TƏŊMORFANNE 25
25
Morsǝ̃ǝ Abraham maki ah ra
(1 KeeƁ 1:32-33)
1Abraham ɓaŋ mawin maki ahe, a ɗii ne Ketura. 2Bem wee ne ki naiko: Zimran, Joksan, Medan, Midian, Jisbak, ne Suak. 3Joksan byaŋ Seba ne Dedan. Wee ɓǝr Dedan laŋ ara naiko: Asurien, Letusien, ne Lumien. 4Wee Midian ye: Efa, Efer, Hanok, Abida, ne Eldaa. Za marai daŋ ara ye wee Ketura.
5Abraham nyi fan ah daŋ nyi Isak. 6Amma Abraham wom fan nyi wee mai mo bem ne ŋwǝǝ ah maki ah ra ne cok ka a no sǝŋ ba, so pee ra kal pǝɗǝk pǝ sǝr ma morcomzah'nanne, ka mo woŋra ki ne Isak.
Ɓǝ wul Abraham ne cii ahe
7Abraham joŋ syii temere ne jemma rǝŋ tǝtǝl dappe, 8so wǝ ka tam pǝsãh ɓe, joŋ syii wo sǝr pǝpãare. 9Wee ah Isak ne Ismael ciira ko pǝ yii Makpela pǝ 'wah Efron we Zohar Hetiyo nǝkǝmorcomzah'nan Mamre, 10pǝ 'wah mai Abraham mo lee jol wee Het. Ciira Abraham gŋ ne mawin ah Sara daŋ. 11Fahfal wul Abraham, so Masǝŋ ẽe wel ah Isak. Isak kaa kah lak bii ma ɗii ne Lahai-Roi.
Wee ɓǝr Ismael
(1 KeeƁ 1:28-31)
12Za marai ara ye morsǝ̃ǝ Ismael we Abraham mai Hagar mǝlaŋ sǝr Egiɓ mabyak Sara mo bem ne ki. 13Tǝɗii wee Ismael tǝkine morsǝ̃ǝ ɓǝǝ a naiko: Welii Ismael a ɗii ne Nebajot, so Kedar, 14Adbeel, Mibsam, Misma, Duma, Massa, 15Hadar, Tema, Jetur, Nafis, ne Kedema. 16Ɗii wee Ismael marai ye ɗii yaŋ ɓǝǝ tǝkine cok kal ɓǝǝra, ara ye za goŋ jemma tǝtǝl gwa ne zahban ɓǝǝra. 17Ismael kyaŋ syii temere ne jemma sai tǝtǝl rǝŋ, ge wǝ. 18Wee ah kaara daga Havila ŋhaa dai Sur mai mo nǝkǝmorcomzah'nan Egiɓ nǝfah kǝ Asiria. Ge kaara cok ki cam ne morsǝ̃ǝ wee Abraham manyeeki ahe.
Ɓǝ byaŋ Esau ne Yakuɓ
19Morsǝ̃ǝ Isak we Abraham a naiko: Abraham byaŋ Isak. 20Isak joŋ syii jemma nai, ɓaŋ Rebeka mǝlaŋ Betuel Aramien ma Mesopotamia naa mah Laban Aramien kanne. 21Isak pǝǝ Masǝŋ ka mawin ah mo byaŋ, mor mawin ah masoor o. So Masǝŋ laa pǝǝ ahe, mawin ah Rebeka gbǝ ɓilli. 22Wee ah tǝŋ waara ki ɓǝrri. Rebeka faa: Ɓǝ ah mo nai ɓe, me gbǝ ɓil mor fẽene? So kal ge fii Masǝŋ.
23Masǝŋ zyii zah ah faa: Zahban za no ɓǝr ɓo gwa, za camcam gwa ga pǝ̃ǝra gin morsǝ̃ǝ ɓo, a ga woŋra ki daga ɓǝrri, maki ah a ga kal maki ne swahe, we malii ga joŋ mor we malaŋne.
24Cok byaŋ Rebeka mo ge o, jurkpiŋ ye ɓǝr ahe. 25Ma kǝpel mo byaŋ a pǝsyẽ, suu ah daŋ tǝgbana mbǝro ma ne syiŋ, ɗiira ko ne Esau. 26Fahfal ah naa mah ah mo pǝ̃ǝ, gbǝ morjimɓal Esau ɓo ne jolle. Ɗiira ko ne Yakuɓ. Ne cok Isak mo bem wee ah ka joŋ syii ɓo jemma yea.
Esau lee farel ne tǝɗii welii ahe
27Wee ah joŋra zaluuri, Esau gao yo, a kyãh cokki. Amma Yakuɓ mǝ ah dǝɓ tǝ 'wa yo, a kaa yaŋ. 28Isak a 'yah Esau, mor a ren nǝǝ ah moo inko. Amma Rebeka a 'yah Yakuɓ.
29Comki Yakuɓ joŋ farelle. Esau pii soo gin cokki, gaɓ ɓo. 30Esau faa nyi Yakuɓ: Oseni mo soɓ me re farel masyẽ mai ɗao, mor me gaɓ ɓo. (Mor ah ɗiira ko ne Edom.) 31Yakuɓ faa: Mo 'yah ɓe, mo lee ne me ne tǝɗii welii tǝ'nahko. 32Esau zyii faa: Ame laŋ me tǝ ga wǝ fa ɓe, tǝɗii welii ga joŋ fẽe wo ɓe ne? 33Yakuɓ faa: Mo haa zah nyi me tǝl ah ɗǝ. So haa zah nyi ko, ɓaŋ ɗii welii ah lee fan ne jol Yakuɓ. 34So Yakuɓ nyi paŋgasso tǝkine tǝker nyi Esau. Re, zwǝ, so ur kalle. Esau syẽa ɗii welii ah naiko.
Currently Selected:
TƏŊMORFANNE 25: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.