PƏ̃Ə ZA ISRAEL 6
6
1So Dǝɓlii faa nyi Mosus: Zǝzǝ̃ǝko mo ga kwo fan makẽne mee ga joŋ wo Farao, mor me ga joŋ ko ne doole ka mo soɓko zai pǝ̃ǝ gin sǝr ahe, me ga joŋ ko ne doole ŋhaa a nĩi za rai gin sǝr ah kalle. 2Masǝŋ so faa nyi Mosus faa: Ame ye Dǝɓlii. 3Me cuu suu ɓe wo Abraham, Isak tǝkine Yakuɓ na Masǝŋ ma ne swah daŋ, amma ne tǝɗii ɓe Dǝɓlii tǝra me ya. 4Me so gbǝ zah ne ra ka nyi sǝr Kanaan nyi ra, kyãhra tǝ sǝr ahe, kaara gŋ na gwǝǝre. 5Zǝzǝ̃ǝ me laa 'mee za Israel mai mo tǝ joŋra yeɓ byak mor Egiɓien, me so foo ɓǝ gbanzah ɓe mai me gbǝ ɓo ne ra. 6Mor maiko mo faa nyi za Israel sye: Ame ye Dǝɓlii, me ga ɗǝr faswaa mai Egiɓien mo rǝkra ɓo tǝ ɓiiri, me ga wǝǝ we pǝ byak ɓiiri. So me ga ɓaŋ jol ɓe ga sǝŋ, me ga ŋgoŋ kiita pǝ'man tǝ ɓǝǝ ne ko, me ga ǝ̃ǝ we. 7Me ga nyiŋ we na za ɓe, ame ye ga yea Masǝŋ ɓiiri. We ga tǝ, ame ye Masǝŋ ɓii mai mo wǝǝ we gin pǝ byak Egiɓien. 8Me ga pǝ sǝr mai me haa zah nyi Abraham, Isak ne Yakuɓ ne we, me ga nyi nyi we ka renne. Ame ye Dǝɓlii. 9Mosus ge kee ɓǝ ah nyi za Israel naiko, amma ɓǝ foo gaɓ ne yeɓ gaɓ cak ra bai laa ɓǝ Mosus.
10So Dǝɓlii faa nyi Mosus: 11Mo ge faa nyi Farao, goŋ sǝr Egiɓ, ka mo soɓko za Israel pǝ̃ǝra gin sǝr ah kalle. 12Mosus zyii zah Dǝɓlii faa: Mo ẽe ɗǝ, za Israel laara ɓǝ faa ɓe ya, a joŋ ɗii ka Farao mo laa ɓǝ faa ɓe ne? Ame laŋ me ye dǝɓ ma faa ɓǝ pǝgaɓ pǝ zahe. 13So Dǝɓlii faa nyi Mosus ne Aron. We faa nyi za Israel tǝkine goŋ sǝr Egiɓ ame ye faa nyi we ka we pǝ̃ǝ ne za Israel gin sǝr Egiɓ.
Za morsǝ̃ǝ Mosus ne Aron
14Welii Yakuɓ Ruben a ne wee nai, tǝɗii ɓǝǝ a naiko: Hanok, Paloo, Hesron, ne Karmi. Zahban mai mo tǝŋ ne za mai a ɗiira nai ta. 15Simon ne wee yea, tǝɗii ɓǝǝ naiko: Jemuel, Jamin, Ohad, Jakin, Zohar, ne Saul we mawin Kanaaneyo. Zahban mai mo tǝŋ ne za mai a ɗiira nai ta. 16Tǝɗii wee Lewi ne morsǝ̃ǝ ɓǝǝ a naiko: Gerson, Kehat ne Merari. Syii Lewi mo kyaŋ wo sǝr a temere vaŋno ne jemma sai tǝtǝl rǝŋ. 17Wee Gerson: Libni, Syimai tǝkine za ɓǝǝra. 18Wee Kehat: Amram, Jitzar, Hebron, ne Uziel. Kehat joŋ syii wo sǝr temere vaŋno ne jemma sai tǝtǝl sai. 19Wee Merari: Makli ne Musi. Zahban mai mo tǝŋ ne za mai a ɗiira nai ta.
20Amram ɓaŋ mamlaŋ Jokebet kanne, byaŋ Aron ne Mosus ne ki. Amram kyaŋ syii wo sǝr temere vaŋno ne jemma sai tǝtǝl rǝŋ. 21Wee Jitzar: Kora, Nefeg ne Zikri. 22Wee Uziel: Miskal, Elsafan ne Sitri. 23So Aron kan Eliseba mǝlaŋ Amminadaɓ, naa mah Naason, so bem Nadaɓ, Abihu, Eleasar, ne Itamar ne ki. 24Wee Kora: Asir, Elkana ne Abiasaɓ. Ara ye za ma tǝŋ ban Korien. 25Eleasar we Aron kan mǝlaŋ Putiel, byaŋ Fineas ne ki. Mai zaluu ma morsǝ̃ǝ Lewi ye ne ban ɓǝǝra.
26Aron ne Mosus ye za mai Dǝɓlii mo faa nyi ra: We pǝ̃ǝ ne za Israel gin sǝr Egiɓ ne pãa ɓǝǝ daŋ. 27Mosus ne Aron ye za mai mo faara nyi Farao ka mo soɓko za Israel pǝ̃ǝ gin sǝr ah kalle.
Masǝŋ lai Mosus ne Aron tǝ ɓǝ camcam
28Ne cok Dǝɓlii mo faa ɓǝ ne Mosus sǝr Egiɓ, 29faa nyi ko: Ame ye Dǝɓlii. Mo faa ɓǝ makẽne daŋ me tǝ faa nyi mo nyi Farao, goŋ sǝr Egiɓ. 30Amma Mosus zyii zah Dǝɓlii faa: Mo ẽe ɗǝ, ame ye dǝɓ mai moo faa ɓǝ pǝ zah pǝgaɓɓe. A joŋ ɗii ka Farao mo laa ɓǝ faa ɓe ne?
Currently Selected:
PƏ̃Ə ZA ISRAEL 6: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.