˬ ceuˬ hkʼa peu-eˬ hta‸ Yuˇda‸ awˬ ceuˬ awˬ hkʼaˇ, Huˇraˆ ve awˬ hawehˍ, Uˇriˆ ve yaˇ paˍ Beˍshaˍleˍlaˆ lehˬ hkʼa deh‸ na yuˬ leh te ve yoˬ. 23Yawˇ hta‸ ga piˇ chehˇ ve Danˍ awˬ ceuˬ awˬ hkʼaˇ Aˍhiˆsaˍmehˆ ve yaˇ Aˍhawˇleˍbaˆ lehˬ, la‸shaˉmaˉ puiˉ ve chaw, la‸ meuˇ puiˉ ve chaw leh awˬ sheuˉ laiˉ ceuˬ cawˬ ve gʼo‸ hkeh hta‸ yuˬ leh da‸ jaˇ ve hpa te chiˇ puiˉ ve chaw hpeh‸ ve yoˬ.
24Aˉ po kʼo bon yehˬ te tuˬ awˬ pon tanˇ laˇ taˍ ve shi hkʼa peu-eˬ 630 cawehˬ cawˬ ve yoˬ. 25Bon yehˬ te tuˬ awˬ pon tanˇ laˇ taˍ ve hpu hkʼa peu-eˬ 2,160 cawehˬ cawˬ ve yoˬ. 26A sha‸ 20 hkʼaw‸ awˬ hkʼoˆ ve chaw 603,550 gʼaˇ lehˬ awˬ hkanˉ teh taˍ ve hkʼe hkʼa deh‸ tanˇ piˇ ve yoˬ. 27La‸ kawˬ teˇ maˬ te tuˬ hpu 22 cawehˬ peuˬ ve pa taw, hpu 2,155 cawehˬ yuˬ leh aˉ po kʼo bon yehˬ awˬ pon loˍ ve la‸ kawˬ, leh vanˇ ko tuˬ loˍ ve la‸ kawˬ 100 te ve yoˬ. 28Cawˬ taˍ sheˬ ve hpu 15 cawehˬ hta‸ hpu kʼuˉ kʼaweh‸ teˇ hpaˍ leh yehˬ hkuiˉ daw hta‸ shi keu tuˬ ve hpu taˬ teˇ hpaˍ te taˍ ve yoˬ. 29Chaw oˇ ve teˇ hpaˍ tanˇ laˇ ve kuiˇ lehˬ, 1,465 cawehˬ cawˬ ve yoˬ. 30Kuiˇ oˇ ve hta‸ yuˬ leh aˉ po kʼo bon yehˬ yehˬmiˉhpe‸ lo keu tuˬ ve kuiˇ la‸ kawˬ teˇ hpaˍ, tuˉ tanˇ kuiˬ leh oˇ ve hta‸ caˉ da‸ ve awˬ hkʼeun teˇ hpaˍ hta‸ maˇ kʼoˆ, 31vanˇ ko htaˇ loˍ ve la‸ kawˬ teˇ hpaˍ, vanˇ taˍ meu‸ hpe‸ lo yehˇ tuˬ loˍ ve la‸ kawˬ teˇ hpaˍ, aˉ po kʼo bon yehˬ leh vanˇ ko htaˇ yehˇ tuˬ loˍ ve juˇ teˇ hpaˍ te ve yoˬ.
Currently Selected:
Tawˆ kʼai ve li‸ 38: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.