TƏŊMORFANNE 23
23
Sara wuu, Abraham lee cok cii ahe
1Sara kyaŋ syii wo sǝr temere vaŋno ne jemma gwa tǝtǝl rǝŋ, 2so wǝ Kirjat-Arba, mai ako ye mo Hebron pǝ sǝr Kanaan. Abraham yee wul Sara tǝkine gban yel ahe.
3So Abraham ur soɓ wul tǝ sǝr kal ge wo wee Het, faa nyi ra: 4Ame ye gwǝǝ ne mowoo kǝsyil ɓiiri, we nyi cok cii wul nyi me kǝsyil ɓiiri, ka me cii wul ɓe gŋ ka me ẽe nai kao. 5Wee Het zyiira zah Abraham faa: 6Dǝɓlii ɓuuru, mo laa ɓǝ faa ɓuu ɗao. Amo yerima Masǝŋ kǝsyil ɓuuru. Mo kyeɓ pal mai mo kal pal ɓuu ɓo ne sãh daŋ ka mo cii wul ɓo gŋ o. Mor kǝsyil ɓuu dǝɓ ma cak mo tǝ pal ah mo ka cii wul ɓo gŋ ya kǝka.
7Abraham ur sǝŋ, so ɗǝŋ tǝtǝl ge sǝŋ pel za sǝr ah wee Het. 8Faa nyi ra: We nyi fahlii ɓo me ka cii wul ɓe ka me ẽe nai kao ɓe, we laa ɓǝ faa ɓe, we pǝǝ Efron Hetiyo we Zohar 9ka mo nyiko yii Makpela mǝ ah mai mo zahsyee 'wah ah nyi me. Mo nyiko me lee ne lak daidai soo ah ka me yea ne cok cii wul tǝgǝǝ ɓiiri.
10Com moo laŋ ka Efron kaa ɓo kǝsyil wee Het zahfah ɓaale yaŋ. So zyii zah Abraham tǝkine za mai mo haira ɓo ne ki daŋ faa: 11Ka nai ya dǝɓlii ɓe, mo laa ɓǝ faa ɓe ɗao. Me nyi 'wah tǝkine yii mai mo no gŋ daŋ nyi mo ne nahnǝn za sǝr ɓe. Mo cii wul ɓo gŋ o. 12Abraham so ɗǝŋ ge sǝŋ pel za sǝr ahe, 13faa ɓǝ ne Efron pel za sǝr ah faa: Me pǝǝ mo, mo zyii ɓe, me ga nyi lak lee 'wah ah nyi mo, mo nyiŋ jol ɓe, so fahfal ah me ga cii wul ɓe gŋ ba. 14Efron zyii zah Abraham faa: 15Dǝɓlii ɓe, mo laa ɓǝ faa ɓe ɗao faɗa. Sǝr mai mo nǝn vãm solai temere nai to, a fẽe ye kǝsyil ɓe ne mo ne? Mo cii wul ɓo gŋ kpǝ o. 16Abraham laa ɓǝ faa Efron, lii lak mai mo cuu nyi ko pel wee Het, vãm solai temere nai, lak mai za ma lea fan luma mo 'yah yo.
17'Wah Efron mai mo Makpela fah kǝmorcomzah'nan Mamre, mo ne yii gŋ tǝkine kpuu mai mo pǝ 'wah zahsyee ah daŋ, 18ciŋ mǝ Abraham ne nahnǝn wee Het tǝkine za mai mo kaara ɓo zahfah ɓaale yaŋ ah daŋ. 19So fahfal ah Abraham cii mawin ah Sara pǝ yii ma pǝ 'wah Makpela fah kǝmorcomzah'nan Mamre, mai ako ye mo Hebron pǝ sǝr Kanaan. 20'Wah ah ne yii mo no gŋ daŋ ciŋ mǝ Abraham, mor lee jol wee Het ka cii wul gŋ.
Currently Selected:
TƏŊMORFANNE 23: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.