TƏŊMORFANNE 30
30
1Rakel kwo ɓe, ka tǝ bem wee ne Yakuɓ ya. So tǝŋ joŋ tǝwon ne naa mah ahe. Faa nyi Yakuɓ: Mo nyi wee nyi me. Mo ka nai ya ɓe, me ga wuu. 2Yakuɓ ɓaŋ kpãh ne Rakel faa: Ame Masǝŋ ko me cak mo ne byaŋ ne? 3So Rakel faa nyi Yakuɓ: Mabyak ɓe Bila nyeeno. Mo kan ka mo byaŋ we nyi me ne ko. 4Rakel ɓaŋ mabyak ah Bila nyi Yakuɓ kanne. 5Bila gbǝ ɓilli, byaŋ we wor nyi Yakuɓ. 6Rakel faa: Masǝŋ joŋ pǝsãh wo ɓe ɓe, laa ɓǝ faa ɓe, nyi we nyi me. Mor ah ɗii ne Dan. 7So Bila mabyak Rakel gbǝ ɓil faɗa, byaŋ we patǝ gwa ah ne Yakuɓ. 8Rakel faa: Me ruu sal ne naa ma ɓe ne swah Masǝŋ, me nĩi sal ah ɓe ta. Ɗii wel ah ne Naftali.
9Lea kwo zye ka tǝ byaŋ yao. So ɓaŋ mabyak ah Zilpa nyi Yakuɓ. 10Zilpa mabyak Lea byaŋ we wor ne Yakuɓ. 11Lea faa: Osoko. So ɗii ne Gad. 12Zilpa mabyak Lea byaŋ we patǝ gwa ah ne Yakuɓ. 13So Lea faa: Me laa pǝ'nyah ɓe, mor mai ŋwǝǝ maki ah ga faara me lwaa ɓǝ 'nyah ɓe. Ɗii wel ah ne Asǝr.
14Comki Ruben ge lal ne cok gwahlle, ge lwaa lee kpuu ma ɗii ne mandragor pǝ 'wahe, woo ge mah ah Lea ne ko. Rakel faa nyi Lea: Mo nyi lee mandragor we ɓo me sa. 15Lea faa nyi ko: Mai mo nyiŋ wor ɓo jol ɓe kii ya, mo so tǝ kyeɓ ka woo lee mandragor we ɓe ta ne? Rakel zyii faa: Pǝsãhe. A ga swǝ ne mo ne suŋ ko zahwaa lee mandragor we ɓo.
16Yakuɓ pii soo gin 'wah ne lilli, Lea pǝ̃ǝ ge zyaŋ tǝl ah faa nyi ko: Mo ge swǝ ne me tǝ'nahko, mor me ɗǝǝ mo ɓo ne mandragor we ɓe. Yakuɓ swǝ ne ki ne suŋ ahe.
17Masǝŋ laa pǝǝ Lea, gbǝ ɓilli, byaŋ we patǝ dappe ah ne Yakuɓ. 18Lea faa: Masǝŋ soo me ɓe, mor me nyi mabyak ɓe nyi wor ɓe. Ɗii wel ah ne Isakar. 19Lea so gbǝ ɓil kpǝ, byaŋ we patǝ yea ah ne Yakuɓ. 20Lea faa: Masǝŋ nyi fan ɗǝǝ masãh ah me ɓe. Zǝzǝ̃ǝ wor ɓe ga yii me, mor me bem wee nyi ko yea. Ɗii ko ne Zebulon. 21Fahfal ah so byaŋ mǝlaŋ winni, ɗii ne Dina.
22So Masǝŋ foo ɓǝ Rakel, laa pǝǝ ahe, nyi byaŋ nyi ko. 23Gbǝ ɓilli, byaŋ we wor faa: Masǝŋ tahn swãa nǝn ɓe ɓe. 24Ɗii ko ne Yuseɓ, faa: Masǝŋ mo nyi we ki me faɗa.
Vǝrvǝr Laban ne Yakuɓ pǝ gbanzah ɓǝǝra
25Ne cok Rakel mo byaŋ Yuseɓ, Yakuɓ faa nyi Laban: Mo soɓ me ge sǝr ɓe pǝ cok ɓe o. 26Mo soɓ ŋwǝǝ ɓe mai me joŋ yeɓ mor ɓǝǝ ne wee ɓe ka me kal ne ra, mor mo tǝ yeɓ ɓe mai me joŋ nyi mo ɓe. 27Laban faa nyi ko: Mo zyii no ɓe, mo kaa ne me, mor me kwo ne yiila, Masǝŋ ẽe me ɓo mor ɓo. 28Mo cuu soo ɓo nyi me, me ga soo mo. 29Yakuɓ faa nyi ko: Mo tǝ yeɓ ɓe me joŋ nyi mo tǝkine ŋgaɓ fan ɓo mo joŋ mor jol ɓe nyi mo ɓe. 30Fan mai mo yea ne ko kǝpel ka me ge ya ba, ka pǝlli ya, ɗah so ɓoo ɓe, a pǝlli o. Masǝŋ ẽe mo mor ɓe. Ma ɓe me ga joŋ yeɓ mor yaŋ ɓe nekẽne? 31Laban fii: Mo faa ɓǝ ah o, me ga nyi fẽe mo ne? Yakuɓ zyii faa: Mo nyi fan ki me ka. Amma mo joŋ fan mai me ga faa ɓǝ ah nyi mo ɓe, ka me ga pii pǝsǝ̃ǝ ɓo. 32Tǝ'nan me ga kyãh kǝsyil ŋgaɓ fan ɓo daŋ. Me ga woŋ kǝsyil pǝsǝ̃ǝ maŋwǝǝ ah ne mafuu ah wala kǝsyil sǝgwii maŋwǝǝ ah ne mafuu ah ka marai fan soo ɓe ye ga yea. 33Ne cok mo ga ge ka ẽe fan soo ɓe ɓe, njaŋ ɓe ye ga joŋ syedowal tǝ ɓe ba. Sǝgwii mai mo ŋgahɓ suu wala ŋwǝǝ suu ŋwǝǝ ya, ne pǝsǝ̃ǝ mai mo ka pǝfuu ya daŋ, mo ge lwaa ra kǝsyil ma ɓe ɓe, ka me kiŋ ɓo na nyinni. 34So Laban faa: Pǝsãhe, mo yea tǝgbana ɓǝ faa zah ɓo.
35Daga com ah sǝ, Laban syen tǝparswak ma ɗea suu tǝkine maŋgahɓ ah daŋ. Joŋ nai ne sǝgwii mai mo ŋwǝǝ suu ɓo ŋwǝǝ ne maŋgahɓ ah daŋ ne mai mo kan cokfãi ɓo wo suu tǝkine mai mo pǝfuu kǝsyil pǝsǝ̃ǝ daŋ. So nĩira nyi wee ahe. 36Ne cok ah Laban soɓ Yakuɓ, kal ge cok ki, syee tǝ fahlii zah'nan sai. So Yakuɓ pii tǝcoŋ ŋgaɓ fan Laban.
37Comki Yakuɓ cee jol kpuu pǝ̃ǝ camcam sai, sǝpǝǝwenǝǝ, cenne, tǝkine ɓaŋne, gbwãkke, ŋwǝǝ suu ah ŋwǝǝre. 38Rǝk jol kpuu ah mo ŋwǝǝ ɓo ge pel gwii pǝ dah mai ŋgaɓ fan moo gin zwahra bii gŋ. Ne cok moo zwahra bii, a so yeera ki gŋ. 39Ne cok gwii moo yeera ki pel jol kpuu ah ra mo rǝk ɓo, a bemra ma ɗea suu ɗea ne ma ŋwǝǝ suu ah tǝkine maŋgahɓɓe.
40Yakuɓ woo wee pǝsǝ̃ǝ ahe, jin zahpel ɓǝǝ ge wo pǝsǝ̃ǝ ma ɗea suu ɗea ne mai mo pǝfuu kǝsyil pǝsǝ̃ǝ Laban. Yakuɓ ne ŋgaɓ fanne, soɓ suuki ne mǝ Laban a. 41Ne cok gwii maswah ah mo tǝ yeera ki daŋ, Yakuɓ woo jol kpuu rǝk ga pel ɓǝǝ pǝ dahe, mor ka mo yeera ki kah ahe. 42Amma gwii matǝ jok ah ra ye ɓe, ka rǝk gŋ ya. Matǝ jok ah mǝ Laban ye yeani, maswah ah ra mǝ Yakuɓ yo. 43Ne fahlii mai Yakuɓ kǝ̃ǝ ge pel pǝlli, a ne faɓal pǝlli, a ne mǝǝ byak ne wǝǝ byak tǝkine njoŋnjoŋ ne korro daŋ pǝlli.
Currently Selected:
TƏŊMORFANNE 30: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.