TƏŊMORFANNE 45
45
Yuseɓ cuu suu ah nyi wee pamme
1Yuseɓ gak gbǝ zahzyil pel za mai mo ryaŋra ko ɓo yao. Ɓyaŋ ɓǝ faa: We nĩi za wo ɓe pǝ̃ǝ ge lalle. Koo dǝɓ vaŋno coŋ wol ah ya. So Yuseɓ cuu suu ah nyi wee pamme. 2Yuseɓ ɓyaŋ ɓǝ ne yee, Egiɓien daŋ laara, yee ah ge dai yaŋ Farao ta. 3Yuseɓ faa nyi wee pah ahe: Ame ye Yuseɓ, pa ɓe no sǝŋ ba ne? Amma wee pah ah gak zyiira ɓǝ ki ya. Mor a ɗuura gal pel ahe. 4So Yuseɓ faa nyi wee pah ahe: We tǝɓ ge wo ɓe gwari. Tǝɓra ge wol ahe. So faa nyi ra: Ame naa pa ɓii Yuseɓ mai we lee ge sǝr Egiɓ kŋ. 5Amma zǝzǝ̃ǝko we swaa ɓǝ ka, we ɓaŋ kpãh tǝ suu ɓii mor we lee me ge nyee ka ta. Masǝŋ ye pee me ge pel ɓii mor ka ǝ̃ǝ we. 6Zǝzǝ̃ǝko koŋ wǝ ɓo wo sǝr syii gwa ɓe. Coŋ syii ɓo dappe mai za mo ka pǝpǝǝ ya, koo ka lwaara fakpãhpǝǝ ya ta. 7Masǝŋ pee me ge pel ɓii mor ka we vǝr gin wo sǝr ka, ǝ̃ǝ we ɓo ne ǝ̃ǝ malii ahe. 8We tǝ, awe ye ka pee me ge nyee ya, amma Masǝŋ ye pee me. Ako ye joŋ me na pam wo Farao, me na dǝɓlii tǝ sǝr ah daŋ. Ame ye govener tǝ sǝr Egiɓ daŋ. 9We pii soo ge wo pa ɓe gwari, we faa nyi ko: Na ɓo Yuseɓ faa: Masǝŋ kan me dǝɓlii sǝr Egiɓ, mo ge wo ɓe gwari, mo nǝn ka. 10Ka mo ge kaa gwari ne me pǝ sǝr Gosen, amo ne wee ɓo tǝkine wee na ɓo, ne ŋgaɓ pǝsǝ̃ǝ ɓo ne dǝǝ tǝkine fan mai mo ne daŋ. 11Me ga wol mo gŋ mor syii koŋ coŋ ɓo dappe ba, ka amo ne za yaŋ ɓo tǝkine fan ɓo daŋ we zyak ka. 12We ẽe ɗǝ, we tǝ kwan ne nahnǝn ɓiiri, naa ma ɓe Benyaamin laŋ tǝ kwan ne nahnǝn ah ta, me ye tǝ faa ɓǝ nyi we ne zah ɓe. 13We ge kee ɓǝ yǝk ɓe sǝr Egiɓ ne mai we kwo daŋ nyi pa ɓe. We hǝǝ we ge nyee ne pa ɓe gwari. 14So gbǝ sol naa mah ah Benyaamin lee ge gŋ ne yee. Benyaamin laŋ joŋ nai ta. 15So Yuseɓ zwǝ wee pah ah daŋ ne zahe, yeyee ta. Fahfal ah jakra ɓǝ kǝsyil ki.
16Ɓǝ ah ge dai yaŋ Farao, faara: Wee pah Yuseɓ ge ɓo. Ɓǝ ah 'nyah suu Farao tǝkine za yeɓ ah daŋ. 17Faa nyi Yuseɓ: Mo faa nyi wee pa ɓo mo joŋra naiko: We woo fan ge tǝ korro ɓiiri, we ur we ge sǝr Kanaan. 18We ge woo pa ɓii ne za yaŋ ah daŋ, we ge wo ɓe ne ko, me ga nyi zah sǝr Egiɓ masãh ah nyi we, fan ki ka pee we ya. 19Mo faa nyi ra ka mo joŋra naiko: We woo muŋta dǝǝ sǝr Egiɓ ge ne ko, ka we woo wee ɓii tǝkine ŋwǝǝ ne ko, we ɓaŋ pa ɓii ge ne ko ta. 20We kwo fan mai we tǝ ga soɓ nahnǝn ɓii pǝ syee ka, mor fan sãh sǝr Egiɓ daŋ ga ciŋ fan ɓiiri.
21So wee Israel joŋra naiko. Yuseɓ woo muŋta dǝǝ nyi ra tǝgbana Farao mo faa, so nyi farel nyi ra mor fahlii ta. 22Wom mbǝro sol nyi ra vaŋno vaŋno daŋ, amma nyi vãm solai nyi Benyaamin temere sai, ne mbǝro sol gŋ dappe. 23Pee fan sãh sǝr Egiɓ nyi pah ah korro jemma, pee mǝǝ korro jemma ɓaŋ sor tǝkine farel mor fahlii gwǝǝ pah ahe. 24Nyi fahlii nyi wee pam kalra. Faa nyi ra: We bǝǝ bal wo ki tǝ fahlii ka.
25Urra gin sǝr Egiɓ, gera wo pa ɓǝǝ Yakuɓ sǝr Kanaan. 26Ge faara nyi pa ɓǝǝra: Yuseɓ wǝ ya, ako ye kaa dǝɓlii ɓo tǝ sǝr Egiɓ daŋ. Zahzyil Yakuɓ joŋ pǝyakke, mor zyii nyiŋ ɓǝ faa ɓǝǝr a. 27Keera ɓǝ mai Yuseɓ mo faa nyi ra daŋ nyi ko. So mo kwo muŋta dǝǝ mai Yuseɓ mo pee ge ka woo ko, so zahzyil pa ɓǝǝ Yakuɓ wuu gur o. 28Yakuɓ faa: Kii ɓe, na ɓe Yuseɓ wǝ ya, me ganne, ka me ge kwo ko kǝpel wul ɓe.
Currently Selected:
TƏŊMORFANNE 45: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.