2 KALATA NYƐRƐ 22
22
Ahazia, wannu Juda
(Zɔk 2 Wan 8.25-29; 9.27-29)
1O wi Jerusalɛm dee wan ha̧ Ahazia sɔŋkur bem ko Yoram oi-aa, wen o gíí wi-biro nɛ̀ tɛ̀ɛ̀ so in o be Arab yee so kɔ̧ gbagari ko o be Juda, ɓɛɛ gbɛ o zɔmwi kɔ̧-a̧ lɛŋ. Mɛ̀ nɛ́ hegɔ, Ahazia bem ko Yoram wannu Juda ɔɔ wan. 2Ahazia a̧a̧ so nɛ̀ pɛ ɓu-yiitoo-zua-yiitoo ŋgimbi n'aa ɔɔ nɛ̀ wan, ɓɛɛ a̧ ɔ wan sɛn Jerusalɛm pɛ kpɔk. Nin nàà kɔ̧-a̧ nɛ́ Atalii boko-bem ko Ɔmri. 3Ahazia mbɛt zɔka nɛ́ ɗoŋ mɔ ko o bíí nutua ko Akab, wen nàà kɔ̧-a̧ duka so nɛ́ wi tɔ̧ ɗaŋ mbɔrɔ ha̧ a̧. 4Hegɔ a̧ dee ɗaŋmɔ ti GASA WAN hee ko o bíí nutua ko Akab ga, wen o bezaŋ Akab yaa so nɛ́ wi-tɔ̧-mbɔrɔ kɔ̧-a̧ ɗoŋ fio ko dáà kɔ̧-a̧ wen ha̧ a̧ mɛ yɔ kaya. 5Mɛ̀ nɛ́ tɛ zia mbɔrɔ kɔ-wa a̧ a̧ yaka nɛnɛ in wannu Yoram, bem ko Akab mɛ nɛ̀ɛ́ bi Hazaɛl wannu Aram sɛn saaye Ramot nú Galad. Tɛ biro'i, o be Aram ee da̧i̧ tɛ Yoram, 6ɓɛɛ a̧ pii ɗoŋ pii Yizreɛl mɛ hɛr da̧i̧ n'aa baa yí biro sɛn Ramot. Hegɔ, Ahazia bem ko Yoram wannu Juda zira si Yizreɛl mɛ nɛ̀ɛ́ zɔk Yoram bem ko Akab nɛ̀ baa da̧i̧.
7Sɔ̧ dee ha̧ Ahazia mɛ yɔ tɛ nɛa-a kɔ̧-a̧ mɛ zɔk Yoram. Ŋgimbi n'aa hɔa, Yoram kura ɓɛɛ wa yak in ŋmaa sitɛ Jɛhu bem ko Nimsi, wi nɛ̀ GASA WAN tɛna nɔ̧́ a zu-a wen kuma o bíí nutua ko Akab. 8Jɛhu dee mɔ nyɛm nɛ̀ ɗoŋ gɔna kita ko GASA WAN zu nutua ko Akab. A̧ kpaa o be-wan Juda in o ŋma nya Ahazia, ɓɛɛ a̧ kum wa. 9A̧ toma bíí mɛ kii Ahazia; wa nɛ̀ɛ̀ kpa a̧ sɛn Samarii fara n'aa duka so hu̧si sɛnɛ; wa mgbɔɔ a̧ tɛnɛ ha̧ Jɛhu, ɓɛɛ wa gbɛ a̧. Wa guna a̧ wen wa duka so tɔ̧‘e ndé, a̧ nɛ́ ŋma bezaŋ Josafat wannu nɛ̀ kia GASA WAN nɛ̀ see kpɔk. Ŋma bíí nutua ko Ahazia nɛ̀ nyɛma so mɛ ɔ wan bo ɓɔna.
Atalii baa wan
(Zɔk 2 Wan 11.1-3)
10Ŋgimbi nɛ̀ Atalii nàà ko Ahazia zɔka'e, bem kɔ‘i fea, a̧ tɔ̧ɔ̧ ha̧ wa mɛ gbɛ o bezaŋ wannu nutua Juda lɛŋ. 11Ɓɛɛ Yoseba boko-bem ko wannu Jɔas, ŋma bem ko Ahazia mgbara o dɔka-a nɛ̀ wa kɔ̧ɔ̧ mɛ gbɛ‘i in okoo-dai-a hu̧si sɛn kɔ̧ ŋma gɔna-bɛr-tua, fara-a o gado. Hegɔ Yoseba, boko-bem ko wannu Yoram kóò ko wi-ɗafi-sɔ̧ Yoyada, boko-nya Ahazia, baa bem’ɛi yinɛ ɗɔɔ yí Atalii, ɓɛɛ a̧ kpa yuwar mɛ gbɛ a̧ na. 12Bem’ɛi duka in a̧ sɛn kɔ̧ Tua ko Sɔ̧ pɛ mɔɔrɔ-ɗoŋ-kpɔk, ká Atalii ɓɔna so tɛ wan.
Currently Selected:
2 KALATA NYƐRƐ 22: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.