PƏ̃Ə ZA ISRAEL 2
2
Ɓǝ byaŋ Mosus
1Dǝɓ ban Lewi ge ɓaŋ mǝlaŋ morsǝ̃ǝ Lewi kanne. 2Mawin ah gbǝ ɓilli, byaŋ we pǝworre, kwo wel ah pǝsãhe, so muŋ ko fĩi sai. 3Ka gak muŋ ko faɗa yao, ɓaŋ sunduku fãa ma kaŋ ne kee, rwãh ɓǝr ah ne mǝŋgǝ̃ǝ, sor wel ah ge gŋ, so ge kan ko pǝ fãa tǝkee bii Nil. 4Naa mah wel ah mawin uu pǝɗǝk mor ka ẽe fan mai moo gin joŋ ko. 5Mǝlaŋ Farao ge zahbii ka er bii. Wee ŋwǝǝ ma syee mor ah tǝ kyãhra tǝkee bii. Mǝlaŋ Farao kwo sunduku pǝzyil fãa, pee mabyak ah ge ɓaŋ. 6So mǝlaŋ Farao gbǝr zah ahe, lwaa welaŋ tǝ yeyee gŋ, kwo syak tǝl ah faa: Mai we Yahuduen o. 7Naa mah wel ah mawin kŋ ge faa nyi mǝlaŋ Farao: Mo 'yah me ge kyeɓ ma wol we nyẽe kǝsyil ŋwǝǝ Yahuduen ka wol ko nyi mo ne? 8Mǝlaŋ Farao zyii faa nyi ko: Mo gyo. So mǝlaŋ ah kal ge ɗii mah welle. 9Mǝlaŋ Farao faa nyi ko: Mo ɓaŋ we nyẽe mo wol ko nyi me sa. Me ga soo gaɓ ɓo. Mawin ah ɓaŋ wel ah wolle. 10Ne cok wel ah mo soɓ wonni, ɓaŋ ko ge mǝlaŋ Farao ne ko, ciŋ wel ah ne ki. Ɗii ko ne Mosus mor faako: Me nǝǝ ko gin pǝ bii.
Mosus kal ge sǝr Midian
11Ne cok Mosus mo joŋ dǝɓlii, kal ge wo wee pah ahe. So kwo yeɓ gaɓ ɓǝǝra, kwo dǝɓ sǝr Egiɓ tǝ in Yahuduyo ma kǝsyil wee pah ahe. 12Eẽ cokki, ẽe cokki, kwo dǝɓ ki ya, so i Egiɓiyo, njǝk ko ge mor tǝkuuri. 13Ne zah'nan tǝ'nan ah pǝ̃ǝ ge lalle, kwo Yahuduen gwa tǝ ɗahra ki, faa nyi dǝɓ ma lah suu: Mo in naa pa ɓo mor fẽene? 14Dǝɓ ah zyii faa: Azu ye kan mo dǝɓlii ne pa ŋgoŋ kiita tǝ ɓuu ne? Mo 'yah ka in me pǝ wul tǝgbana mo i Egiɓiyo ne? Gal re Mosus, so faa: 'Manna, za laa ɓǝ nyẽe ɓe. 15Farao laa ɓǝ ahe, so kyeɓ ka in Mosus.
Amma Mosus ɗuu gal Farao, kal ge kaa sǝr Midian. 16Pa joŋzahsyiŋ ki no sǝr Midian a ɗii ne Jetro, a ne wee ŋwǝǝ rǝŋ. Comki Mosus ge kaa zah lak bii maki ahe. Ne cok ah wee Jetro maŋwǝǝ rǝŋ ge tǝ beara bii, beara baa dah mai moo nyira bii nyi ŋgaɓ fan pa ɓǝǝ gŋ. 17Za kǝpii fan maki ah ge daira, so nĩira ra. Amma Mosus ur gaŋ gbah jol ɓǝǝ nyi bii nyi ŋgaɓ fan ɓǝǝra. 18Ne cok mo jinra ge wo pa ɓǝǝra, pa ɓǝǝ so faa: Tǝ'nah we jin ge ɓo gwari ɗii nai ne? 19Faara: Egiɓiyo maki ah no ǝ̃ǝ ru jol za kǝpii fanne, so bee bii nyi ru, nyi bii nyi fan ɓuu ta. 20So faa nyi wee ah maŋwǝǝ ra: A kẽne? We soɓ dǝɓ ah mor fẽene? We ɗii ko, ka mo ge reko farelle.
21Mosus kaa wo dǝɓ ahe. Dǝɓ ah nyi mǝlaŋ ah Zippora nyi Mosus kanne. 22So byaŋ we ne ki pǝworre ɗii ne Gersom, mor faako: Me kaa mowoo ɓo tǝ sǝr ki.
23Syii pǝlli mo pǝ̃ǝ kal o, goŋ Egiɓ wuu. Za Israel a 'meera pǝ byak ɓǝǝra, so dahra gorre. Ɓǝ yee ɓǝǝ mo tǝ yeera pǝ byak ɓǝǝ cii ge dai Masǝŋ. 24So Masǝŋ laa yee ɓǝǝra, so foo ɓǝ gbanzah ah mo gbǝ ne Abraham, Isak ne Yakuɓ. 25Masǝŋ kwo za Israel mo tǝ joŋra byakke, so ɓaŋ syiŋ ɓǝǝra.
Currently Selected:
PƏ̃Ə ZA ISRAEL 2: MUAR
Highlight
Share
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.