TƏŊMORFANNE 33
33
Yakuɓ zyaŋ ne Esau
1Yakuɓ ɓaŋ nahnǝn kwo Esau tǝ gin ne za temere nai, so wom wee ah ge tǝ Lea ne Rakel tǝkine mǝǝ byak ah matǝ gwa kŋ. 2Woo mǝǝ byak ne wee ɓǝǝ uura pelle, so Lea ne wee ah uura ge gŋ, Rakel ne Yuseɓ uura fahfalle. 3Amma Yakuɓ ne suu ah kal pel ɓǝǝra, kea ge sǝŋ zahlǝŋ rǝŋ ka dai naa mah ah ba.
4Esau ɗuu ge zyaŋ tǝl ahe, gbǝ ko kǝkǝrak sol ah ne jolle, so zwǝ ko ne zahe, kalra ne yee gwa daŋ. 5Esau ɓaŋ nahnǝn ah kwo ŋwǝǝ ne wee faa: Za kẽe ye ne mo ŋhaa ne? Yakuɓ zyii faa: Wee mai Masǝŋ mo nyi nyi me dǝɓ yeɓ ɓo yo. 6Mǝǝ byak tǝɓra ge ne wee ɓǝǝ daŋ, keara ge sǝŋ. 7Lea ne wee ah laŋ tǝɓra ge, ge keara sǝŋ ta. Fahfal ah Rakel ge ne Yuseɓ ge keara ge sǝŋ.
8Esau fii Yakuɓ: Mo 'yah ka joŋ fẽe ne kul fan mai me zyaŋ ne ko ne? Yakuɓ zyii faa: Me pee ɓo nyi mo ka mo nyiŋ me na dǝɓ sãhe. 9Esau so faa: Fan ɓe kii me ɓe, naa ma ɓe. Mo kaa ne fan ɓo. 10Amma Yakuɓ faa: Ka nai ya. Oseni, mo kwo me na dǝɓ sãh ɓe, mo nyiŋ fan haozah wol jol ɓe. Mor me kwan zahpel ɓo tǝgbana dǝɓ moo kwan zahpel Masǝŋ, mor mo nyiŋ me ɓe. 11Oseni mo nyiŋ fan haozah wol mai me pee ɓo mo jol ɓe, mor Masǝŋ joŋ gboŋgboŋ ɓo wo ɓe pǝlli, fan ki pee me ya. Pǝǝ ko pǝlli. So Esau nyiŋ o.
12Esau faa: Na ur, na gyo. Ma ɓe me ɗah syee ga pel ɓo. 13Yakuɓ zyii zah ah faa: Dǝɓlii ɓe, mo tǝ ɓe, wee nyee ara ka pǝswah ya, me no ne gwii tǝkine dǝǝ mai wee ah mo tǝ zwah won ba. Me kal nĩi ra syee ne ne swah zah'nan vaŋno ɓe, a ga wukra. 14Oseni mo ɗah syee ge pel ɓe, me ga syee syeesyee nǝn daidai ɓal syel ŋgaɓ fan tǝkine ɓal syel wee nyeere ŋhaa me ga dai wo ɓo dǝɓlii ɓe sǝr Edom. 15Esau faa: Me ga soɓ za ɓe manyeeki ah ne mo. Yakuɓ zyii faa: Mo ga joŋ nai mor fẽene? Mo nyiŋ me na dǝɓ sãh to o kii ɓe.
16Daga com ah sǝ Esau ɓaŋ fahlii pii soo ge sǝr Edom. 17Yakuɓ kal ge cok maki ahe, ge vuu yaŋ gŋ, so gbah jul gŋ mor ŋgaɓ fan ahe. Mor ah ɗiira cok ah ne Sukot.
18Ne cok Yakuɓ mo pii soo gin Mesopotamia ge dai yaŋ Sikem sǝr Kanaan jam, so ge ɗǝr cok tǝnyiŋ matǝ gwari ne yaŋ ahe. 19Lee cok jol wee Hamor pah Sikem ne vãm solai temere. So gbah tal mbǝro ah gŋ. 20So vuu cok joŋ syiŋ gŋ, ɗii cok ah ne Masǝŋ Mo Masǝŋ Israel.
Currently Selected:
TƏŊMORFANNE 33: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.