O AIA-NÚ 4
4
Jerusalɛm ɗoŋ tika-a kɔ̧-a̧
1Ho! Ɛ̧ɛ̧ nɛ gba ge?
Lɔr nɛ tok so tok zar-zar
nɛ mɔ'ɔ nɛ tok ɓɔna’ɛ!
O ta ŋgeŋ tua ko Sɔ̧,
nɛ mɔ'ɔ nɛ gbina pɛsi ya nɛ ka̧ war sinɛ'ɛ!
2O bezaŋ Siɔŋ nɛ yaa so nɛ zɔm mɔ,
hee lɔr ga,
nɛ mɔ'ɔ nɛ‘i zɔk hee gee kpáná-gìì,
nɛ wi-ɓu-kpánà ɓua ga’ɛ!
3O gba-toyo iŋa ha̧a̧ bere dai nɛ o bem kɔ‘i,
ɓɛɛ ko o be-zɔŋa-dùk kɔ‘m bo hegɔ na;
wa kifa nɛ o ɗaŋ nàá-wan-bem hee ndao-ŋga-gbara ga.
4Leɓe o be-zɔɗi kora lati kɔ̧ war ger-wa kpák-kpák;
o bem ai nɛ́ nú wen nyɔŋmɔ,
ɓɛɛ wi-ha̧a̧-a̧ ha̧ wa bo na.
5O wi nɛ ya so tɛ bɔtɛ nyɔŋ nɛ de nyɔŋmɔ,
nɛ mɔ'ɔ nɛ fe nɛ ká̧ war sinɛ'ɛ!
O wan nɛ wa daia so tɛ bɔtɛ
nɛ mɔ'ɔ nɛ ɔ nɛ zu-buk-paa sinɛ'ɛ!
6Ɗaŋmɔ nɛ dukbíí kɔ‘m dea,
gana ko Sɔdɔm,
nɛ Sɔ̧ baa ɗaŋ so yinɛ hee gɔma-yí ga,
nɛ bo nɛ ŋma er-bíí a̧ foo na’ɛ.#Ku̧u̧ 19.24
7O be-wan mɛ Jerusalɛm yaa so nɛ sa̧a̧-a̧
tok nɛnɛ lak-lak,
tɛ-wa nɛ bu-a ndáká-ndáká;
wa yaa so nɛ ŋga-tɛ,
nɛ ŋmaŋa-a zoɗoe.
8Ɓɛɛ kinii, yí-wa tu̧u̧ tu̧u̧ ndir-ndir;
kà‘i kpa wa yuwar, wi iŋ yí-wa na.
Kànà nɛ́ ndàrá-tɛ-wa a̧ duk zu gba̧a̧,
wa ɔ̧ka̧ ɓak-ɓak hee kora gua ga.
9Fio nu gba-paa war kpɔk,
dee gan fio-kaɓa,
nɛ‘i kpa mɔɔ-nyɔŋ na,
ɓɛɛ wi duka ɔ̧k nɛnɛ kpa fe nɛnɛ mbɛt'i.
10Ŋgimbi nɛ ŋgamɔ tika nɛnɛ zu dukbíí kɔ‘m,
o nàá-wan-bem, nɛ oi kɔ̧ɔ̧ o bem kɔ‘i,
gii o bem kɔ‘i wen nyɔŋa-a.#Wee-ɗoŋ-he 28.57; Ez 5.10
11Kiitɛ nyimsea ko GASA WAN nɛ mɔ'ɔ nɛ hɔa'i;
a̧ pi̧i̧ ŋga nyimsea kɔ̧-a̧ zu bíí.
A̧ pi̧i̧ wee zu ye Siɔŋ
dɔ a̧ a nu gbuɗuk hɔ ndaa-a mɛ.
12O wannu in o bíí zu nu lɛŋ ta so'e nde,
ŋma ŋgimbi wisɛn tɛ nyɛm mɛ ye nu garo Jerusalɛm na.
13Mɔ dea hegɔ wen nɛ o wi-tɔ̧-wen oi nu Sɔ̧
in o wi-ɗafi-sɔ̧ dee ɗaŋmɔ;
wen wa gbaia tɔk tɛ o wi-de-mɔ nɛ yuwar-a
a nu nɛ see ye nɛnɛ!
14Wa yar nɛ yuwar nɛnɛ hee o wi-boma-yí ga;
tɛ-wa lɛŋ nɛ tɔk mgbɛzuɛ,
nɛ‘i beka tam laa kɔ-wa nɛ er na.
15O bíí gai nɛ mɔ a zu wa tɔ̧ nɛnɛ‘e:
«Ɛ̀nɛ̀ yú siɓi, ɛ́nɛ́ nɛ́ o wi-simbo!
Ká‘i tam tɛ-wa na!»
Kóó wa yuu so nɛ mɔ si ŋma gɔni nu,
o bíí tɛ nu'i tɛ tɔ̧‘e nde:
«Ɛɛ kɔ̧ ha̧ wa mɛ duk mgbara yɛ siti na!»
16GASA WAN nɛ tɛ-wi ndaka wa pɛsi sót-sót;
a̧ kɔ̧ zɔka wa nɛ yí-a ɓɔna.
Bíí tu̧ tɛ o wi-ɗafi-sɔ̧ ɓɔna,
bíí zɔn o sɔkawi ɓɔna mbɛt.
17War k’ɛɛ, yí-ɛɛ gbɛ̧ɛ̧ fara zɛm mɔ‘e nde,
ŋma bíí tɛ ye ɗoŋ yɛ wo, takaɗi!
Ɛɛ pɛma so mɔ ha̧ ŋma tugun bíí
nɛ nyɛm so mɛ kpasi yɛ na
mɛ tɛ̀ɛ́ kpasi yɛ wo, ɓɛɛ yí-ɛɛ ɗuk.
18Ko o wisɛn k’ɛɛ kànà nɛ́ mbaɗa naŋ yɛ,
ɛɛ kpa fara gbo si zan na;
ŋgimbi k’ɛɛ a̧ hɛɗi'i,
sɔŋkur wese k’ɛɛ nɛ mɔ'ɔ nɛ hɔɔ kaɗi'i!
19Naŋ o wi-ndak-ɛɛ ɔ haya gan bu̧i̧a̧-a̧ ko o zua,
wa ndak yɛ nɛ zu kaya nɛnɛ,
gba nɛ mbaŋtol h’ɛ́ɛ́ nɛ ŋga-gbárà.
20Wi-pɛm-ɔmi k’ɛ́ɛ́#4.20 wi-pɛm-ɔmi k’ɛ́ɛ́: texte tɔ̧a: ɔmi mɛ́ kɔ̧ zɔ̧ɔ̧ yɛ. Wi nɛ̀ GASA WAN hoka mɛ̀ nɛ́ Mɛsii. nɛ̀ dúk nɛ́ wi nɛ GASA WAN hoka,
tika lim nɛ wa gɔna.
Mɛ̀ nɛ́ a̧ a̧ ɛ́ɛ́ ee só nɛ̀ ta tɔ̧́ nɛnɛ‘e,
nɛ́ ɗɔɔ gi̧ɔ̧-tɛ-a
ɛ́ɛ́ tɛ̀ɛ́ kpa so yaa-a nɛ de-a mgbara tugun bíí.
21Ɓɛɛ kɔ-mɛ Edɔm, nɛ̀ duk hee gba de be-zɔŋa ga’ɛ,
mɛ́, nɛ̀ duk tɛ nu Us’ɛ,
mɛ̀ kpíɗí nɛ desee, mɛ̀ dé nyɛŋɛ!
Mɔ‘i tɛ tik zu mɛ mbɛt;
dɔ̧ɔ̧ tɛ gbɛ mɛ ɓɛɛ mɛ tɛ duk nɛ sɔŋgɔɗɔ.
22 Siɔŋ, simbo kɔ-mɛ kaɗa kaɗi;
GASA WAN beka e ha̧ wa ba mɛ nɛ bara si gɔni nu ɓɔna.
Nɛ̀ kɔ-mɛ, Edɔm, a̧ tɛ usi mɔɔ-oi-ɗaŋmɔ kɔ-mɛ ha̧ mɛ;
a̧ tɛ tati ɗaŋmɔ kɔ-mɛ yí bíí.
Currently Selected:
O AIA-NÚ 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.