TƏŊMORFANNE 48
48
Yakuɓ ẽe Efraim ne Manasse
1Fahfal ɓǝ marai ge faara nyi Yuseɓ: Pa ɓo ne syemme. So ge ne wee ah Manasse ne Efraim gwa daŋ. 2Ge faara nyi Yakuɓ: Na ɓo Yuseɓ ge ɓo wo ɓo. Yakuɓ swaa suu ah ur kaa tǝ ɗeere. 3Yakuɓ faa nyi Yuseɓ: Masǝŋ ma ne swah daŋ cuu suu ah nyi me Lus pǝ sǝr Kanaan, ẽe me, 4faa nyi me: Me ga joŋ mo byaŋ pǝlli, me ga ɓoo mo ga pelle, me ga joŋ za ɓo pǝpãare, me ga nyi sǝr mai nyi morsǝ̃ǝ ɓo ma ɓǝǝ ye yea ga lii. 5Amma wee matǝ gwa mai mo bemra sǝr Egiɓ kǝpel ka me ge ya ba, ma ɓe yo. Efraim ne Manasse a ga ciŋra ma ɓe tǝgbana Ruben ne Simon. 6Amma wee ɓo mai mo ga bem fahfal ɓǝǝ ma ɓo yo, a ga woora tǝɗii wee pa ɓǝǝ pǝ cok wee ren yaŋ ba. 7Me 'yah joŋ nai mor ɓǝ ma ɓo Rakel. Ne cok me pii soo ako wǝ jol ɓe tǝ fahlii daga Mesopotamia sǝr Kanaan, ka cok coŋ ɓo pel man nje ka dai Efrata ba. Me cii ko pǝ cok ah tǝ fahlii Efrata. (Tǝ'nahko za ɗiira ne Betlehem .) Me swaa ɓǝ wul ah pǝlli.
8Yakuɓ kwo wee Yuseɓ, so fii: Wee kẽe marai ne? 9Yuseɓ zyii zah pam faa: Wee mai Masǝŋ mo nyi me nyeeko yo. So Yakuɓ faa: Mo tǝɓ ra ge wo ɓe nyee ka me ẽe ra. 10Amma wak nǝn Yakuɓ pǝyǝk o, tam ɓe, ka kwan cok pǝsãh yao. So Yuseɓ tǝɓ ra ge wol ah gwari. Yakuɓ zwǝ ra ne zahe, so kim sol ɓǝǝ ne jolle. 11Yakuɓ faa nyi Yuseɓ: Me lǝŋ sõone me ga kwo nahnǝn ɓo ba me lǝŋ ya. So Masǝŋ soɓ me kwo wee ɓo mai mo bem laŋ ɓe ta. 12Yuseɓ nǝǝ ra gin tǝgǝǝ ɓal ahe, so kea ge sǝŋ pel ahe . 13So Yuseɓ woo wee ah gwa daŋ, gbǝ Efraim nǝjokǝsãh ah nǝfah jokǝlǝɓai Yakuɓ, gbǝ Manasse nǝjokǝlǝɓai ah nǝfah jokǝsãh ahe. 14Yakuɓ nyen jokǝsãh ah kan ge tǝ Efraim we malaŋne, amma kan jokǝlǝɓai ah tǝ Manasse, fǝǝ jol ah nai mor Manasse ye we malii. 15Yakuɓ ẽe Yuseɓ faa: Masǝŋ mai pa ɓe ra Abraham ne Isak mo syeera mor ahe, Masǝŋ mai mo syee ne me daga laŋ ɓe ŋhaa tǝ'nahko, 16pa pee ma coksǝŋ mai mo ǝ̃ǝ me wo ɓǝɓe' daŋ mo ẽe wee raiko. Ka mo ɗiira ɗii ɓe kǝsyil ɓǝǝ ne ɗii pa ɓe lii Abraham tǝkine ɗii pa ɓe Isak, mo ɓoora ge pel ka mo yeara pǝpãa wo sǝrri.
17Ne cok Yuseɓ mo kwo pah ah kan jokǝsãh ah ge tǝ Efraim, laa pǝ'nyahr a. Gbǝ jol pah ah ɓaŋ gin tǝtǝl Efraim ka kan ga tǝ Manasse. 18So Yuseɓ faa nyi pah ahe: Ka nai ya Daddǝ. Mor welii ye dǝɓ maino, mo kan jokǝsãh ɓo ge tǝl ahe. 19Amma pah ah zyii ya, so faa: Me tǝ ɓe na ɓe, me tǝ ɓe. Ako laŋ zan ah ga yea pǝpãare, a ga yea pǝyǝk ta, amma ne daŋ laŋ naa mah ah malaŋ ga kal ko ne yǝkki, morsǝ̃ǝ ah ga yea ne za pǝpãare. 20So ẽe ra com moo, faa: Za Israel ga ẽera za pǝ tǝɗii ɓiiri, a ga faara: Masǝŋ mo joŋ mo tǝgbana Efraim, na Manasse. Ne joŋ naiko Yakuɓ ɓaŋ Efraim kan dǝɓlii Manasse ne ko. 21So Yakuɓ faa nyi Yuseɓ: Me tǝ yah wun o, amma Masǝŋ yea ne we, a so jin ga sǝr pa ɓii ra ne we. 22Me nyi sǝr Sikem ɓo nyi mo, me nyi nyi wee pa ɓo ra ya, mor cok ah ye sǝr masãhe, me nyiŋ jol Amorien ne zǝǝ ne saŋ ɓe.
Currently Selected:
TƏŊMORFANNE 48: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.