SIRAK 48
48
Elii
1Nɛ mɔ'ɔ nɛ Elii, witɔ̧wen oi nú Sɔ̧ kura hee wee ga, ɓɛɛ wen kɔ̧-a̧ dɔ́ wi dɔɔ hee kan-wee ga;
2A̧ daka kaba pi zu wa, ɓɛɛ ha̧tɛ kɔ̧-a̧ ha̧ Gasa Wan de ha̧ wa mɛ pii ɗɔŋ sɛgbɛrɛɛ.
3Tɛ wen ko Gasa Wan, a dora koro, ɓɛɛ a̧ siŋ piikoro war taar pii mbɔɗɔnu.
4Ho Elii, oe gee gasi nɛ mɛ kpaa tɛ dea o mɔɔkifi wa!
Wi nɛ tɛ duk tɛ‘e wi nyɛma ŋmaa in mɛ̀ɛ̀, nɛ́ o?
5Tɛ wen mɛ nú Wan-mɛ-ngɔn, mɛ tuna so fio, ɓɛɛ mɛ gbo a̧ yinɛ ye ko o fio.
6Mɛ dea ha o wannu mɛ tik, ɓɛɛ mɛ ir o gasa bii nɛ zu zɛ́ɛ́ kɔ-wa si tɛ fio.
7Zu kaya Sinai, mɛ zia so tɔ̧ɔ̧-wen ko Sɔ̧ nɛ ŋgai a zu mɛ,
zu kaya Horɛb mɛ zia gɔna ŋga kita kɔ̧-A̧ a zu mɛ.
8Mɛ sɔ̧ so nɔ̧ zu o wannu wen gɔna kita, in zu o witɔ̧wen oi nú Sɔ̧ wen yaa oi mɛ.
9Mɛ́, nɛ harabúk-wee baa so yaknɛ́ ɓɛlɛm, zu keeke nɛ o nyaŋa-wee gbur’ɛ;
10Nɛti ha̧ nyimsea mɛ hɔ, yɔramɔ tɔ̧ɔ̧‘e nɛ mɛ a tɛ pii ɗoŋ mɛ́ ga̧ see Gasa Wan,
mɛ́ zik see-dáà si tɛ bem, in mɛ mɔi̧ o pɛrnam ko Jakɔb pii nɛ ɗɔŋ.
11O wi nɛ tɛ zɔk mɛ́, in o wan nɛ tɛ fe zaŋ kɔ̧ɔ̧mɔ ko Sɔ̧, a yá nɛ desee,
wen ɛɛ mbɛt, ɛɛ tɛ ya kpasá nɛ mbetɛ.
Elizee
12Ŋgimbi nɛ harabúk ɓoɓora Elii, Elizéé duna nɛ ɔmi kɔ̧-a̧.
Tɛ dukaa kɔ̧-a zaŋnu, ŋma wannu kpɔk nɛ pii kii tɛ a̧ bo na; ŋma bii kpa ŋgai zu a na.
13Ŋma mɔ nɛ gana so a bona; kóó, zaŋ ɔɔ ya-fio mbɛt, a̧ ɓɔna kana nɛ witɔ̧wen oi nú Sɔ̧
14Tɛ duka-kpasa kɔ̧-a̧, a̧ dea o mɔɔkifi; ɗoŋ fio mbɛt, a̧ duka de nɛ o mɔɔ-gɔn-ɗɛɗɛ-wi.
15Zu mɔ‘i lɛŋ, dukbii kpai see na; wa e o ɗaŋmɔ kɔ-wa duk na, hɔ nɛ́nɛ́ tɛ ŋgimbi
nɛ wa kaia nɛ wa yaknɛ́ nɛ bara si gɔni nu, pɛsi nɛ wa sót sót dam zaŋnu lɛŋ.
Nɛ́ be oi bii tikiɗi a ɓɔna so, in wan kpɔk sɛn nutua ko David ɓɛɛ.
16O ŋma mgbara wa déè mɔ nɛ dee tɛ-Sɔ̧, ɓɛɛ o ŋma tɛ̀ɛ̀ dɔk kɔ‘i nɛ ɗaŋmɔ siti.
Ezekias in Izaii
17Ezekias mboo garo zik nɛ gasa ye kɔ‘i, ɓɛɛ ba yi si kɔ̧ a̧.
A ɗɔia zaŋ ta nɛ boi, ɓɛɛ a̧ de o gɔnayi sɛnɛ.
18Tɛ ŋgimbi wan kɔ̧-a̧‘i, Senakerib baa zu nɛ ŋgɔn, ɓɛɛ tom gasa wibiro Rabsakɛs,
nɛ nin-wi, mɛ nɛ́ɛ̀ tik Siɔn nɛ biro; a̧ ŋmaŋ nɛ tɛ-a kii nɛ wen.
19Hegɔ, sɛn Jerusalɛm see-wa in er-wa naká, ɓɛɛ wa zɔk ŋga bɔnɛ,
hee okóò nɛ zaŋ nyim mɛ ko ga.
20Wa kɔfa Gasa Wan, Yaa-de-ko, nyɛi nɛ er si tɛ A̧,
ɓɛɛ ahai Sa̧a̧-Wi kpɛk kɔfamɔ kɔ-wa nɛ yiwese mɛ.
A̧ gboo wa yinɛ, nɛ ɗoŋ er Isaii.
21A̧ tika gbagari ko o be Asirii nɛ biro, ɓɛɛ betom kɔ̧-a̧ kum wa gbuduk,
22wen Ezekias dee so mɔ nɛ dee tɛ Gasa Wan; a̧ ee see-a lɛŋ tɛ yuwar ko dáà kɔ̧-a̧ David;
nɛ́ witɔ̧wen oi nú-Sɔ̧ Isaii, nɛ dúk gasawi in kpasawi tɛ hɔɔzu kɔ‘i, duka mɛ usi so ha̧ a̧.
23Tɛ ŋgimbi kɔ̧-a̧, wese sii ɗoŋ nɛ kɔrzu wen ha̧ duká-kpasá ko wannu mɛ duk siti.
24Ŋgai ko ɔmi ko Sɔ̧ dee ha̧ a̧ mɛ iŋ mɔ nɛ tɛ hɔ sɔŋkur ŋgimbi,
ɓɛɛ a̧ gá̧ see o be Siɔn, nɛ ya tɛ ɗaŋsee.
25A̧ tɔ̧ɔ̧ wen zu mɔ nɛ tɛ hɔ, in o mɛ nɛ yá nɛ hu̧sa̧a̧, nɛti ha̧ wa mɛ hɔ, yak nɛnɛ sɔ̧ɔ̧i̧.
Currently Selected:
SIRAK 48: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.