2 WANNU 20
20
Zɛɛ in kpasa-a ko Ezɛkias
(Zɔk Es 38.1-8; 2 Kal Ny 32.24)
1Ŋma wese, zɛɛ-fio baa Ezɛkias. Nɛ́ mɔ'ɔ nɛ̀ Esaii *wi-tɔ̧-wen oi nú Sɔ̧ bem ko Amɔs tɛɛ kpa a̧ ɓɛɛ tɔ̧ ha̧ a̧: «GASA WAN'e ndé: ‹Mɛ̀ tɔ̧́ sɔŋkur wen ha̧ o bíí nutua kɔ-mɛ ŋgaɓo, wen mɛ tɛ fe; mɛ beka kpasi na.› »
2Ezɛkias zika tɛ si zaŋ ŋgeŋ, ɓɛɛ wor GASA WAN hee mɔ'ɔ ga: 3«GASA WAN, tɛ‘nɛ́'ɛ mbáŋ ɗoŋ-am wen mi nɛ̀ɛ̀ so nɔ̀ ti'nɛ́ nɛ̀ yuwar-a, nɛ̀ sa̧a̧-see; ɓɛɛ ɓɔnsɛnɛ mi de nɛ mɔ nɛ̀ de tɛ‘nɛ́.» Ezɛkias hi̧a̧ kɔ̧a̧ nyɛmna.
4Esaii tɛ gbo kɔ̧ gasa bee-gara ko Ezɛkias hɔ̧ɔ̧ na, ɓɛɛ GASA WAN tɔ̧ ha̧ a̧: 5«Mɛ̀ sí ɗoŋ tɔ̧ ha̧ Ezɛkias, wan ko dukbíí kɔ‘m'e, GASA WAN Sɔ̧ ko zɔmdáà kɔ-mɛ David tɔ̧ɔ̧ ndé, mi zia kɔfamɔ kɔ̧-a̧, ɓɛɛ mi zɔk mi̧i̧kɔ̧a̧ kɔ̧-a̧ mbɛt. Mi tɛ kpas'a. Ɗoŋ zɛ taar ɓɛɛ a̧ tɛ daŋ si kɔ̧ Tua ko GASA WAN mɛ. 6Mi aa mbe pɛ ɓu-zua-mɔɔrɔ zu duka-a kɔ̧-a̧. Mi tɛ gbo a̧ in o wi ye’ɛ er wannu Asirii; mi tɛ pɛm ye’ɛ, wen nin-am in wi-de-tom kɔ‘m David.»
7Esaii tɔ̧a̧: «Ɛ̀nɛ̀ bá makala waya-te-mbɔra tɛnɛ.» Wa baa tɛnɛ sɔ̧ nɛ̀ fara nɛ̀ nyim'i, ɓɛɛ tɛ wannu hai. 8Ezɛkias tɔ̧ɔ̧ ha̧ Esaii: «Mɔ nɛ̀ usi'e, GASA WAN tɛ kpas'am, ɓɛɛ ɗoŋ zɛ taar, mi tɛ daŋ si kɔ̧ Tua ko GASA WAN nɛ́ ge?»
9Esaii kifa nú: «Mɔ nɛ̀ tɛ usi'e, GASA WAN tɛ de mɔ nɛ̀ ha̧a̧ nú sɛnɛ‘i nɛ́ mɔ'ɔ: mɛ́ kɔ̧ɔ̧ ha̧ gi̧ɔ̧-mɔ mɛ dur tɛ naŋ ɓu náà, kóó mɛ de dɔ̧-a̧ tɛ naŋ ɓu nde?»
10Ezɛkias kifa nú: «Zi̧a̧-a̧ ko gi̧ɔ̧-mɔ tɛ naŋ ɓu bo nɛ ŋgayamɔ na; ɓɛɛ mi kɔ̧ɔ̧ ha̧ a̧ mɛ de nɛ dɔ̧-a̧ tɛ naŋ ɓu.»
11*Wi-tɔ̧-wen oi nú Sɔ̧ Esaii kɔfa GASA WAN, ɓɛɛ a̧ de ha̧ gi̧ɔ̧ mɛ de dɔ̧-a̧ tɛ naŋ ɓu, zu fara-daŋ-nɛnɛ si nú zala ko Ahaz.
O betom nɛ̀ tɛa nɛ̀ Babilɔŋ
(Zɔk Es 39.1-8)
12Ŋgimbi'i, Mɛrodak-Baladaŋ, bem ko Baladaŋ wannu Babilɔŋ toma kalata ha̧ Ezɛkias in o ŋma ha̧a̧mɔ, wen a̧ zia so'e, tɛ wannu Ezɛkias hai na. 13Ezɛkias kpaa desee nyɛmna tɛ hɔa-a ko o betom, ɓɛɛ a̧ mgbɔ wa usi nɛ̀ o fara-a-mɔ kɔ̧-a̧ lɛŋ: bu-mbɔi, lɔr, yí-nyama, nɔ̧́-nyama, o boi-biro ká bá nɛ̀ o mɔ lɛŋ nɛ̀ a̧a̧ hi̧i̧. Ŋma mɔ nɛ̀ Ezɛkias usi ha̧ wa tɛ kɔ‘i na, bo na. 14*Wi-tɔ̧-wen oi nú Sɔ̧ Esaii nɛ̀ɛ̀ kpa wannu Ezɛkias, ɓɛɛ ak a̧: «O wi nɔ'ɔ tɛɛ nɛ̀ déè? Wa tɔ̧ɔ̧ h’ɛ́nɛ́ hee ge?» Ezɛkias kifa nú: «Wa tɛa nɛ̀ nyɛi̧a-a nɛ̀ Babilɔŋ mɛ.»
15Esaii aka mɔ woyo: «Nɛ́ ge a̧ wa zɔka kɔ̧ tua k’ɛ́nɛ́ ge?»
Ezɛkias kifa nú: «Mi usa mɔ nɛ̀ a̧a̧ kɔ̧ tua kɔ‘m lɛŋ ha̧ wa; ŋma mɔ mgbara mbɔi kɔ‘m n'am usi ha̧ wa na, bo na.»
16Ɓɛɛ Esaii tɔ̧ ha̧ Ezɛkias: «Ɛ̀nɛ̀ zíí wen ko GASA WAN: 17‹Ŋma wese, wa tɛ kai mɔ nɛ̀ a̧a̧ kɔ̧ tua k’ɛnɛ lɛŋ in mɔ nɛ̀ o dáà k’ɛnɛ mɔi̧a so e hɔ sɔsɔɔ si Babilɔŋ; ŋma mɔ beka ɓɔn na. #2 Wan 24.13; 2 Kal Ny 36.10 18Wa tɛ kai o bem k’ɛnɛ n’ɛnɛ koa yaknɛ. Wa tɛ ya nɛ́ o kpàná kɔ̧ tua ko wannu Babilɔŋ.› » #2 Wan 24.14-15; Dan 1.1-7
19Ezɛkias tɔ̧ɔ̧ ha̧ Esaii: «Wen ko GASA WAN nɛ̀ mɛ tɔ̧a̧‘i ɔ dee,› wen a̧ taa nɛ̀ kɔ̧ see-aa'e, ŋgimbi nɛ‘i a̧a̧ tɛ wan, nù tɛ duk tɛ ga̧a̧mɔ.
Kaɗa wan ko Ezɛkias
20«Oi o tom ko Ezɛkias, o ŋgaŋamɔ kɔ̧-a̧, mɔ n'aa dea, gɔna kɔ̧-yì n'aa gɔna in war-yì n'aa ɗafa ba nɛ̀ yì si saaye yɔra zaŋ Kalata Nyɛrɛ ko o wannu Juda. 21Ezɛkias fea si ɗoŋ o dáà kɔ‘i, ɓɛɛ bem kɔ̧-a̧ Manase ɔ wan oi-aa.
Currently Selected:
2 WANNU 20: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.